පොලිස් අත්අඩංගුවේදී තරුණයකු මරණයට පත් වීමත් සමග මඩකලපු වාසීන් පිරිසක් නොසන්සුන්තාවයට පත්ව සිටි.
මිය ගිය තරුණයාගේ මෑණියන් ඇතුළු ඥාතීන් චෝදනා කරන්නේ පොලිස් ඔත්තු සේවා විසින් අත් අඩංගුවට ගන්නා ලද විසි එක් හැවිරිදි චන්ද්‍රන් විධුෂන්ට වධහිංසා කොට ඝාතනය කරන ලද බවටයි. ඒ බව දැනගැනීමෙන් පසු ප්‍රදේශවාසීන් තරුණයාගේ නිවස අසල අසල රැස්කනු පළාත්බද මාධ්‍යවේදීන් විසින් රූපගත කොට තිබේ.
අවුරුද්දකට මදක් වැඩි කාලයක් තුල පොලිස් අත් අඩංගුවේ සිදුවූ බවට වාර්තා වන එකොලොස් වැනි මරණය මෙයයි.
චන්ද්‍රන් විධූෂන් තරුණයාගේ මරණය සම්බන්ධයෙන් පරීක්ෂණයක් පවත්වන ලෙස දිස්ත්‍රික් මහේස්ත්‍රාත් කරුපයියා සෙල්වරානි එරාවුර් පොලිසියට නියෝග කර ඇත.
ජුනි 2 බදාදා රාත්‍රියේ මඩකලපුවේ ඉරුදයපුරම්හිදී අත් අඩංගුවට ගත් සිය පුතුට මාංචු දමා පැයක පමණ කාලයක් පොලිස් නිලධාරීන් පහර දුන් බව තරුණයාගේ මව මාධ්‍යවේදීන් සමග පවසා තිබේ.
“රෑ දහයමාරට විතර ගෙදරින් අරං ගිහින් මඩකලපු පොලිසියට ගෙනිහිල්ලා ලොකප් එකේ දැම්මා. ඊට පස්සේ උදේ අපිට කිව්වා එයා මැරිලා කියලා,” යි ඔහුගේ නැගණිය පැවසුවාය.
පළාත් බද වාර්තාකරුවන් පවසන්නේ සිවිල් ඇදුමින් සැරසී සිටි පොලිස් නිලධාරීන් තරුණයාට පහර දෙන ආකාරය ගම් වැසියන් විසින්ද දැක තිබෙන බවයි.
“ඔලුවෙයි, බෙල්ලෙයි තුවාල පේන්න තියෙනවා,” යි තරුණයාගේ මාමණ්ඩිය ප්‍රදේශයේ මාධ්‍යවේදීන්ට පවසා තිබේ.
“එයාට මාංචු දාලා ගහක ගැටගහලා ඊට පස්සේ පොලිසියට අරං ගියා. ඊට පස්සේ ගේ පරීක්ෂා කරලා මුකුත් හොයාගන්න නැතිව ආපහු ගියා. අපිට කිව්වේ පොලිසියට එන්න එපා කියලයි.”
මත්ද්‍රව්‍ය සම්බන්ධයෙන් වන චෝදනාවක් මත චන්ද්‍රන් විධූෂන් තරුණයා පොලිස් අත්අඩංගුවට ගෙන ඇති බව පෙන්වා දෙන ප්‍රදේශ වාසීන් ප්‍රශ්න කරන්නේ අත්අඩංගුවට ගත් සැකකරුවකු අධිකරණයට ඉදිරිපත් කරනවා විනා පොලිසිය ඔහුට පහර දීමේ පදනම කුමක්ද යන්නයි.
