දෙසිය පනහකට අධික මිනිස් ජීවිත අහිමි වු පාස්කු ඉරුදින බෝම්බ ප්‍රහාර මාලාව සම්බන්ධයෙන් සැකපිට අත්අඩංගුවට ගත් සැකකරුවන් හැටකට අධික
පිරිසක් තවදුරටත් රිමාන්ඩ් භාරයේ තැබීමට අධිකරණය නියෝග කර තිබේ.
මාරාන්තික වසංගත ව්‍යාප්තිය හමුවේ රට අගුලා ලා තිබීම හේතුවෙන් සැකකරුවන් ශාරිරික ලෙස අධිකරණය හමුවට ඉදිරිපත් නොකළත් විනිසුරුවරයා සුම් තාක්ෂණය ඔස්සේ නඩු කටයුතු මෙහෙයවු බව පළාත් බද වාර්තාකරුවෝ පවසති.
සැප්තැම්බර් 2 බ්‍රහස්පතින්දා මඩකලපුව මහේස්ත්‍රාත් ඒ.සී.එම්. රිස්වාන් නියෝග කර ඇත්තේ සැකකරුවන් හැට හතර දෙනා සැප්තැම්බර් 16 වැනි දා දක්වා තව දුරටත් රක්ෂිත බන්ධනාගාර ගත කරන ලෙසයි.
එම සැකකරුවන් පිරිස පාස්කු ඉරු දින බෝම්බ ප්‍රහාර මාලාවේ මහ මොළකරු ලෙස මාධ්‍ය ඔස්සේ ප්‍රකාශයට පත්වී ඇති සහරාන් හෂීම් සමඟ සබඳතා පැවැත්වීමේ චෝදනා මත වසර දෙකකට ඉහතදී අත්අඩංගුවට ගත් පිරිසකි. ඔවුන් අතර සහරාන් හෂීම්ගේ නැගනියද වන බව පළාත් බද වාර්තාකරුවෝ වැඩි දුරටත් පවසති.
සුම් තාක්ෂණය ඔස්සේ අධිකරණය හමුවට ඉදිරිපත් කර තිබු සැකකරුවන් දිවයිනේ විවිධ පළාත් තුළ රක්ෂිත බන්ධනාගාරගත කර සිටි පිරිසක් බව ඔවුන් වැඩි දුරටත් සදහන් කරයි.
සැකකරුවන් අතුරින් වැඩි පිරිසක් කාත්තන්කුඩි, කල්මුනේ, සයින්දමරදු, සම්මන්තුරේ ආදී ප්‍රදේශ වල පදිංචි කරුවන් වේ.
මිනිස් ජීවිත 268 ක්
පාස්කු ප්‍රහාරයේ සැකකරුවන් ලෙස ශ්‍රී ලංකාවේ අත් අඩංගුවේ ඉන්නා තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇති අතර, ත්‍රස්ත නීති යොදාගෙන දිවයින තුල සිරකොටගෙන ඉන්නා සිය ගණනකගෙන් නඩු පවරා ඇත්තේ පනහකටත් අඩු පිරිසකට පමණි.
පාස්කු ඉරුදින ප්‍රහාරය ගැන විමර්ශන, විවේචනය කරන පුද්ගලයන්ට එරෙහිව නීතිමය පියවර ගන්නා බවට විශේෂ ප්‍රකාශයක් කරමින් පසුගියදා අනතුරු ඇගවු පොලිස්පති සී.ඩි වික්‍රමරත්න එහිදී පවසා තිබුනේ ප්‍රහාරය සම්බන්ධයෙන් අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිටින බවයි.
"පොලිස් පරීක්ෂණ වලින් සැකපිට අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිටිනවා, රුපියල් මිලියන 360 මුදල් රාජසන්තක කර තවත් රුපියල් මිලියන 168 ක දේපොළ තහනම් කර තිබෙනවා." පැවසූ පොලිස්පති "සැකකරුවන් 46 දෙනෙකුට එරෙහිව මහාධිකරණයේ අධිචෝදනා 11 ක් ගොනු කර තිබෙනවා" යැයි වැඩි දුරටත් සදහන් කළේය.
මහජනතාවගේ අදහස් ප්‍රකාශන අයිතියට ගරු කරන බව පවසන පොලිස්පති වික්‍රමරත්න ''පොලිසියේ විමර්ශනයෙන් පසු පවරා ඇති නඩු වලට අගතියක් වන නිසා ඒවා විවේචනය හා හෑල්ලු කිරීම ගැන නීතිමය පියවර ගැනීම කෙරෙහි සැලකිල්ල දක්වනවා'' යනුවෙන් එහිදී වැඩි දුරටත් අනතුරු අඟැවීය.
