ෂකිබ්ගේ පන්දු යැවීම නීතිවිරෝධී බවට තරග විනිසුරුවන් වාර්තා කර තිබෙන්නේ ඔහු සරේ ප්‍රාන්ත කණ්ඩායම නියෝජනය කරමින් සැප්තැම්බරයේ ක්‍රීඩා කළ ප්‍රාන්ත ශූරතාවලියේ ඔහුගේ එකම තරගයේදී.
වමතින් දඟ පන්දු යවන 37 හැවිරිදි ෂකිබ්ව ප්‍රතිවාදී කණ්ඩායම වන සමසෙට් සමග තීරණාත්මක තරගය වෙනුවෙන් විශේෂයෙන් අත්සන් කර තිබුනේ තරගය පැවති ටෝන්ටන් තණතීරුව දඟ පන්දුවට හිතකර බවට අපේක්ෂා කර තිබූ බැවින්.
බංග්ලාදේශ තුන් ඉරියව් ක්‍රිකට් ක්‍රීඩක ෂකිබ් අල් හසන් ට එංගලන්ත හා වේල්ස් ක්‍රිකට් මණ්ඩලයේ (ECB) තරගවල පන්දු යැවීම තහනම් කර තිබෙනවා
සරේ කණ්ඩායම ලකුණු 111ක පරාජයක් ලැබූ තරගයේ ඉනිම දෙකේදී ෂකිබ් කඩුලු 9ක් බිඳ දැමීමට සමත් වූ අතර තරගයෙන් පරාජය වූව ද පසුව තරගාවලියේ ශූරතාව දිනා ගැනීමට ඔහුගේ කණ්ඩායම සමත් වුනා.
මේ මස මුල එංගලන්තයේ ලෆ්බරෝ සරසවියේදී ෂකිබ් ස්වාධීන තක්සේරු කිරීමක් සම්පූර්ණ කළ අතර එහිදී, ඔහුගේ පන්දු යැවීමේ ඉරියව්වේ වැලමිට දික් කිරීම ක්‍රිකට් රෙගුලාසිවලින් විස්තර කර දී ඇති අංශක 15 සීමාව ඉක්මවන බව සොයා ගෙන තිබෙනවා.
මේ ස්වාධීන තක්සේරු පරීක්ෂණයේ ප්‍රතිඵල ලැබුනු 2024 දෙසැම්බර් 10 වැනිදා සිට ෂකිබ්ගේ තහනම බලපැවැත්වෙනවා.
ෂකිබ් අල් හසන් ඔහුගේ පන්දු යැවීමේ ඉරියව්වල ස්වාධීන නැවත තක්සේරු කිරීමකින් සමත් වනතුරු ඔහුට ECB තරගවල පන්දු යැවීම තහනම්.
2025 ක්‍රීඩා වාරය වෙනුවෙන් එංගලන්ත ප්‍රාන්තයක් සමග කොන්ත්‍රාත් අත්සන් කර නැති ෂකිබ් අල් හසන් ඔහුගේ පන්දු යැවීමේ ඉරියව්වල ස්වාධීන නැවත තක්සේරු කිරීමකින් සමත් වනතුරු ඔහුට ECB තරගවල පන්දු යැවීම තහනම්.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com