මෙරට ක්‍රිකට් ක්‍රීඩාව සම්බන්ධයෙන් ක්‍රීඩා අමාත්‍ය රොෂාන් රණසිංහ විසින් පත්කරනු ලැබූ ත්‍රී පුද්ගල සම්බන්ධීකරණ කමිටුවක් ජාත්‍යන්තර ක්‍රිකට් කවුන්සිලය (ICC) විසින් ප්‍රතික්ෂේප කර ඇතැයි වාර්තාවේ.
ශ්‍රී ලංකාවේ ක්‍රිකට් සංවර්ධනය, ස්වාධීනත්වය සහ විනිවිඳභාවය ආරක්ෂා කිරීම සඳහා ජාත්‍යන්තර සහ ජාතික ක්‍රිකට් කවුන්සිල අධීක්ෂණය, සන්නිවේදනය සහ සම්බන්ධීකරණය කිරීම එම කමිටුවේ මුලික කාර්යභාරය ලෙස සඳහන් වේ.
ඇමතිවරයා විසින් මෙම කමිටුව නම් කර පසුගිය සැප්තැම්බර 26 වෙනිදා එබව ජාත්‍යන්තර ක්‍රිකට් කවුන්සිලය වෙත දැනුම්දී තිබිණ.
හිටපු ටෙස්ට් ක්‍රිකට් ක්‍රීඩක, ක්‍රිකට් අතුරු කමිටු සභාපතිවරයෙකු වූ සිදත් වෙත්තමුණි, හිටපු ක්‍රිකට් සභාපතිවරයෙකු වන උපාලි ධර්මදාස සහ අමාත්‍ය විජේදාස රාජපක්ෂගේ පුත්‍රයකු වන නීතිඥ රඛිත රාජපක්ෂ එසේ නම්කරන ලද කමිටු සාමාජිකයින්ය. 
කෙසේවුවද වහාම ඊට ප්‍රතිචාර දක්වා ඇති ජාත්‍යන්තර ක්‍රිකට් කවුන්සිලය ශ්‍රී ලංකාව සම්බන්ධයෙන් කටයුතු කරන්නේ ශ්‍රී ලංකා ක්‍රිකට් ආයතනය සමග පමණක් බව සැප්තැම්බර් 28 දා ඇමතිවරයා වෙත නිල වශයෙන් දැනුම් දී තිබේ. 
