කිලෝග්‍රෑම් 67 වෙල්ට බර පංතියේදී නාවික හමුදාවේ ඒ.එම්.ටී.එස්.අදිකාරී පරාජය කළ වමතින් දස්කම් දක්වන යුද හමුදාවේ සුරංග ප්‍රනාන්දු හොඳම බොක්සිං ක්‍රීඩකයා ලෙස නම් කෙරුනා. ගුවන් හමුදාව නියෝජනය කරමින් ලයිට් ෆ්ලයි (කිලෝග්‍රෑම් 50) බර පංතියේ තරග කළ ශ්‍රී ලංකා ක්‍රීඩිකා කේ.කේ.අයි.ටී.පෙරේරා ට එරෙහිව පෙරලිකාර ජයක් වාර්තා කළ සචිනි ප්‍රනාන්දු හොඳම බොක්සිං ක්‍රීඩිකාව ලෙස තේරුණා. ඇය තරග වැදුනේ ස්වාධීනව.
පී.පී.එස්.සිරිවර්ධන ලයිට් වෙල්ට බර පංතියේ (කිග්‍රෑ 63.5) ශූරතාව හිමිකර ගත් අතර පී.එම්.එල්.එල්.චන්ද්‍රබණ්ඩාර ලයිට් මිඩ්ල් බර පංතියේ (කිග්‍රෑ 71) කිරුළ දිනා ගත්තේ ජාත්‍යන්තර රන් පදක්කම්ලාභී ගුවන් හමුදාවේ චින්තන උදයකුමාර ට එරෙහිව විස්මිත තාක්ෂණික බිම හෙළීමේ ජයග්‍රහණයක් ලබා ගනිමින්.
යුද හමුදාවේ අනෙකුත් ජයග්‍රාහකයන් වූයේ රුක්මාල් ප්‍රසන්න (කිග්‍රෑ 57), ආර්.එම්.පී.කේ.කේ.රස්නායක (කිග්‍රෑ 60), වයි.එස්.පී.සුදම්ම (කිග්‍රෑ 86), පී.ඒ.ආර්.එස්.රූපසිංහ (කිග්‍රෑ 92) හා යූ.ඒ.අවිශ්ක (කිග්‍රෑ 92+)
ගුවන් හමුදාවේ බොක්සිං ක්‍රීඩිකාවෝ රන් 4ක්, රිදී 3ක් හා ලෝකඩ 1ක් සමග පදක්කම් 8ක් දිනා ගනිමින් ශූරියන් බවට පත්වූ අතර යුද හමුදා කාන්තා බොක්සිං කණ්ඩායම අනුශූරියන් වූයේ රන් පදක්කම් 2ක්, රිදී පදක්කම් 4ක් සහ ලෝකඩ පදක්කම් 2ක් ඇතුළුව පදක්කම් අටක් හිමිකර ගනිමින්.
ක්ලිෆඩ් කුසලාන තරගාවලියට සමගාමීව පැවති යෞවන බොක්සිං තරගාවලියේ ශූරයන් වූයේ මහනුවර සාන්ත සිල්වෙස්තර විදුහල. මහනුවර හේමමාලි කාන්තා විදුහල ශූරියන් බවට පත්වුනා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com