- ප්‍රසම්පාදන මණ්ඩලයේ අනෙක් හතරදෙනා ගැන අල්ලස් කොමිසම පරීක්ෂණ නොකිරීම ගැන මහාධිකරණ විනිසුරු රශන්ත ගොඩවෙලගෙන් දැඩි ප්‍රශ්න කිරීමක්
විත්තිකරු හමුවී කටඋත්තර හැදූ සාක්ෂිකාරිය සහ ගිවිසුමේ නැති කාලසීමා අර්බුදය මැද අල්ලස් නඩුව පැටලෙයි
වත්මන් රජයේ හිටපු අමාත්‍යවරයෙකු වන කුමාර ජයකොඩි ට එරෙහිව අල්ලස් කොමිසම විසින් පවරා ඇති මහා පරිමාණ දූෂණ නඩුව අද (ජූලි 15) කොළඹ මහාධිකරණය හමුවේ කැඳවූ අවස්ථාවේදී, චෝදනාවලට අදාළ ප්‍රසම්පාදන ක්‍රියාවලියේ සහ සාක්ෂිවල පවතින බරපතළ පරස්පරතා රැසක් විවෘත අධිකරණයේදී අනාවරණය විය.
2014 වසරේ ලංකා පොහොර සමාගමේ ප්‍රසම්පාදන කළමනාකරු ලෙස කටයුතු කරමින්, එහි ගබඩා සංකීර්ණය කාපට් කිරීමේ කොන්ත්‍රාත්තුව "ඩී.එස්. කන්ස්ට්‍රක්ෂන්" නැමැති පෞද්ගලික සමාගමකට පවරා රජයට රුපියල් 8,859,708ක (ලක්ෂ 88ක) පාඩුවක් සිදුකළ බවට ඔහුට චෝදනා එල්ල වී ඇත. නඩුවේ වැඩිදුර සාක්ෂි විභාගය එළඹෙන සැප්තැම්බර් මස 7 වැනිදා දක්වා කල් තැබීමට මහාධිකරණ විනිසුරු රශන්ත ගොඩවෙල නියෝග කළේය.
සාක්ෂි කූඩුවේදී හෙළිවූ තීරණාත්මක කරුණු
අල්ලස් කොමිසමේ නියෝජ්‍ය අධ්‍යක්ෂ ජනරාල් අසිත ඇන්තනි ගේ මෙහෙයවීම මත අද දින සාක්ෂිකරුවන් දෙදෙනෙකු අධිකරණය හමුවේ සාක්ෂි ලබා දුන්නේය.
වැඩක් නෑ - මුදල් ගෙවලා:
ලංකා පොහොර සමාගමේ හිටපු ප්‍රසම්පාදන විධායක නිලධාරිනී දීපිකා ඩයස් ප්‍රකාශ කළේ නිසි ලංසු තේරීමකින් පසු 2014 පෙබරවාරි 18 වැනිදා අදාළ සමාගම සමඟ ගිවිසුම් අත්සන් කර රුපියල් අසූ අට ලක්ෂයකට අධික අත්තිකාරම් මුදලක් ගෙවූ නමුත්, ගබඩාවේ කිසිදු කාපට් ඇතිරීමක් සිදු නොවූ බවයි.
විත්තිකරු හමුවී ප්‍රකාශ වෙනස් කිරීම:
ජනාධිපති නීතිඥ නලින්ද ඉන්දතිස්ස කළ හරස් ප්‍රශ්න කිරීම් හමුවේ සාක්ෂිකාරිය පිළිගත්තේ, සිද්ධිය සම්බන්ධයෙන් පැවති අභ්‍යන්තර පරීක්ෂණයේදී ඇතැම් කරුණු නොදැන සිටීම නිසා තමා වරින් වර විත්තිකාර කුමාර ජයකොඩි හමුවී කරුණු දැනගෙන කටඋත්තර ලබා දුන් බවයි.
සභාපතිගේ අනුමැතිය සහ ඇපකරය සතු කරගැනීම:
සමාගමේ හිටපු මුදල් කළමනාකරු පී. සමරවීර සාක්ෂි දෙමින් කියා සිටියේ විත්තිකරු මෙම මුදල් ගෙවීම නිර්දේශ කළ බවත්, එම නිර්දේශය නොතිබුණේ නම් මුදල් ගෙවීමට ඉඩක් නොලැබෙන බවත්ය. කෙසේ වෙතත්, විත්තියේ හරස් ප්‍රශ්න හමුවේ ඔහු පිළිගත්තේ මෙම මුදල් ගෙවීම අවසාන වශයෙන් අනුමත කර ඇත්තේ ලංකා පොහොර සමාගමේ සභාපතිවරයා බවයි. වැඩ නිම නොකිරීම නිසා පෞද්ගලික සමාගම තැබූ බැංකු ඇපකරය පොහොර සමාගම සතු කරගත් බවද ඔහු පැවසීය.
අල්ලස් කොමිසම කොටු කළ විනිසුරුගේ ප්‍රශ්න වැල
නඩු විභාගය අතරතුරදී මහාධිකරණ විනිසුරු රශන්ත ගොඩවෙල විසින් අල්ලස් කොමිසමේ විමර්ශනවල පවතින අඩුපාඩු කිහිපයක් සෘජුවම ප්‍රශ්න කළේය.
අනෙක් සාමාජිකයන් නිදහස් කළේ ඇයි?:
අදාළ කොන්ත්‍රාත්කරු තේරූ ප්‍රසම්පාදන කමිටුවේ විත්තිකරුට අමතරව තවත් සාමාජිකයන් සිව්දෙනෙකු සිටියදී, ඔවුන්ට එරෙහිව පරීක්ෂණ නොකළේ මන්දැයි විනිසුරුවරයා විමසීය. සෙසු සාමාජිකයන් සහය දීම පමණක් කළ බව අල්ලස් කොමිසම පැවසුවද එය අධිකරණයේ දැඩි අවධානයට ලක් විය.
ගිවිසුමේ කාලසීමාවක් නෑ:
කොන්ත්‍රාත්තුවට අදාළ මුල් ගිවිසුම් පිටපත පරීක්ෂා කළ විනිසුරුවරයා පෙන්වා දුන්නේ, කාපට් ඇතිරීමේ කටයුතු අවසන් කළ යුතු කාලසීමාව හෝ අත්තිකාරම් මුදල් ගෙවීම් පිළිබඳ කිසිදු සඳහනක් එම ගිවිසුමේ නොමැති බවයි. චෝදනා ඔප්පු කිරීමට නම් කාලසීමාව අතිශය තීරණාත්මක බැවින් ඒ පිළිබඳව වහාම සොයා බලන ලෙස විනිසුරුවරයා අල්ලස් කොමිසමට නියෝග කළේය.
ලබන සැප්තැම්බර් 7 වැනිදා නඩුවේ වැඩිදුර සාක්ෂි දීම සඳහා තවත් සාක්ෂිකරුවන් දෙදෙනෙකුට අධිකරණයේ පෙනී සිටින ලෙස දන්වා සිතාසි නිකුත් කෙරිණි.
