ඒ අනුව, එක්දින ප්‍රතිපත්ති පොලී අනුපාතය (Policy Interest Rate) 8.75%ක් දක්වා පදනම් අංක 100කින් වැඩි කිරීමට පියවර ගෙන ඇත.
පසුගිය මැයි 25 වැනිදා පැවැති මුදල් ප්‍රතිපත්ති මණ්ඩල රැස්වීමේදී මෙම තීරණයට එළැඹ ඇති අතර, මෙම සංශෝධනයත් සමඟ මීට පෙර සියයට 7.75ක්ව පැවැති එක්දින ප්‍රතිපත්ති පොලී අනුපාතය සියයට 8.75ක් දක්වා ඉහළ යනු ඇත. ශ්‍රී ලංකා මහ බැංකුව අවසන් වරට පසුගිය මාර්තු මාසයේදී මෙම අනුපාතය සියයට 7.75ක මට්ටමේ ස්ථාවරව පවත්වාගෙන යාමට තීරණය කර තිබුණි.
මූල්‍ය විශ්ලේෂකයන් පවසන පරිදි, මෙලෙස ප්‍රතිපත්ති පොලී අනුපාත ඉහළ නැංවීම මඟින් වාණිජ බැංකුවල ණය පොලී අනුපාත ද ඉහළ යා හැකි අතර, එමඟින් වෙළෙඳපොළ තුළ ඇති මුදල් සැපයුම පාලනය කිරීම සහ උද්ධමනය සීමා කිරීම අපේක්ෂා කෙරේ. මෙරට සාර්ව ආර්ථික ස්ථාවරත්වය තහවුරු කිරීම සහ දිගුකාලීන ආර්ථික වර්ධනයක් ළඟා කරගැනීම වෙනුවෙන් මහ බැංකුව මෙම තීරණය ගෙන ඇති බව වාර්තාවේ.
