ජපානය මේ චමත්කාරජනක ජයග්‍රහණය වාර්තා කළේ බ්‍රසීලය සමග අඟහරුවාදා ටෝකියෝ නුවර පැවති මිත්‍ර තරගයකදී. මෙය උත්සාහයන් 14කට පසුව ජපානය ලෝක පාපන්දු කුසලානය පස් වතාවක් දිනූ බ්‍රසීලය ට එරෙහිව ලබා ගත් පළමු ජයක්.
ජාතික ක්‍රීඩාංගණයේ රොක්ව සිටි 45,000කට ආසන්න නරඹන්නන්ගේ මහත් ඝෝෂාව මධ්‍යයේ හජිමි මොරියාසුගේ කණ්ඩායම තරගයේ විවේක කාලය වන විට තිබූ ගෝල් 0-2 පාඩුව පෙරළා දැමුවේ කාලෝ ඇන්සිලොට්ටිගේ බ්‍රසීල කණ්ඩායම තුළ තිගැස්මක් ඇති කරමින්.
ජයග්‍රහණයෙන් ක්‍රීඩා මණ්ඩපය උත්සව සිරියෙන් පිරී තිබුණ ද, පරෙස්සම් වන ලෙසට තම කණ්ඩායමට දැන්වීමට මොරියාසු වැඩි වේලාවක් ගත්තේ නැහැ.
“මේ ප්‍රතිඵලය ක්‍රීඩකයන් සමරනවා දකින්න මට උවමනායි. නමුත් මෙතැන් සිට ලොව ශක්තිමත් කණ්ඩායම් අපි ගැන වැඩි අවධානයක් යොමු කරාවි” යනුවෙන් ඔහු කියා සිටියා. “බ්‍රසීලය වැනි ඉහළම පෙලේ කණ්ඩායම් නිල තරගවලදී පරාජය කිරීමට දියුණුව සහ පරෙස්සම අවශ්‍යයි. අද ලැබුනු ප්‍රතිඵලය මත විශ්වාසය ගොඩනගා ගන්නා ලෙස මම ක්‍රීඩකයන්ට කියනවා.”
ලෝක කුසලාන පාපන්දු තරගාවලියක කණ්ඩායම් 16 දෙනාගේ වටයෙන් ඉදිරියට කවරවිටකවත් ගොස් නැති ජපානය 2026 වසරේදී අමෙරිකාව, කැනඩාව හා මෙක්සිකෝවේ පැවැත්වෙන තරගාවලියේදී වඩාත් හොඳ ප්‍රගතියක් පෙන්නුම් කිරීමේ අධිෂ්ඨානයෙන් පසුවනවා.
2022 ලෝක කුසලානයේ මූලික වටයේදී ජර්මනිය හා ස්පාඤ්ඤය පරාජය කළ ජපානය බ්‍රසීලය පරදවා ලබා ගත් මේ ජයග්‍රහණය ඔවුන්ගේ ජාත්‍යන්තර පාපන්දු ක්‍රීඩාව තව දුරටත් වර්ධනය වන බවට ලෝකයට කළ තවත් ප්‍රකාශනයක්.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
