යුද්ධයෙන් මරා දැමුනු දහස් සංඛ්‍යාත දෙමළ ජනයා සැමරීම සඳහා මුලතිවු දිස්ත්‍රික්කයේ මුල්ලිවයික්කාල් හි
ස්ථාපිත කර තිබු දස වසරකට වඩා පැරණි ස්මාරකය කඩා බිද දමා විනාශ කළ බවට ශ්‍රී ලංකා රජයේ ආරක්ෂක අංශ වෙත චෝදනා එල්ල වී තිබේ.
ඊයේ රාත්‍රියේ ස්මාරකය සමීපයේ යුද හමුදාව සහ පොලිස් නිලධාරීන් රැදී සිටි බැවින් ඔවුන්ගේ අනුදැනුමකින් තොරව වෙනත් කිසිවෙකුට එය විනාශ කළ නොහැකි බවයි ප්‍රදේශවාසී දෙමළ දේශපාලකයන් හා ක්‍රියාධරයන් පවසන්නේ.
2009 වසරේ යුද්ධයෙන් මරා දැමුනු පිරිස් සැමරීම සඳහා දෙමළ ජනයා විසින් මුලතිවු දිස්ත්‍රික්කයේ මුල්ලිවයික්කාල් හි ස්මාරකය ස්ථාපිත කර තිබුනේ 2010 වසරේදීය.
ශ්‍රී ලංකා යුද හමුදාව උතුරේ දියත් කළ යුද්ධයෙන් සාමාන්‍ය වැසියන් අඩුම වශයෙන් හැත්තෑ දහසක්වත් මිය යන්නට ඇති බව එක්සත් ජාතීන්ගේ සංවිධානය ගණන් බලා තිබේ.
යුද්ධය හේතුවෙන් මියගිය සියලු දෙමළ ජනතාව අනුස්මරණය කිරීම සදහා සෑම වසරකම මැයි මාසයේදී දෙමළ ජනතාව විසින් සිදු කරන මුල්ලිවයික්කාල් සතියට සමගාමීව ස්මාරකය අභියසදී එහි පළමු දිනය සැමරීම සදහා මැයි 12 බදාදා ආගමික නායකයන් ප්‍රමුඛ ජනතාව උත්සාහ ගෙන තිබුනත් යුද හමුදාව සහ පොලීසිය ඊට බාධා පමුණුවා තිබුනි.
ඊයේ රාත්‍රි හත පමණ වන තෙක් එම ස්ථානයේ රැදී සිටි දෙමළ ජනයා ආරක්ෂක අංශවල බලපෑම හමුවේ සිය සමීපතමයන් අනුස්මරණය නොකරම ආපසු නිවෙස් බලා ගොස් තිබුනි.
ජනතාව පිටව ගිය පසුවත් යුද හමුදාව සහ පොලීසිය එම ස්ථානයේ රැදී සිටි බව ප්‍රදේශවාසී දෙමළ ජනතාව අවධාරණය කරති.
පළාත් බද වාර්තාකරුවන් පවසන්නේ මුල්ලිවයික්කාල් ස්මාරකය කඩා බිද දමා විනාශ කර තිබු අයුරු අද උදෑසන දැක ගන්නට ලැබුණ බවයි.
යුද්ධයේදී ඝාතනයට ලක්වු සිය සමීපතමයන්ගේ නම් සටහන් කරමින් සැකසු පුවරුවක් ඊයේ දිනයේ එම ස්ථානයේ තබා තිබු නමුත් මේ වන විට එම පුවරුව අතුරුදහන්ව ඇති බවටත් ප්‍රදේශවාසී ජනතාව චෝදනා කරති.
දෙමළ දේශපාලකයන් චෝදනා කරන පරිදි එම ගල් පුවරුව පැහැරගෙන ගොස් ඇත්තේ පොලිසියයි.
THE LEADER TV
ගෝඨාට මහින්දට නොකියා රට ගිය බැසිල් සුරේන්ට කිවූ රහස?
පවුලේ ගැටුම උග්‍ර අතට! බැසිල් කිසිවෙකුටත් නොදන්වාම රට යයි!
