වමතින් පිත්ත හසුරුවන සූර්යවන්ශි මෙවර IPL ක්‍රීඩා වාරයේ කැපී පෙනුනු පිතිකරුවා බවට පත්වුනේ ඉනිම 16කදී ලකුණු 776ක් රැස් කරමින්. එහි ප්‍රහාරාත්මක වේගය 237.31ක්.
සූර්යවන්ශිගේ රාජස්තාන් රෝයල්ස් කණ්ඩායම අවසාන තරගයට පිවිසියේ නැතත් ඔහු 2026 තරගාවලියේ වඩාත්ම වටිනා ක්‍රීඩකයා ලෙස නම් කෙරුණා.
මේ නව යොවුන් වියැත්තා නැගී එන ක්‍රීඩකයාගේ සම්මානය මෙන්ම තරගාවලියේ වැඩිම ලකුණු ලාභියාට පිරිනැමෙන තැඹිලි වර්ණ කැප් තොප්පිය ද හිමිකර ගත්තා.
සූර්යවන්ශි දිනා ගත් ත්‍යාග අතරේ ඉන්දියාවේ ජනප්‍රිය මධ්‍යම ප්‍රමාණයේ SUV වර්ගයේ Tata Sierra කාරයක් ද තිබුනත් ඔහුට එහි රියැදුරු අසුනේ ඉඳගැනීමට තවමත් අවසර නැත්තේ ඉන්දියාවේ වාහන පැදවීමේ අවම වයස 18ක් වන බැවින්.
මෝටර් රථයට අමතරව වයිභාව් සූර්යවන්ශි ට හිමි වූ සම්පූර්ණ තනි ත්‍යාග මුදල ඉන්දියානු රුපියල් ලක්ෂ 55ක්.
පසුගිය වසරේ වයස 14ක්ව සිටියදී රාජස්තාන් රෝයල්ස් කණ්ඩායම වෙනුවෙන් සිය මංගල තරගයට ක්‍රීඩා කරමින් IPL තරගාවලියක පෙනී සිටි ළාබාලතම ක්‍රීඩකයා බවට පත්වූ සූර්යවන්ශි මේ වසරේ ඔහුගේ අවසාන ඉනිම දෙකේදී ලකුණු 97ක් හා 96ක් වාර්තා කළා.
ඉනිමකට හතරකට වැඩියෙන් වන සාමාන්‍යයකින් යුතුව ඔහු හයේ පහර 72ක් එල්ල කළේ තරගාවලියේ ඊළඟට හොඳම හයේ පහර සංඛ්‍යාවට වඩා 29ක් ඉදිරියෙන් සිටිමින්.
රාජස්තාන් කණ්ඩායම පසුගිය වසරේ ක්‍රීඩක වෙන්දේසියේදී සූර්යවන්ශි මිලදී ගත්තේ රුපියල් කෝටි 1.1ක මුදලකට.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
