ජාත්‍යන්තර මූල්‍ය අරමුදලේ විධායක මණ්ඩලය විසින් මේ සඳහා අනුමතිය ලබා දී ඇති බව සඳහන් ය.
ජාත්‍යන්තර මූල්‍ය අරමුදල පැවසුවේ මේ යටතේ ශ්‍රී ලංකාවට අමෙරිකා ඩොලර් මිලියන 700ක පමණ මූල්‍ය ආධාරයක් ලබාගැනීමට ප්‍රවේශය සැලසෙන බවය.
මෙම සමාලෝචනය සඳහා අනුමැතිය ලැබීමට අවදානය ලක්විය හැකි පාර්ශ්ව ආරක්ෂා කරමින් පිරිවැය ආවරණය කෙරෙන විදුලි සහ ඉන්ධන මිල ප්‍රතිස්ථාපනය කිරීම තීරණාත්මක ක්‍රියාමාර්ගයක් බව මීට පෙර ජාත්‍යන්තර මූල්‍ය අරමුදලේ සන්නිවේදන දෙපාර්තමේන්තුවේ අධ්‍යක්ෂවරිය සඳහන් කර තිබුණි.
අර්බුදයෙන් ගොඩඑන්න ලංකාවෙන් දැවැන්ත මූල්‍ය සැලසුමක්....
ගෝලීය අවිශ්චිතතාවන්, ඉහළ යන ආනයන වියදම් සහ 'දිට්වා' (Ditwah) සුළි කුණාටුවෙන් සිදු වූ ආර්ථික හානිය හමුවේ ශ්‍රී ලංකාව සිය මූල්‍ය ස්ථාවරත්වය රැක ගැනීම සඳහා විදේශීය අරමුදල් සපයා ගැනීමේ උත්සාහයන් දැඩි කර තිබේ.
රජයේ නවතම ණය ගැනීමේ උපාය මාර්ගයට අනුව, අවදානම් සහිත විදේශීය වාණිජ ණය ගැනීම් සීමා කරමින්, මේ වසරේදී ඇමෙරිකානු ඩොලර් බිලියන 2.3කට (රුපියල් බිලියන 700කට) ආසන්න විදේශීය මූල්‍යකරණයක් ලබා ගැනීමට බලධාරීන් ඉලක්ක කරයි.
මුදල් අමාත්‍යාංශ ආරංචි මාර්ග සඳහන් කරන්නේ බාහිර මූල්‍ය කම්පන සහ විනිමය අනුපාතික උච්චාවචනයන්ගෙන් ආර්ථිකය ආරක්ෂා කර ගැනීම සඳහා සමස්ත මූල්‍ය අවශ්‍යතාවලින් 90%ක්ම දේශීය වෙළෙඳපොළෙන් සපුරා ගැනීමට සැලසුම් කර ඇති බවයි.
රටේ ආර්ථික ප්‍රකෘතිමත් වීමේ සැලසුම ජාත්‍යන්තර මූල්‍ය ආයතන මත බෙහෙවින් රඳා පවතී. ඒ අනුව, වසරේ මුල් භාගය තුළ ජාත්‍යන්තර මූල්‍ය අරමුදලෙන් (IMF) ඩොලර් මිලියන 700ක් ද, ලෝක බැංකුව සහ ආසියානු සංවර්ධන බැංකුවෙන් ඩොලර් මිලියන 200ක් ද ඇතුළුව ඩොලර් බිලියන 1කට ආසන්න නිල විදේශීය මූල්‍ය ආධාර ප්‍රමාණයක් ලැබීමට නියමිතය.
මෙහිදී අද (මැයි 27) දින පැවැත්වීමට නියමිත IMF විධායක සභා රැස්වීම කෙරෙහි රජයේ විශේෂ අවධානය යොමු වී ඇත. එහිදී ශ්‍රී ලංකාවේ ආර්ථික ප්‍රතිසංස්කරණ වැඩසටහනේ 5 වැනි සහ 6 වැනි සමාලෝචන නිම කිරීමට නියමිත අතර, එය ගෙවුම් ශේෂය ශක්තිමත් කිරීම සඳහා වන ඩොලර් මිලියන 700ක තීරණාත්මක මුදල් වාරිකය නිදහස් කිරීමට මඟ පාදනු ඇත. මීට පෙර, 'දිට්වා' සුළි කුණාටු ව්‍යසනයෙන් පසු හදිසි ආධාර ලෙස IMF ආයතනය ඩොලර් මිලියන 206ක ණයක් ද ලබා දී තිබිණි.
ලෝක බැංකුවෙන් සහ ADB වෙතින් ලංකාවට ඩොලර් මිලියන සිය ගණනක සහන!
ද්විපාර්ශ්වික ණයහිමියන්ගෙන් 99%ක් සමඟම ණය ප්‍රතිව්‍යුහගත කිරීමේ එකඟතාවලට පැමිණීම නිසා සහනදායී ණය ලබා ගැනීමේ අවස්ථාව ශ්‍රී ලංකාවට නැවත හිමිවී ඇත. මේ යටතේ ලෝක බැංකුව වසර තුනක් පුරා ඩොලර් බිලියන 1ක අඩු පොලී ණයක් ලබා දීමට ප්‍රතිඥා දී ඇති අතර, ජාත්‍යන්තර මූල්‍ය සංස්ථාව (IFC) පුද්ගලික අංශයේ ආයෝජන සඳහා ඩොලර් බිලියන 1කට වඩා ගැනීමට අපේක්ෂා කරයි.
මීට අමතරව ප්‍රාදේශීය සංවර්ධනය සඳහා ඩොලර් මිලියන 100ක 'REVIVE' වැඩසටහන සහ සුළු හා මධ්‍ය පරිමාණ ව්‍යාපාර සඳහා ආසියානු සංවර්ධන බැංකුවේ ඩොලර් මිලියන 100ක ණය පහසුකම ද ක්‍රියාත්මකය.
මහ බැංකු අධිපතිගෙන් අනතුරු ඇඟවීමක්!
කෙසේ වෙතත්, කොළඹ කොටස් වෙළෙඳපොළෙන් ප්‍රාග්ධනය පිටතට ගලායාම සහ භූ දේශපාලනික ආතතීන් හේතුවෙන් පවතින අවදානම පිළිබඳව මහ බැංකු අධිපති ආචාර්ය නන්දලාල් වීරසිංහ රජයේ මුදල් පිළිබඳ පාර්ලිමේන්තු කාරක සභාව හමුවේ අනතුරු අඟවා ඇත. ගෝලීය ඉන්ධන මිල ඉහළ යාම ඉදිරි මාසවලදී වෙළෙඳ ශේෂය දුර්වල කළ හැකි බව ඔහුගේ අදහසයි.
මේ අතර, පුද්ගලික ප්‍රාග්ධනය ආකර්ෂණය කර ගැනීම සඳහා 2026 මැද භාගයේදී නව රාජ්‍ය-පෞද්ගලික හවුල්කාරිත්ව (PPP) පනතක් හඳුන්වා දීමට ද රජය සූදානම් වේ.