පාස්කු ප්‍රහාරය ගැන කිසියම් පාර්ශවයකට යම් අදහසක් තහවුරු කිරීමට හැකියාවක් ඇත්නම් අපරාධ පරීක්ෂණ දෙපාර්තමේන්තුවට පැමිණ කරුණු ඉදිරිපත් කරන ලෙස ද ඔහු ඉල්ලා සිටියේය.
පොලිස් ප්‍රධානියා තම විශේෂ ප්‍රකාශය කළේ පාස්කු ප්‍රහාරය පිළිබඳ විමර්ශනය කිරීමට පත් කරන ලද ජනාධිපති කොමිසම විසින් චෝදනා නගා ඇති ජ්‍යෙෂ්ඨ පොලිස් නිලධාරීන් දෙදෙනෙක් ඊට විරුද්ධව ජනමාධ්‍ය හමුවේ අදහස් දැක්වීමෙන් අනතුරුවය.
'පාස්කු චෝදනා' වලින් බේරා ගන්නැයි දේශබන්දු සහ මුණසිංහ මහ නාහිමියන්ට කියයි
පාස්කු ප්‍රහාරය සිදුවන වකවානුවේ මීගමුව ප්‍රදේශය බාර නියෝජ්‍ය පොලිස්පති ලෙස කටයුතු කළ දේශබන්දු තෙන්නකෝන් ප්‍රහාරය වලක්වා ගැනීමට නිසි මැදිහත්වීමක් සිදු කර නොමැති බවට ජනාධිපති කොමිසමෙන් චෝදනා එල්ලවී තිබෙන අතර එකල බස්නාහිර පළාත බාර ජ්‍යෙෂ්ඨ නියෝජ්‍ය පොලිස්පති ලෙස කටයුතු කළ නන්දන මුණසිංහට නඩු පවරන ලෙස කොමිසම විසින් නිර්දේශ කර ඇත.
තමන් සිංහල බෞද්ධයන් වීම නිසා එම චෝදනා නැගී ඇතැයි පැවසූ නිලධාරීන් දෙදෙනා එයින් ගලවා දෙන ලෙස නාහිමිවරුන් නැමද ඉල්ලා තිබුණි.
දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.
කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.
කාදිනල්ගේ අමනාපය
පාස්කු ඉරුදින ප්‍රහාරයට වගකිවයුත්තන්ට එරෙහිව දැනට ගෙන ඇති නෛතික ක්‍රියාමාර්ග පිළිබඳ සෑහීමකට පත්නොවන බව පවසමින් ජුලි 13 වැනිදා කතෝලික සභාව ලෙස මැල්කම් කාදිනල් රංජිත් හිමියන් ජනාධිපතිවරයාට පිටු 19 කින් යුත් ලිපියක් යොමු කර තිබුනි.
එයට ජනාධිපති නීති අධ්‍යක්ෂ ජනරාල්වරයාගෙන් ලද ප්‍රතිචාරය පිළිබඳව සැහීමකට පත් නොවන බවයි කොළඹ අගරදගුරු කාදිනල් මැල්කම් රංජිත් හිමියන් පවසන්නේ.
අගරදගුරු මැදුරේ අගෝස්තු 13 වැනිදා පැවැති ප්‍රවෘත්ති සාකච්ඡාවකදී කාදිනල් හිමියන් වැඩි දුරටත් පවසා තිබුනේ යුක්තිය ඉටු කරගැනීම සඳහා ජාත්‍යන්තරය හමුවට යාමේ වැඩකටයුතු මේ වන විට අරඹා ඇති බවයි.
තව දින 10කින් ආරම්භ වීමට නියමිත ජිනීවා සමුළුවට පෙර මුණගැසීමට විදේශ අමාත්‍ය ජී ඇල් පීරිස් විසින් කරන ලද ආරාධනයක් ප්‍රතික්ෂේප කරමින් කාදිනල්වරයා පවසා තිබුනේ ජනාධිපති කොමිෂන් සභාවේ වාර්තාවෙන් ඉදිරිපත් කර ඇති නිර්දේශ පළමුව රජය විසින් ක්‍රියාත්මක කළ යුතු බවයි.
පාස්කු ප්‍රහාරයේ විමර්ශන විනිවිදභාවයකින් සිදුවන බවට විශ්වාසයක් තමා තුළ ඇතිවිය යුතු යැයි මැල්කම් රංජිත් කාදිනල් තුමන් අමාත්‍යවරයා වෙත ලිඛිතව දන්වා යවා ඇතැයි කතෝලික සභාවේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමන් ප්‍රකාශ කරයි.
THE LEADER TV
සීනි ගුදම් සංදර්ශනය ආර්ථික අර්බුදය යට කළාද?
වැඩිහිටි ජනතාව කොරෝනා අනතුරට හෙළිම ගැන දත්ත හෙළිවේ
