ඊයේ පැවති එංගලන්ත - ශ්‍රී ලංකා එක්දින තරඟයේදී සිදුවූ අඩිල් රෂීඩ්ගේ දුවද්දී දැවීයාම ක්‍රිකට් ක්‍රීඩාවේ ජීවගුණයට සිදුවෙච්චි හානියක් හැටියට ෆොක්ස් ස්පෝර්ට් නාලිකාව වගේම තවත් නාලිකා ගණනාවක් කතා කරලා තිබ්බ. ඔස්ට්‍රේලියනු ෆෑන් පේජ් එකකත් ඒක කතා කරලා තිබ්බ.
ගොඩක් බටහිර නාලිකා නම් කතා කරලා තිබ්බේ රෂීඩ්ගේ මොළේ මැරිලා තිබීම ගැන. ඒ කියන්නේ තරඟයේ ඉතාම තීරණාත්මක මොහොතක එහෙම අනික් පිළට වාසියක් වෙන විදියට හැසිරීම විවේචනය කරලා. ඒක ඇත්ත. සම්පුර්ණයෙන්ම වරද තියෙන්නේ රෂීඩ් අතේ.
සුදු අධිරාජ්‍යයෙන් පටන් අරගෙන හිරු නොබසින තරම් තවත් රාජ්‍යයන් ගණනාවක් කරා පරිණාමය වෙමින් ඉතාම විශාල කාලයක් සහ අවකාශයක් හරහා වර්ධනය වෙච්ච ක්‍රිකට් ක්‍රීඩාව අද ''සුද්දගේ ක්‍රීඩාවෙන්'' ගොඩක්ම ඈතට ගිහිල්ල. ඒ අතරේ ඒක මහත්වරුන්ගේ ක්‍රීඩාවක් කියන තැනින් ඉතාම තරඟකාරී සහ වාණිජමය ක්‍රීඩාවක් වෙතට රූපාන්තරණය වෙලා. අද තියන වේගවත් බවම ඒකට උදාහරණයක්.
ඒත් තවමත් තැනින් තැන ඉතාම කලාතුරකින් වගේ ඔය ''මහත්වරුන්ගේ ක්‍රිකට්'' කියන කෑල්ල එළියට එන වෙලාවල් තියනවා. අපිම දවසක් ශිවනරින් චන්ද්‍රපෝල්ට එහෙම අවස්ථාවක් දෙනවා. ඒ පන්දු යවන අන්තයෙන්. හිටියේ වාස්. ඔයාල ඔක්කොටම මතක ඇති. පන්දු යවන අන්තයේ ෆිඩෙල් එඩ්වඩ්. ඒ කියන්නේ අන්තිම විකට් එක. වෙස්ට් ඉන්ඩීස්ලට දිනන්න ඕනි වෙලා තිබ්බේ ලකුණු දොළහයි. ඒ බෝල් හතකට.
වාස් දැක්ක ෆිඩෙල් ක්‍රීස් එකෙන් එළියට එනවා. හැබැයි බේල්ස් ඉවත් කරන්නේ නැතුව නිකම්ම ෆලෝ ත්රූ එකට යනවා. ඒ බෝලේ දැම්මෙත් නැහැ.
හැබැයි ඊළඟ බෝල් දෙකට හතරයි, හයයි. අපි මැච් එක පැරදි.
ඒ උනාට මේ සිද්දිය ගැන අදටත් ලෝකේ කතා වෙන්නේ තරඟය දිනීම පැරදීමට වඩා 'ක්‍රිකට්වල ජීවගුණය' (the spirit of cricket) පවත්වා ගත්ත අවස්ථාවක් හැටියට.
මේ වගේම වෙස්ට් ඉන්දීස් වල ක්‍රිස් ගේල් එහෙම කරලා තියනවා. ඉන්දියාවේ හිටපු කැප්ටන් ගුන්දප්පා විශ්වනාත් ඉතාම ඈත කාලෙක එංගලන්තයේ බොබ් ටේලර් වෙනුවෙන් එහෙම කරලා තියනවා. ඒ වගේම ඉන්දියාවේ හිටපු කැප්ටන් දෝනි ක්‍රීඩාගාරයට ගිය එංගලන්තයේ ඉයන් බෙල් නැවත කැඳවා තිබෙනවා. අවුට් එක දෙන්න කලින් වල්ඩ් කප් සෙමියකදි ගිල්ක්‍රිස්ට් ක්‍රීස් එකෙන් ගිහිල්ල තියනවා.
තවත් එහෙම මතකයේ රැඳෙන අවස්ථා සෑහෙන ප්‍රමාණයක් තිබිල තියනවා. ෆ්ලින්ටොෆ් ගේල් ස්ටේන් නැගිට්ටවන අවස්ථාව එහෙම එකක්
ඒ වගේම අපි ක්‍රිකට් වල වැටිල හිටිය තැනත් එක්ක ඇත්තටම දිනන්න ලොකු අවශ්‍යතාවක් තිබ්බ. කොහොමත් මැච් එක තිබ්බේ අපේ අතේ. ඒ නිසා එහෙම නොකර ඉන්නත් තිබ්බ. ගොඩක් දේවල් පුද්ගලයා මත රඳා පවතිනවා කියන්නත් පුළුවන්.
හැබැයි ලෝකය කවදාහරි මතක තියාගන්නේ ඊයේ කුසල් මෙන්ඩිස්ගේ ප්‍රවර්ගයේ ක්‍රිකට් නම් නෙවෙයි. වාස් ගහපු ක්‍රිකට්. ඒ ඔහු තරඟ වගේම ක්‍රිකටුත් දිනවල තියන නිසා.
ඒ නිසා වාස්...ඔබට ස්තුති...
(ආචාර්ය මහේෂ් හපුගොඩ)
සමාජ හා දේශපාලන විශ්ලේෂක
hapugoda@gmail.com
(Mahesh Hapugoda ගේ ෆේස්බුක් පිටුවෙන්...)
