ඒ, නවසිලන්තය ට එරෙහිව ඉන්දූර් හි හොල්කා ක්‍රීඩාංගණයේ සඳුදා පැවති තරගයේදී පන්දු 86කින් ශතකයක් ලබා ගනිමින්. ඇගේ මේ ඉනිමට හතරේ පහර 15ක් සහ දැවැන්ත හයේ පහරක් ඇතුළත්ව තිබුණා.
මෙය 2025 වසරේ බ්‍රිට්ස්ගේ පස්වැනි ජාත්‍යන්තර එක්දින (ODI) ක්‍රිකට් ශතකය වූ අතර මෙය කාන්තා ක්‍රිකට් ක්‍රීඩාවේ කැලැන්ඩර වසරකදී මෙතෙක් වාර්තා වූ වැඩිම ශතක ප්‍රමාණයයි. මීට පෙර මේ වාර්තාව උසුලමින් සිටියේ 2024 හා 2025 යන වසර දෙකේදී ම දෙවතාවක් ශතක හතරක් සටහන් කළ ඉන්දියා ආරම්භක පිතිකාරිනී ස්ම්‍රිටි මන්ධානා. දැන් තවමත් ගෙවී යන්නේ ඔක්තෝබර් මාසය. කාන්තා ක්‍රිකට් ලෝක කුසලානය දීර්ඝ තරගාවලියක්. එබැවින් පිතිකරණයේ ඉතාමත් හොඳ තත්ත්වයක සිටින මේ පිතිකාරිනියන් දෙදෙනා අතර තියුණු සටනක් ඉදිරියේදී දැක බලා ගැනීම පිණිස ක්‍රිකට් ලෝලීන්ට අවස්ථාවක් ලැබීමට ඉඩ තිබෙනවා.
බ්‍රිට්ස් බිඳ දැමූ එකම වාර්තාව එය නෙවෙයි. මෙය ඇගේ හත් වැනි ODI ශතකයයි. ඒ වෙනුවෙන් ඇය ක්‍රීඩා කර තිබෙන්නේ ඉනිම 41ක් පමණයි. මෙය වැඩිම වේගයෙන් ලබා ගත් ශතක 7 බවට ද වාර්තා වනවා. හිටපු ඔස්ට්‍රේලියානු නායිකා මෙග් ලැනිං ට මේ සඳහා ගතවූ ඉනිම සංඛ්‍යාව 44ක්. වෙනත් කිසිම පිතිකාරිනියක ඉනිම 50කදී පවා ශතක හතක් ලබා ගෙන නැති අතර පෝලිමේ ඊළඟට සිටින්නේ එංගලන්තයේ ටැමී බෝමොන්ට් (ඉනිම 62) සහ නවසිලන්තයේ සුසී බේට්ස් (81). බ්‍රිට්ස් ඇගේ වාර්තාගත ශතකය සැමරුවේ දුන්නයි ඊතලයක ලස්සන අංග චලනයකින්.
කැලැන්ඩර වසරක් තුළ ශතක පහක් වාර්තා කරමින් ඉතිහාසය අලුතින් ලියූ බ්‍රිට්ස් මෑත වසරවලදී දකුණු අප්‍රිකානු ක්‍රිකට් ක්‍රීඩාවට විප්ලවීය වෙනසක් කර තිබෙනවා. එහෙත්, හිණිපෙත්තට පිවිසි ඇගේ ගමන කෙලින්ම සිදුවූවක් හෝ පහසු එකක් වුනේ නැහැ.
බ්‍රිට්ස් ලෝක කණිෂ්ඨ මලල ක්‍රීඩා ශූරතාවලියේ හිටපු හෙල්ල විසිකිරීමේ ලෝකඩ පදක්කම්ලාභිනියක්. 2012 වසරේ ලන්ඩන් ඔලිම්පික් ක්‍රීඩා උළෙලට සුදුසුකම් ලබා ගත් ඇය එම වික්‍රමය සැමරීම පිණිස රිය පදවමින් සිටියදී භයානක අනතුරකට ලක්වුනා. සුක්කානම ගෙන සිටින අතරතුර තමාගේ ජංගම දුරකථනයට එබිකම් කිරීමට යාමේදී ඇය මේ අනතුරට පත්වූ අතර එයින් ඇගේ උකුල් පෙදෙසේ තැන් කිහිපයක් බිඳී, මුත්‍රාශය පුපුරා අභ්‍යන්තර ලේ ගැලීමක් හටගත්තා.
ඇයගේ මව්පියන්, භෞතචිකිත්සකයින් හා මානසික වෛද්‍යවරුන්ගේ ආධාර කිරීම්වලට ස්තූතිවන්ත වන්නට බ්‍රිට්ස් ප්‍රාතිහාර්යමය සුවයක් ලබා ගනිමින් වසරක ප්‍රතිකාරවලින් පසුව නැවත ඇවිදින්නට පටන් ගත්තා.
ශරීර යෝග්‍යතාවේ පෙර තිබූ තත්ත්වයට නැවත පිවිසීමෙන් පසුව බ්‍රිට්ස් ක්‍රිකට් පිත්ත සමග දැක්වූ වෘත්තීයතාව ඇයට දකුණු අප්‍රිකානු නැගී එන ක්‍රීඩිකාවන්ගේ කණ්ඩායමට 2018 වසරේදී ඇතුළු වීමට උපකාරයක් වුනා. එතැන් සිට මේ ඔලිම්පික් වළලු පච්චය සහිත පිතිකාරිනිය ඉදිරියටම ගියේ එක පිට එක දස්කම් ප්‍රදර්ශනය කරමින්.
බංග්ලාදේශය ට එරෙහිව ප්‍රථම වරට දකුණු අප්‍රිකාව නියෝජනය කළ බ්‍රිට්ස් මේ වන විට ජාත්‍යන්තර විස්සයි20 තරග 14කදී රට වෙනුවෙන් ක්‍රීඩා කර තිබෙනවා. ‘ඇත්තෙන්ම තමා ජීවත්ව සිටිය යුතු කෙනෙක් නොවේ’ යනුවෙන් අනතුරෙන් පසුව මතයක් දැරූ ටස්මීන් බ්‍රිට්ස් තමාට ලැබුනු දෙවැනි වරමෙන් නැවත ජිවිතය ගොඩනගා ගෙන සිටින්නේ මහත් සේ මවිතයට පත්වෙන ආකාරයෙන්.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
