ෂොඑබ් බෂීර් (Shoaib Bashir) ට මේ මතභේදයට ලක්වීමට සිදුවුනේ ඔහුට බ්‍රිතාන්‍ය පාකිස්තානුවෙකු ලෙස රටට ඇතුළු වීම ඉන්දියාව ප්‍රතික්ෂේප කළ බැවින්.
මේ හේතුවෙන් 20 හැවිරිදි දඟ පන්දු යවන්නාට හෙට ඇරඹෙන එංගලන්ත - ඉන්දියා පළමු ටෙස්ට් තරගයට සහභාගි වීමට නොහැකි වනවා.
එංගලන්තයේ සරේ හි උපත ලබා බ්‍රිතාන්‍ය විදෙස් ගමන් බලපත්‍රයක් ද සතුව සිටින බෂීර් තමන්ගෙ වීසාව සඳහා කළින් ම පසුගිය මාසයේදී ඉල්ලුම් කර තිබුනත් ඉන්දියා බළධාරීන් බෂීර් ට රට ට ඇතුළු වීමට අවසර නොදුන්නේ ඔහුගේ පාකිස්තාන උරුමය නිසා.
මේ අනුව එංගලන්ත කණ්ඩායමේ බලාපොරොත්තු සුන්වීම මධ්‍යයේ බෂිර් එක්සත් අරාබි එමීර් රාජ්‍යයෙන් පිටවීමෙන් පසුව ඊයේ රාත්‍රියේ නැවත එංගලන්තය ට ගොඩබැස්සා.
මේ වන විට අනුමැතිය ලැබී තිබෙන වීසාව සිය විදෙස් ගමන් බලපත්‍රයේ මුද්‍රා තබා ගැනීම පිණිස ඔහු අද ලන්ඩනයේ තිබෙන ඉන්දියා මහකොමසාරිස් කාර්යාලයට යාමට නියමිතව තිබුනා.
මෙය බෂීර් මාසයක් ඇතුළත එම කාර්යාලයට යන සිවුවැනි වතාව. මීට පෙර, ඔහු එම කාර්යාලය සමග නියම කරගෙන තිබූ හමුවීමක් කිසිම හේතුවක් ප්‍රකාශ නොකර අහෝසි කරන ලද අතර තවත් හමුවකදී ඉන්දියා බළධාරීන් විසින් ඔහුට දන්වා තිබුනේ වීසා බලපත්‍රය වෙනුවෙන් නැවත අයදුම් කරන ලෙසට.
ඉන්දියාව ට එරෙහි පළමු ටෙස්ට් තරගය සඳහා වන ක්‍රීඩකයන් 16 දෙනාගෙන් යුත් තම සංචිතයෙන් එක් ක්‍රීඩකයෙකු ප්‍රතික්ෂේප කිරීම පිළිබඳව එංගලන්ත නායක බෙන් ස්ටෝක්ස් (Ben Stokes) කෝපයට පත්ව සිටියා.
බෙන් ස්ටෝක්ස්
“මේක මහ කලකිරීමක්. අපි අපේ සංචිතය නම් කළේ දෙසැම්බර් මැද. නමුත් දැන් තමයි ‘බෂ්’ දැනගත්තේ එයාට වීසා නැති බව” යනුවෙන් ස්ටෝක්ස් කියා සිටියා.
“එයාට සිද්ධ වුන මේ දේ ගැන මම ඉන්නේ හරි ම කළකිරීමකින්. එංගලන්ත ටෙස්ට් ක්‍රිකට් කණ්ඩායමේ සිටින එයාගෙ පළමු අත්දැකීම මේ ආකාරයෙන් සිදුවනවා දකින්න මට ඕන වුනේ නැහැ. මම එයා ගැන තදින් කම්පා වෙනවා.”
ඉන්දියා මහකොමසාරිස් කාර්යාලයේ වැඩකටයුතු ගැටළුවක් නැතිව සිදුවුනත් බෂීර් ට නැවත ඉන්දියාව ට පැමිණීමට හැකි ආසන්න ම අවස්ථාව වන්නේ හෙට උදෑසන බැවින් ඔහුට පළමු ටෙස්ට් තරගය සඳහා සහභාගි වීමට හැකිවන්නේ නැහැ.
කෙසේ නමුත් බෂීර්ගේ වීසා ප්‍රශ්නය සතිඅන්තයේ නිරාකරණය වී දෙවැනි ටෙස්ට් තරගය ඔහුගේ මංගල ටෙස්ට් ක්‍රිකට් තරගය කර ගැනීම පිණිස මේ දඟ පන්දු යවන්නා ඉන්දියාවේ සිටිනු ඇතැයි එංගලන්තය අපේක්ෂා කරනවා.
සමසෙට් කණ්ඩායම වෙනුවෙන් තරග හයකට ක්‍රීඩා කර පළමු පෙළ කඩුලු 10ක් පමණක් ලබා ගෙන සිටින ෂොඑබ් බෂීර් එංගලන්ත තේරීම් නිළධාරි කමිටුවේ අභිමතයට ඇතුළු කළ ක්‍රීඩකයෙක්.
ඔහු පළමු ටෙස්ට් තරගයට ක්‍රීඩා කිරීම සිදුනොවීමට බොහෝ දුරට ඉඩ තිබුනත් ස්ටෝක්ස් පැහැදිළිව කියා තිබුනේ බෂීර් කණ්ඩායමට නම් නොකිරීමට තීරණය කිරීමට පෙර තමාට එම තරගය පැවැත්වෙන රජිව් ගාන්ධි ජාත්‍යන්තර ක්‍රීඩාංගණයේ තණතීරුව හොඳින් පරීක්ෂා කිරීමට අවශ්‍යව තිබූ බව.
“අපි මෙහෙට ආවේ පළමු ටෙස්ට් තරගය සඳහා වන කණ්ඩායමේ සංයුතිය පිළිබඳව කළින් ඇතිකර ගත් අදහස් හිතේ තබාගෙන නෙවෙයි” එංගලන්ත නායකයා කියා සිටියා.
“ඉන්දියාවේ සිටින විට එහි තණතීරු ක්‍රීඩා කරනු ඇත්තේ කොයි විදියටද කියලා ඉතා හොඳින් පරීක්ෂා කර බැලිය යුතුයි.”
බෂීර්ගේ වීසා සිද්ධිය නින්දා සහගත ක්‍රියාවක් ලෙසින් හංවඩු ගසමින් එංගලන්ත පාර්ලිමේන්තුවේ ක්‍රිකට් සඳහා වන සමස්ත පක්ෂ කණ්ඩායමේ උප සභාපති ටොම් හන්ට් (Tom Hunt) මෙසේ ප්‍රකාශ කළා.
“ලෝක ක්‍රිකට් ක්‍රීඩාවේ සිටින වඩාත්ම ප්‍රබෝධමත් දඟ පන්දු යවන්නා අද ගුවන් තොටුපළේ කාලය කනවා.”
ඉන්දියාව ට ඇතුළු වන පාකිස්තාන පසුබිමක් තිබෙන වෙනත් ක්‍රිකට් ක්‍රීඩකයන් ද හිරිහැරවලට ලක්වීම අතීතයේදීත් සිදුව තිබෙනවා.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