පොලිස් ඝාතන හා මානව හිමිකම්
පොලිස් අත් අඩංගුවේ සිටින සැකකරුවන් ඝාතනය වීම සම්බන්ධයෙන් ශ්‍රී ලංකා මානව හිමිකම් කොමිෂන් සභාව පසුගිය මාසයේදී පොලිස්පතිවරයාගෙන් පූර්ණ වාර්තාවක් ද ඉල්ලා තිබුනි.
"ආසන්න දින කිහිපයක් තුළ මෙවැනි සිදුවීම් වාර්තා වීම තුළින් රට තුළ නීතියේ ආධිපත්‍ය පිළිබද බරපතල ගැටළුකාරී තත්වයක් ගොඩනැගෙන බව ශ්‍රී ලංකා මානව හිමිකම් කොමිෂන් සභාවේ විශ්වාසයයි"
පොලිස්පති වෙත යොමු කරන ලද ලිපියක් මගින් ශ්‍රී ලංකා මානව හිමිකම් කොමිෂන් සභාවේ සභාපති ආචාර්ය ජගත් බාලසුරිය දැනුම් දී තිබුනේ, පොලීසිය භාරයේ සිටින සැකකරුවන්ගේ ආරක්ෂාව තහවුරු කිරීම පොලිස් දෙපාර්තමේන්තුවේ වගකීමක් බව පොලිස් දෙපාර්තමේන්තුවේ නියෝග වල මෙන්ම ශ්‍රේෂ්ඨාධිකරණ නඩු තීන්දු වලද අවධාරණය කර ඇති බවයි.
ධර්මකීර්ති තාරක පෙරේරා විජේසේකර හෙවත් කොස්ගොඩ තාරක සහ මාබුලගේ දිනිත් මෙලන් මාබුල හෙවත් ඌරුජුවා යන සැකකරුවන් දෙදෙනා 2021 මැයි 13 සහ 14 යන දෙදින තුළ පොලිස් වෙඩි පහරින් ඝාතනය වී තිබුනේ පොලිස් භාරයේ සිටියදීය.
මානව හිමිකම් කොමිෂන් සභාව තම අවධානය ඒ වෙත යොමු කර තිබුනේ නීතිඥ මණ්ඩලයක් විසින් පැමිණිලි කිරීමෙන් අනතුරුවය.
"මීට අදාළව ශ්‍රී ලංකා මානව හිමිකම් කොමිෂන් සභාව වෙත පැමිණිලි යොමු වී ඇති අතර එම පැමිණිලි HRC/1216/21 සහ HRC/1176/21 යටතේ ලියාපදිංචි වී ඇත."
පොලිස්පතිවරයා වෙත යොමු කළ ලිපිය මගින් ආචාර්ය ජගත් බාලසුරිය වැඩි දුරටත් දැනුම් දී ඇත්තේ කොමිෂන් සභාවට ලැබී ඇති පැමිණිලි විමර්ශනය කිරීමේ ආරම්භක පියවරක් වශයෙන් පොලිස් දෙපාර්තමේන්තුව මෙම සිදුවීම පිළිබදව සිදු කරන ලද පරීක්ෂණය පිළිබද පුර්ණ වාර්තාවක් කැඳවීමට තිරණය කර ඇති බවයි.
මැයි මස 30 දිනට පෙර ලබා දෙන ලෙස ශ්‍රී ලංකා මානව හිමිකම් කොමිෂන් සභාව පොලිස්පතිවරයාගෙන් ඉල්ලා තිබුණු එම වාර්තාව ලැබුණු බවක් දැනගන්නට නැත.
ශ්‍රී ලංකා මානව හිමිකම් කොමිෂන් සභාව පසුගිය වසරේ නිවේදනය කර තිබුනේ 2020 ජුනි මස සිට ඔක්තෝබර් 20 දක්වා කාලය තුළ පොලිස් අත්අඩංගුවේදී මිය යාම් අටක් වාර්තා වී ඇති බව යි.
THE LEADER TV
සාපය | The Leader TV
මේරි කොම් පරදී : නාමල් අගමැති!
