2013 වසරේදී ශ්‍රී ලංකා කාන්තා කණ්ඩායම පළමු වරට දකුණු අප්‍රිකාව සමග පන්දු වාර 20 තරගාවලියකට සහභාගි වී ඇති අතර, මීට පෙර දෙරට අතර තරගාවලි තුනක් පවත්වා තිබිණි.
ඒ, පිළිවෙළින්, 2013/14, 2014/15 සහ 2018/19 යන වසරවලදී ය.
එම තරගාවලි තුන ම ජය ගැනීමය සමත් වූයේ, දකුණු අප්‍රිකා කාන්තා කණ්ඩායම යි.
වසර 6කට පසුව දෙරට අතර පැවති පන්දු වාර 20 තරගාවලිය දකුණු අප්‍රිකාවේදී ම ජයග්‍රහණය කිරීමට සමත් වීම විශේෂත්වයකි.
අවසන් තරගයේ දක්ෂතම ක්‍රීඩිකාව ලෙස ශ්‍රී ලංකා නායිකා චමරි අතපත්තු නම් කෙරිණි.
පන්දු වාර 20 තරගාවලිය
දකුණු අප්‍රිකාව සමග පැවති මෙම පන්දු වාර 20 තරගාවලිය තරග තුනකින් සමන්විත විය.
මාර්තු මස 27 වන දා ආරම්භ වූ මෙම තරගාවලියේ පළමු තරගයෙන් ලකුණු 79ක පහසු ජයක් හිමි කර ගත්තේ, දකුණු අප්‍රිකානු කණ්ඩායම යි.
පළමුවෙන් පන්දුවට පහර දුන් දකුණු අප්‍රිකා කාන්තා කණ්ඩායම කඩුලු 5ක් දැවී ලකුණු 198ක් රැස් කළේ ය.
දකුණු අප්‍රිකානු නායිකා ලෝරා වොල්වාඩට් ලකුණු 102ක් රැස් කළා ය.
පිළිතුරු වශයෙන් ශ්‍රී ලංකා කාන්තා කණ්ඩායම සියලු කඩුලු දැවී රැස් කළේ, ලකුණු 119ක් පමණි.
දෙවන තරගයෙන් කඩුලු 7ක පහසු ජයක් හිමි කර ගත් ශ්‍රී ලංකා කාන්තා කණ්ඩායම තරගාවලිය තුළ සජීවීව සිටීමට සමත් විය.
එම තරගයේදී පළමුවෙන් පන්දුවට පහර දුන් දකුණු අප්‍රිකා කණ්ඩායම කඩුලු 8ක් දැවී ලකුණු 137ක් රැස් කළ අතර, ශ්‍රී ලංකා කාන්තා කණ්ඩායම කඩුලු 3ක් පමණක් දැවී ලකුණු 138ක් රැස් කරමින් තරගයේ ජය හිමි කර ගත්තේ ය.
නොදැවී ලකුණු 45ක් සහ පන්දු යැවීමේදී එක් කඩුල්ලක් දවා ගත් කවීෂා දිල්හාරි තරගයේ දක්ෂතම ක්‍රීඩිකාව ලෙස නම් කෙරිණි.
චමරි අතපත්තුගෙන් විශිෂ්ට ඉනිමක්
මේ අතර, බදාදා (අප්‍රේල් 03) පැවති තරගයෙන් ශ්‍රී ලංකා කාන්තා කණ්ඩායම කඩුලු 4ක ජයක් හිමි කර ගැනීමට සමත් විය.
පළමුවෙන් පන්දුවට පහර දුන් දකුණු අප්‍රිකා කාන්තා කණ්ඩායම කඩුලු 6ක් දැවී ලකුණු 155ක් රැස් කළේ ය.
එහිදී ලෝරා වොල්වාඩට් ලකුණු 56ක් රැස් කළ අතර, නඩීන් ඩි ක්ලර්ක් නොදැවී ලකුණු 44ක් රැස් කළා ය.
ශ්‍රී ලංකාව වෙනුවෙන් පළමු සහ දෙවන තරගවලදී ලකුණු අතරට පැමිණීමට නොහැකි වූ ශ්‍රී ලංකා නායිකා චමරි අතපත්තු පන්දු 46කදී ලකුණු 73ක් රැස් කළා ය.
ඊට අමතරව, හර්ෂිතා සමරවික්‍රම නොදැවී ලකුණු 54ක් රැස් කරමින් ශ්‍රී ලංකා කාන්තා කණ්ඩායම ජයග්‍රහණය කරා රැගෙන ගියා ය.
අවසන් තරගයේ දක්ෂතම ක්‍රීඩිකාව ලෙස ශ්‍රී ලංකා නායිකා චමරි අතපත්තු නම් කෙරිණි.
ශ්‍රී ලංකා කාන්තා ක්‍රිකට් කණ්ඩායම දකුණු අප්‍රිකාවට එරෙහිව පන්දු වාර 20 තරගාවලියක් ජය ගත්තේ, පළමු වරට ය.
(BBC සිංහල සේවය)
