හඬ පෞරුෂයෙන් සලකුණු තබමින් ටෙලි, රිදී තිරයේ හෝ වේදිකාවේ රඟපාන්නට හැකි වීම යනු නළුවෙකුට බෙහෙවින් අල්පව පිහිටන
කුසලතාවකි. හේමසිරි ලියනගේ යනු රංගනයෙන් මෙන්ම රංගනය නොබලන අයකුට සිය හඬ පෞරුෂයෙන්ද මතකයේ තබා ගැනීමට කුසලතා දැක්වූ, ජනතාවගේ හද බැඳගත් චරිතාංග රංගන ශිල්පියකු වේ.
නාට්‍යකරුවෙකු ලෙස වේදිකා නාට්‍ය කලාවට අවතීර්ණ වෙමින් කලාවේ ආරම්භය සනිටුහන් කළ ඔහු ටෙලි, රිදී තිරවලද රංගනයට දායක වෙමින් චරිතාංග නළුවෙකු හැටියට කළ සේවයේ විශාලත්වය වදනින් කියා, ලියා නිම කළ හැක්කක් නොවන්නේය. නමුත්, ඒ වෙනුවෙන් ඇගයුමක් අවැසිම මොහොතක එළඹෙන දෙසැම්බර් 16 වැනිදා දශක හයකට වැඩි කාලයක් සිහිපත් කරමින් 'හේමාවලෝකන' උපහාර දැක්වීමේ උත්සවය පැවැත්වීමට කටයුතු මේ වන විට යෙදී ඇත.
කොළඹ ජාතික චිත්‍රපට සංස්ථාවේ තරංගනී සිනමා ශාලාවේදී සවස 05ට පැවැත්වෙන උලෙළේදී හේමසිරි ලියනගේ විසින් රංගන දායකත්වය දක්වනු ලැබූ චිත්‍රපට තුනක් හේමසිරි ලියනගේ ප්‍රත්‍යාවලෝකනය වැඩසටහනද සමගින් ප්‍රදර්ශනය කිරීමට නියමිතය.
1965දී සුදු ඇතා, 1970 චූලෝදර මහෝදර සහ 1975 නරියා සහ කේජු යන නාට්‍ය නිර්මාණය කළ ඔහුගේ නාට්‍ය පිටපත් එදින එක් කෘතියක් වශයෙන්ද එළිදැක්වීමට නියමිතය. නළුවෙකු වීමට ප්‍රථමව නාට්‍ය නිර්මාණකරුවෙකු ලෙස සිය කෞෂල්‍යය ප්‍රගුණ කළ හේමසිරි ලියනගේ එම ගමන වෙනස් වන්නේ සිය නාට්‍යකරණය තුළ වූ දේශපාලනික ආකල්ප සමග වන සක්‍රීයභාවය හේතුවෙනි. 1980දී කළ වැඩවැරුමකට සක්‍රීයව දායක වීම හේතුවෙන් වැඩ තහනමට ලක් වීමෙන් අනතුරුවය හේමසිරි ලියනගේ නම් නළු පෞරුෂය අපට මුණගැසෙන්නේ. උද්ගත වූ තත්ත්වය උඩ නාට්‍යකරුවෙකුට වඩා චරිතාංග නළුවෙකු ලෙස හේමසිරි ලියනගේ ජනතාවට දැකීමේ අවස්ථාව උදාවන්නේ එසේය.
අඹ යහළුවෝ, අසල්වැසියෝ, තට්ටු ගෙවල් වැනි නාට්‍යවල රඟපෑ චරිත බොහොමයක් මෙන්ම 'අයි නෝ ද ප්ලේස් ඕල්සෝ පුතා' යන වැකිය සමග දායකත්වය දැක්වූ වෙළඳ දැන්වීමද එවකට රසික මතකයෙන් නොගිලිහෙන අවස්ථා අතර වේ.
සංසාරණ්‍යයේ දඩයක්කාරයා, සප්ත කන්‍යා, මධුර චාරිකා, සුළඟ එනු පිණිස වැනි සිනමා නිර්මාණ ඔස්සේද ඔහු කළ රඟපෑම්ද මතකයෙන් ගිලිහෙන ඒවා නොවේ.
'හේමාවලෝකන' උපහාර උලෙළ පැවැත්වෙන දින උදයකාන්ත වර්ණසූරියගේ මධුර චාරිකා පෙරවරු 10.30ට, ප්‍රසන්න ජයකොඩිගේ සංසාරණ්‍යයේ දඩයක්කාරයා පස්වරු 1.30ට, අශෝක හඳගමගේ චන්ද කින්නරී සවස 7.00ට (උලෙළෙන් අනතුරුව) ප්‍රදර්ශනය කෙරේ.
හේමසිරි ලියනගේ නමින් 1942 දෙසැම්බර් 25 උපන් මෙම කලාකරුවා හොරණ විද්‍යාරතන විද්‍යාලයෙන් පාසල් අධ්‍යාපනය සම්පූර්ණ කර කැලණිය විශ්වවිද්‍යාලයේ උපාධිය සම්පූර්ණ කර ගුරු වෘත්තීය නියැළුනද කලාවට, දේශපාලනයේ බල ලෝභීකම ප්‍රකාශ කිරීමට ඇති ඇල්ම හේතුවෙන්ම සිය ජීවිතයට අභියෝග ළං කරගත් කලාකරුවෙකි.
කෙසේවුවද, ඒ සිදු වූ දේ මත සැමගේ මතකයේ රැඳෙන නළුවෙකු වීමට ඔහුගේ මග විවර වී තිබුණ අතර 'හේමාවලෝකන' දෙසැම්බර් 16 වැනිදා සවස 05ට පැවැත්වෙන්නේද එම අතීත මතක මතය. 
-ශිවන්ති ප්‍රනාන්දු
සබැඳි පුවත් :
'හේමාවලෝකන' : හේමසිරි ලියනගේ ප්‍රත්‍යාවලෝකනය දෙසැ: 16 තරංගනීයේ දී
