එහෙයින් උන්වහන්සේ පිළිගැනීම සඳහා අද (23) සවස විශේෂ උත්සවයක් සංවිධානය කර නොමැති බව දිලන්ත විතානගේ මහතා 'ද ලීඩර්' වෙත පැවසිය.
සිරදඬුවම් විඳින ගලගොඩ අත්තේ ඥාණසාර හිමියන්ට ජනාධිපති සමාව ලබාදීමේ ලිපියට ජනාධිපති මෛත්‍රීපාල සිරිසේන මහතා විසින් ඊයේ (22) පස්වරුවේ අත්සන් තබා ඇති බවත් ඒ අනුව අද (23) පස්වරු 3.00 උන්වහන්සේ බන්ධනාගාරයෙන් රැගෙන යාමට සියලු කටයුතු සූදානම් කර ඇති බවත් එම සංවිධානයේ ජාතික සංවිධායක විතාරන්දෙනියේ නන්ද හිමියෝ මාධ්‍ය වෙත පවසා තිබිණ.
ඒ අනුව අද දිනයේ විශාල පිරිසක් උන්වහන්සේ පිළිගැනීම සඳහා බන්ධනාගාරය අසලට රැස්වීමට නියමිතව තිබිණ.
ඥානසාර හිමිට ජනාධිපති සමාව ලබා දී නිදහස් කරන ලෙස සිය අමාත්‍යංශයට නිල වශයෙන් දන්වා නොමැති බව අධිකරණ අමාත්‍යංශයේ ප්‍රකාශකයෙක් 'ද ලීඩර්' කළ විමසීමක දී පැවසීය.
බන්ධනාගාරයෙන් වාර්තාවක් කැඳවයි !
මේ අතර ජනාධිපති කාර්යාල ආරංචිමාර්ග පවසන්නේ, උන්වහන්සේට නිදහස ලබා දීමේ මූලික අදියර යටතේ ජනාධිපති ලේකම්වරයා විසින් පෙරේදා (21) බන්ධනාගාර මූලස්ථානයෙන් වාර්තාවක්ද කැඳවා තිබු බවයි.
ඉකුත් 18 වැනිදා වෙසක් පෝදා සිරකරුවන් 762කට වැලිකඩ බන්ධනාගාරයේදී ජනාධිපති පොදු සමාව ලබා දීමේ අවස්ථාවට සහභාගී වූ ජනාධිපතිවරයා ඉන් අනතුරුව වැලිකඩ බන්ධනාගාර රෝහල වෙත ගොස් ඥානසාර හිමි හමුවී විනාඩි 45 කට ආසන්න කාලයක් සුහද පිළිසඳරක යෙදී තිබුණි.
අධිකරණයට අපහාස කළ බවට එල්ල වූ චෝදනා හතරකට 2018 අගෝස්තු 08 වෙනිදා වරදකරු කෙරුණු බොදුබල සේනා සංවිධානයේ මහ ලේකම් ගලගොඩඅත්තේ ඥානසාර හිමිට වසර 19 ක සිරදඬුවමක් නියම කළ අභියාචනාධිකරණය එකී දඬුවම වසර 6 කින් ගෙවී යන සේ දඬුවම් නියම කළේය.
ජනාධිපති සමාව අභියෝගයට !
එසේ අධිකරණයට අපහස කිරීමේ චෝදනාව මත සිර දඬුවම් ලබන ඥානසාර හිමියන්ට ජනාධිපති සමාව ප්‍රධානය නොකරන්නැයි අධිකරණ ඇමතිනි නීතිඥ තලතා අතුකෝරල මහත්මිය මෙන්ම ජ්‍යෙෂ්ඨ නීතිඥයින් කිහිප දෙනෙකු ම ජනාධිපති මෛත්‍රීපාල සිරිසේන මහතා ගෙන් ඉල්ලීමක් කර ඇති අතර ජනාධිපතිවරයා එකී විරෝධතා නොසලකා කටයුතු කළහොත් ඒ සම්බන්ධයෙන් අධිකරණ ක්‍රියාමාර්ගයක් ගැනීමට ජ්‍යෙෂ්ඨ නීතිඥයින් පිරිසක් ඊයේ පස්වරුවේ සාකච්ජා පවත්වා තිබිණ.
කෙසේවුවද බොදු බල සේනා සංවිධානය පවසන්නේ ඥානසාර හිමියන් අධිකරණයට අපහස කිරීමක් නොකළ බවයි.
ඥානසාර හිමි අධිකරණයට අපහාස කලේ නැතැයි ජනාධිපති නීතිඥ ටිරන්ත වරලියද්ද මහතා විසින් මාධ්‍ය හමුවකදී කළ ප්‍රකාශයක් හා හෝමාගම අධිකරණයේදී ඥානසාර හිමි සහ විනිසුරු අතර සිදුවූ කතා බහ අඩංගු වීඩියෝවක් එම සංවිධානය විසින් මේවනවිට සමාජ මාධ්‍ය වෙත මුදාහැර ඇත.
සබැඳි පුවත් :
"ඥානසාර හිමිට ජනාධිපති සමාව" වාර්තා ඇත්තක්ද?
සතියක් තුලදී ඥාණසාර හිමියන් නිදහස් !