ඒ, 19 වැනි ආසියානු ක්‍රීඩා උළෙලේ මීටර 400 මිශ්‍ර සහය ධාවන ඉසව්වේ අවසන් තරගයට එක් වූ ශ්‍රී ලංකා කණ්ඩායම නීති උල්ලංඝණය කිරීමේ වරදට තරගයෙන් ඉවත් කිරීම හේතුවෙනි.
ආසියානු ක්‍රීඩා උළෙලේ මීටර 400 මිශ්‍ර සහය ධාවන ඉසව්වේ අවසන් තරගය චීනයේ හංග්ජොව්හිදී ඊයේ (02) පැවැත්වුණු අතර එහිදී මිනිත්තු 3යි තත්තර 14යි දශම 2යි 5ක කාලයක් සටහන් කළ ශ්‍රී ලංකාව තරගය අවසන් කළේ දෙවැන්නා ලෙසය.
කෙසේ නමුත්, ධාවන තීරු නීති උල්ලංඝණය කිරීමේ වරදට ශ්‍රී ලංකාව තරගයෙන් ඉවත් කළ බව ක්‍රීඩා උළෙලේ නිල වෙබ් අඩවිය පසුව ප්‍රකාශ කළේ ය.
තරගය සඳහා ශ්‍රී ලංකා කණ්ඩායම නියෝජනය කළේ කාලිංග කුමාරගේ, අරුණ දර්ශන, නදීෂා රාමනායක සහ තරුෂි කරුණාරත්න යි.
ඒ අනුව බහරේනයට රන් පදක්කම හිමි වූ අතර, පිළිවෙලින් ඉන්දියාව සහ කසක්ස්ථානය රිදී සහ ලෝකඩ පදක්කම් දිනා ගැනීමට සමත් විය.
මෙම අවාසනාවන්ත තත්ත්වය ශ්‍රී ලංකා මලල ක්‍රීඩා ආයතනයේ ප්‍රධාන ලේකම් සමන් කුමාර ගුණවර්ධන විග්‍රහ කර තිබුණේ මෙසේය.
“අරුණ දර්ශන තම ධාවන පථයේ පැමිණ නදීෂා රාමනායක වෙත යෂ්ඨිය ලබාදෙන අවස්ථාවේදී අරුණගේ එක් පාදයක් අදාළ ධාවන පථයෙන් ඇතුළත පිහිටි ධාවන පථයට පිවිසීම හේතුවෙන් ශ්‍රී ලංකා කණ්ඩායම තරගයෙන් අවලංගු කළේය.”
මේ අතර, ශ්‍රී ලංකා ක්‍රීඩිකා ලක්ෂිණි සාරා සිල්වා අද දුර පැනීම (කාන්තා) ඉසව්වෙන් මීටර් 6.14කට 6 වැනි ස්ථානය ලැබුවාය. එහි රන් පදක්කම චීන ක්‍රීඩිකා සිකී සිඔන්ග් මීටර් 6.73කට දිනා ගත්තාය. ලක්ෂ්ණිගේ මෙහි හොඳම මෙතෙක් දක්ෂතාව මීටර් 6.38කි.
