විකිණීම යනු ලෝකයේ පහල වුනු උදාරතම සංකල්ප වලින් එකකි.
මිනිසාගේ නිදහස පිණිස වඩාත්ම ඉවහල් වූ ක්‍රමයකි. එය ලංකාවේ බොහෝ දෙනාට පාපී සංකල්පයක් ලෙස වැටහීමක් තිබේ. ඊට හේතුව ඒ බොහෝ දෙනා පූර්ව ධනේශ්වර මානසිකත්වයන්වල වාසය කරන නිසයි.
ලංකාවෙ බොහෝ ප්‍රශ්නවලට මුල මේ පූර්ව ධනේශ්වර චින්තනය යැයි කිව හැකිය. බොහෝ දෙනෙක් විකිණීම යැයි සිතන්නේ යමක් විකුණා මුදල් ලබා ගැනීම ඍජු ක්‍රියාවලියයි. එය විකිණීමේ ප්‍රාථමිකම ක්‍රියාවකි. අපි නිරන්තරයෙන් යමක් විකුණමින් සහ යමකට විකිනෙමින් සිටින බව අව‍බෝධ වීම නූතන සමාජයේ පුරවැසියෙකුට අවශ්‍යය. සවිඥානක ජීවිතයක් වන්නේ එයයි. විකිණීමට එරෙහි වෙන කෙනෙක් එතැනදී ද තමන් විකිනෙන බව දන්නේ නැත. ඒ අය අසරණය.
බුදුන් වීදි සංචාරය කරමින් තමන්ගේ අදහස් විකිනුවා යැයි කිව හැක. එයින් බුදුන් මුදල් ඉපැයූවේ නැත. සංඝ සමාජයක් සහ උපාසක සමාජයක් උපයා ගත්සේක. එයින් ඒ අදහස් buy කරන අයට ද විශාල සහනයක්, සැනසීමක් ලැබුනි. බෞද්ධ සමාජය ඇතිවන්නේ බුදුන්ගේ අදහස් ප්‍රචාරය මගිනුයි. අදහස් ප්‍රචාරය යනු විකිනීමකි. එයට ප්‍රොපගැන්ඩා යනුවෙන් වචනයක් යෙදෙයි.
ඕනෑම දෙයක් විකිනීම නරක නැත. මත්ද්‍රව්‍ය පවා විකිනීමට අවසර දිය යුතුය. ඒ අවසරය නොදී පවතින්නේ සෞඛ්‍ය නැමැති සංකල්පය විකිනීම හරහාය. සෞඛ්‍යමය අදහස් වෙළඳපොල අධිකාරියක් විසින් මත්ද්‍රව්‍ය නැමැති නිෂ්පාදනය විකිනීම බාධා කරයි. නමුත් තමන්ට අවශ්‍ය දේ මිළට ගැනීම පාරිභෝගිකයාගේ අයිතියකි. කිසිම අධිකාරියකින් එය බාධා කිරීම වරදකි. මත්ද්‍රව්‍ය විරෝධී සහ මත්ද්‍රව්‍ය පක්ෂපාතී අදහස් නිදහස් අදහස් වෙළඳපොලක තරගවැදිය යුතුය. නොඑසේ නම් lsd, magic mushroom, mdma වැනි අද බොහෝ මානසික ව්‍යාධීන් පිණිස යොදාගන්නා මත්ද්‍රව්‍යයන් අපට අහිමි වනු ඇත.
විකිනීම නරක වන්නේ ඒ විකිනීමෙන් යම් පාර්ශ්වයකට අගතියක් වන්නේ නම් පමණි. දෙපාර්ශ්වයටම ලාභයක් වන විකිණීම උත්තරීතරය. එය සමාජයට යහපතක් කරයි. උදාහරණයක් හැටියට කෙනෙක් නතාෂාගේ සිදුවීම ගතහොත් කස්සප හිමියන් විසින් නතාෂාගේ කලාකාමී ප්‍රහසන නිෂ්පාදනය විකිනීමට බාධා කරයි. නීතියේ අධිකාරීන් භාවිතා කරමින් ඇයව සිරගත කරයි. එය අදහස් ප්‍රකාශනයේ නිදහස උල්ලංඝනය කිරීමේ වරදක් හැටියෙන් ලෝකය පිළිගෙන තිබේ. එමගින් සමාජයට සිදුවන්නේ අවැඩකි.
කස්සප හිමි සිවුරක් හැඳගෙන කරනුයේ ආගමක් විකිනීමකි. එයා ආගමක නියෝජිතයෙකි. එයාගේ ආගම විසින් කලාව විශ්වාස කරන අයගේ ආගම බාධා කර තිබේ. අනතුරුව දෙරණ හිරු වැනි නාලිකා මේ පුවත විකුණන්න පටන් ගනී. එය ජාතිභේද ආගම්භේද ඇති කරන ආකාරයෙන් ප්‍රවර්ධනය කරයි. ඒ විකිණීම සමාජයට අයහපත් විකිනීමක් වෙයි. එමගින් සමාජයේ බෙදීම් සහ ගැටීම් නිර්මාණය කරයි. සියල්ලන්ගේ අදහස් පැවතීමට හැකි සමාජයක් පිළිබඳ සංකල්ප විකිනීමයි සමාජයකට යහපත් වන්නේ.
නතාෂා වෙනුවෙන් පෙනී සිටින අය නතාෂාව විකුණයි, ඇය වීරවරියක් බවට පත්කරයි, යනුවෙන් චෝදනා නැගෙයි. එය යහපත් විකිනීමකි. භාෂාණයේ අයිතිය පිළිබඳ සංකල්පය විකිනීමකි. නිදහස පිළිබඳ සංකල්ප විකිනීමකි. ගැහැණියකගේ ස්වාධීනත්වය පිළිබඳ සංකල්ප විකිනීමකි. ICCPR නැමැති පණත අවභාවිතාවේ යෙදීමට එරෙහි විකිනීමකි. එමගින් සියල්ලන්ට සිදුවන්නේ යහපතකි. එය සමාජයේ සංස්කෘතික දියුණුවට බලපාන විකිනීමකි. අන්තගාමී අගතිගාමී අදහස් සහ අධිකාරීන්ට එරෙහි විකිනීමකි.
විකිනීම නැතහොත් selling යන දියුණු මිනිස් චර්යාවට සහයෝගය දැක්විය යුතුය. විකිනීම බාධා කිරීම යනු වැඩවසම් යුගයක් නිර්මාණය කිරීමයි. අධිපතීන්ගේ අදහස් බලහත්කාරයෙන් පැටවීමේ යුගයක් ඇති කිරීමයි. සියල්ලෝ යහපත් විකුණන්නෝ වෙත්වා.
(චින්තන ධර්මදාස)
දේශපාලන හා සමාජ විශ්ලේෂක
අධ්‍යක්ෂ - facultyofsex
(උපුටා ගැනීම -අනිද්දා පත්තරේ කල්ට් අතිරේකය)
