මේ අනුව ඔහු දශකයක කාලයක් තිස්සේ දැරූ හැම්ප්ෂ (Hampshire) කණ්ඩායමේ නායකත්වයෙන් ඉවත්ව ඩුබායි බලා පිටත්ව යනවා.
වින්ස් ට 2025 එංගලන්ත දේශීය පළමු පෙල ප්‍රාන්ත ශූරතාවලිය හෝ රතු පන්දුවේ ක්‍රීඩා වාරය අහිමි වූව ද ඔහු දිගටම සුදු පන්දුවේ සීමිත ඕවර ක්‍රිකට් ක්‍රීඩා කරමින් T20 Blast තරගාවලියේදී හැම්ප්ෂ කණ්ඩායමට නායකත්වය දීමට නියමිතයි.
ජේම්ස් වින්ස් බිග් බෑෂ් ලීගයේ (Big Bash League) ‘සිඩ්නි සික්සර්ස්’ (Sydney Sixers) කණ්ඩායමේ වැඩිම කාලයක් ක්‍රීඩා කරන විදෙස් ක්‍රීඩකයෙක්. ඔහු එම කණ්ඩායම වෙනුවෙන් සිය දෙවැනි ශතකය පසුගිය දෙසැම්බර් 26 වැනිදා ‘මෙල්බර්න් ස්ටාස්’ කණ්ඩායමට එරෙහිව වාර්තා කළා. වින්ස් මේ ක්‍රීඩා වාරයේ ඔහුගේ අවසාන තරගය ‘සිඩ්නි සික්සර්ස්’ කණ්ඩායම වෙනුවෙන් ක්‍රීඩා කළේ පසුගිය සතියේ.
එංගලන්ත භූමියේදී 2019 ලෝක කුසලානය දිනා ගත් එංගලන්ත ක්‍රිකට් සංචිතයේ සාමාජිකයෙකු වන 33 හැවිරිදි මේ පිතිකරුවාගේ හැම්ප්ෂ ක්‍රීඩා සමාජ මූලස්ථානය අසල පිහිටි පවුලේ නිවසට පසුගිය වසරේදී දෙවතාවක් පහර දී තිබෙනවා.
මේ ප්‍රහාරයන් නිසා ඔහුගේ තරුණ පවුල භීතියට පත්ව සිටින බව පවසන වින්ස් මේ ප්‍රහාර සිදුවන්නේ වැරදි හඳුනා ගැනීමක් නිසා යැයි බ්‍රිතාන්‍යයේ ‘ඩේලි ටෙලිග්‍රාෆ්’ පුවත්පතට කියා තිබෙනවා.
වින්ස් 2009 වසරේදී ප්‍රථම වතාවට හැම්ප්ෂ කණ්ඩායම නියෝජනය කරන විට ඔහුගේ වයස වී තිබුනේ අවුරුදු 18ක්. එම ප්‍රාන්තය වෙනුවෙන් ඔහු ලකුණු 22,000කට වැඩියෙන් ලබා ගෙන තිබෙනවා.
Blast තරගාවලියේ එදා මෙදා තුර වැඩිම ලකුණුලාභියා බවට පත්ව සිටින වින්ස් සියලු ශෛලියේ ක්‍රිකට් ක්‍රීඩාවේදී 55 වතාවක් එංගලන්තය නියෝජනය කර ඇති අතර හැම්ප්ෂ ක්‍රීඩා සමාජයේ T20 ශූරතා ජයග්‍රාහී කණ්ඩායම් තුන ට ම ක්‍රීඩා කර තිබෙනවා.
පාකිස්තාන සුපර් ලීග් T20 තරගාවලියේ ‘කරච්චි කිංග්ස්’ කණ්ඩායමේ මේ ක්‍රීඩා වාරය වෙනුවෙන් ද ජේම්ස් වින්ස් රඳවා ගෙන තිබෙන්නේ පවුම් 100,000ක කොන්ත්‍රාත්තුවකින්.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com