ළමුන් ඇතුළු ශ්‍රී ලාංකිකයන් විසි දෙනකු නාවික හමුදාව අත්අඩංගුවට ගෙන තිබේ.
ශ්‍රී ලංකා නාවික හමුදාව පවසන්නේ සිලාවතුර, කොන්ඩච්චිකුඩා ප්‍රදේශයේ අප්‍රේල් 06 වන දින සිදුකළ විශේෂ සෝදිසි මෙහෙයුමකදී නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සාහ කළ බවට සැකකෙරෙන පුද්ගලයන් විසි දෙනකු නාවික හමුදා භාරයට ගත් බවයි.
වයඹ නාවික විධානය මඟින් සිලාවතුර, කොන්ඩච්චිකුඩා ප්‍රදේශයේ විශේෂ මාර්ග බාධකයක් යොදා සිදු කළ මෙම විශේෂ සෝදිසි මෙහෙයුමේදී සැකකටයුතු ත්‍රීරෝද රථ හතරක් ද පරීක්‍ෂාවට ලක් කර ඇත.
එහිදී සිදු කළ වැඩිදුර පරීක්‍ෂාවේදී එම ත්‍රීරෝද රථ තුළ ගමන්ගත් පුද්ගලයන් විසි දෙනෙක් නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීම සඳහා මෙලෙස ත්‍රීරෝද රථ මඟින් සිලාවතුර මුහුදු ප්‍රදේශය වෙත ගමන් කරමින් සිටි බවට අනාවරණය වූ බැවින්, එම පුද්ගලයන් පිරිස සහ ත්‍රීරෝද රථ හතර නාවික හමුදා භාරයට ගැනීමට කටයුතු කළ බව ශ්‍රී ලංකා නාවික හමුදාව වැඩි දුරටත් සඳහන් කරයි.
නාවික හමුදා භාරයට ගත් පුද්ගලයන් විසි දෙනා අතර පිරිමින් 14ක්, කාන්තාවන් 04 ක්, වයස අවුරුදු 13 ක ගැහැණු ළමයෙකු සහ වයස අවුරුදු 16 ක පිරිමි ළමයකු ද වේ.
මෙම පිරිසෙන් පුද්ගලයන් නම දෙනෙක් මුලතිව් ප්‍රදේශයේද, හතර දෙනෙකු යාපනය ප්‍රදේශයේද, තවත් හතර දෙනෙකු මන්නාරම ප්‍රදේශයේද වන අතර වාලච්චේන, වත්තල සහ පුත්තලම යන ප්‍රදේශවලින් එක් පුද්ගලයෙක් බැගින් හදුනාගෙන ඇත.
නීති විරෝධී මිනිස් ජාවාරමට සම්බන්ධ පුද්ගලයකුද මෙම පිරිස අතර සිටින බවට නාවික හමුදාව සැක කරයි.
නාවික හමුදා භාරයට ගත් පුද්ගලයන් සියලු දෙනා සහ ඔවුන් පැමිණි ත්‍රීරෝද රථ හතර ඉදිරි නීතිමය කටයුතු සඳහා සිලාවතුර පොලිස් ස්ථානය වෙත භාර දී තිබේ.
2021 මාර්තු 11 වන දිනද අනවසරයෙන් මුහුදු මගින් විදෙස් රටකට සංක්‍රමණය වීමට උත්සාහ කළ බවට සැකකෙරෙන පිරිසක් නාවික හමුදා භාරයට ගෙන තිබුනි.
(සේයා - ශ්‍රී ලංකා නාවික හමුදාව)
THE LEADER TV
රට කෑ කැරොලයින් නාඩගමේ තිරයෙන් පිටුපස කතාව!
දොලවත්ත කියන්නේ වහ කන කතාවක්නේ 'ස'