ක්‍රීඩාව, දේශපාලනය, ආගන්තුක සත්කාරය, සිවිල් අයිතීන්, LGBTQ+ වෙනුවෙන් කතා කිරීම හා විද්‍යාව යන ක්ෂේත්‍රයන්හි වඩාත්ම ජනප්‍රිය පුද්ගලයන් 19 දෙනෙකුට මේ පදක්කම් මගින් ගෞරවය පුදකර තිබෙනවා. මේ පදක්කම්ලාභීන් අමෙරිකාවේ සාර්ථකත්වය, වටිනාකම හෝ ආරක්ෂාව, ලෝක සාමය හෝ අනෙකුත් සැලකිය යුතු සමාජීය, පොදු හෝ පෞද්ගලික උත්සාහයන් වෙනුවෙන් ආදර්ශවත් දායකත්වයක් ලබා දී ඇතැයි ධවල මන්දිරය ප්‍රකාශ කරනවා.
බාස්කට්බෝල් තරග බිමේ එදා මෙදා තුර සිටි ශ්‍රේෂ්ඨතම ‘පොයින්ට් ගාඩ්’ ක්‍රීඩකයා ලෙසින් නිතර හැඳින්වෙන 65 හැවිරිදි ජොන්සන්, තමාට HIV වෛරස් රෝගය තිබෙන බවට නිවේදනය කරමින් 1991 වසරේදී හදිසියේ ම ක්‍රීඩාවෙන් සමුගැනීමට පෙර Los Angeles Lakers කණ්ඩායම සමග පස් වතාවක් NBA ශූරයෙක් බවට පත්වුනා. 1996 වසරේදී NBA ඉතිහාසයේ ශ්‍රේෂ්ඨතම ක්‍රීඩකයින් 50 දෙනාගෙන් කෙනෙකු ලෙස ගෞරවයට පාත්‍ර වූ ජොන්සන් 2021 වසරේදී NBA 75 වැනි සංවත්සරික කණ්ඩායමට තෝරා ගනු ලැබුවා. Naismith Memorial Basketball Hall of Fame පදවියෙන් දෙවරක් පිදුම් ලැබූ ජොන්සන් ඔහුගේ තනි ක්‍රීඩා දිවිය වෙනුවෙන් 2002 වසරේ ද, සිහින කණ්ඩායමේ සාමාජිකයෙකු වශයෙන් 2010 වසරේ ද ගෞරවනීය තත්ත්වය හිමිකර ගත්තා.
ඉයවින් ‘මැජික්’ ජොන්සන්
සිය ක්‍රීඩා දිවියෙන් පසුව ජොන්සන් වෘත්තීය බාස්කට්බෝල් කණ්ඩායම් කිහිපයකම අයිතිකරුවන්ගේ සමූහයට බැඳුනා.
ලයනල් මෙසී
පාපන්දු ක්‍රීඩාවේ මෙතෙක් බිහිවූ අතිවිශිෂ්ඨතම ක්‍රීඩකයෙකු ලෙස සැලකෙන 37 හැවිරිදි ලයනල් මෙසී තනි වාර්තා ගණනාවක්ම පිහිටුවා තිබෙන්නේ ‘බැලන් ඩෝ’ සම්මාන අටක් සහ ‘FIFA ලෝකයේ හොඳම ක්‍රීඩකයා’ සම්මානය අට වතාවක් ජයග්‍රහණය කරමින්. වෘත්තීය පාපන්දු ඉතිහාසයේ වැඩිම සම්මාන හා කිරුළු හිමිකර ගෙන සිටින මෙසී UEFA චැම්පියන්ස් ලීග් හතරක් ද, Copa America ශූරතා දෙකක් ද සහ FIFA ලෝක කුසලානය ඇතුළු කණ්ඩායම් කුසලාන 45ක් හිමිකර ගෙන තිබෙනවා.
අමෙරිකානු MLS පාපන්දු තරගාවලියේ Inter Miami සමාජය වෙනුවෙන් ක්‍රීඩා කළ පළමු පූර්ණ ක්‍රීඩා වාරයේදී මෙසී තරග 19කදී ගෝල් 20ක් සහ ගෝල් ලබා ගැනීමට සහාය වීම් 16ක් වාර්තා කිරීමෙන් පසුව 2024 ලීගයේ වඩාත්ම වටිනා ක්‍රීඩකයා ලෙස නම් කෙරුනා. එහිදී ඔහුගේ කණ්ඩායම ලකුණු 74ක මෙහෙයුමක යෙදෙමින් ලීග් වාර්තාවක් ද බිහිකළා.
මෙසී ඔහුගේ ‘ලියෝ මෙසී පදනම’ මගින් ලොව වටා ළමයින් වෙනුවෙන් සෞඛ්‍ය සත්කාරය හා අධ්‍යාපන වැඩසටහන්වලට ආධාර කරන අතර UNICEF හොඳහිත තානාපතිවරයෙකු ලෙස ද කටයුතු කරනවා.
මෙසී ධවල මන්දිරයේ පැවති පදක්කම් පිරිනැමීමේ උත්සවයට පැමිණියේ නැහැ. කළින් යොදා ගත් කාර්යයන් හේතුවෙන් තමාට පැමිණීමට නොහැකි බවත් මේ පදක්කම සඳහා නම් කිරීම තමාට ඉතාමත් ලොකු ගෞරවයක් බවත් ලයනල් මෙසී ධවල මන්දිරයට ස්තූති කිරීමේ ලිපියක් යවමින් කියා තිබෙනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com