සිය පළමු ලෝක කුසලාන තරගයට ක්‍රීඩා කළ 20 හැවිරිදි මරුෆා බංග්ලාදේශය විසින් පාකිස්තානය ලකුණු 129කට සීමා කරද්දී, ඕවර හතක් යවමින් කඩුලු 2ක් බිඳ හෙලුවේ ලකුණු 31ක් පමණක් ලබා දෙමින්.
තරගය ආරම්භයේදී ම, අක්ටර් පාකිස්තාන ආරම්භක පිතිකාරිනී ඔමයිමා සොහේල් හා අංක 3 පිතිකාරිනිය වන සිද්‍රා අමින් දවාලුවේ පාකිස්තානය ට මරු පහරක් එල්ල කරමින්. බංග්ලාදේශය කඩුලු 7කින් තරගය ජය ගත් අතර මරුෆා ‘තරගයේ වීරවරිය’ ලෙස නම් කෙරුනා.
පන්දුව දෝලනය කිරීම සඳහා මරුෆා ට තිබෙන ගුප්ත හැකියාව විසින් ඇයව ක්ෂණික ක්‍රිකට් තාරකාවක් බවට පත්කර තිබෙනවා. ඇත්තෙන්ම, විශාරදයින් බොහෝ දෙනෙක් ඉන්දියා උපමහාද්වීප කාන්තා ක්‍රිකට් ක්‍රීඩාවේ හොඳම වේග පන්දු දක්ෂතාව ලෙසින් ඇයව හඳුන්වනවා.
බංග්ලාදේශයේ නිල්ෆාමාරි ප්‍රදේශයේ සිට පැමිණෙන මරුෆා ඇයට ලැබී තිබෙන මේ විශේෂ අවධානයෙන් සතුටු වූව ද, ඇය ආ ගමන විසින් ඇයට නිහතමානී වීමට උගන්වා තිබෙනවා. යටහත් පහත් පසුබිමකින් එන මරුෆා, තමා උස් මහත් වෙද්දී ආර්ථික අමාරුකම් නිරන්තරයෙන් තිබූ බවට අනාවරණ කර තිබෙනවා.
“විවාහ මංගල්‍යයන් වැනි නොයෙකුත් එකතු වන අවස්ථාවලට ඔවුන් අපට ආරාධනා කළේ නැහැ. එවැනි තැන්වලට අඳින්න සුදුසු ඇඳුම් අපි ළඟ නැහැ කියා ඔවුන් කීවා. ඔවුන් කීවේ අපි ඒ ස්ථානයකට ගියොත්, අපට අපේ සැලකීම නැතිවේවි කියලයි” මරුෆා මාධ්‍යවේදීන් හමුවේ පැවසුවේ කඳුළු සලමින්.
“රාමසාන් උත්සවයටවත් අලුත් ඇඳුමක් ගන්න අපට සල්ලි තිබුනේ නැහැ” යනුවෙන් ඇය මාධ්‍ය හමුවේදී ඉකි බිඳිමින් කියා සිටියා.
“මගේ තාත්තා ගොවියෙක්. අපට එච්චර මුදල් තිබුනේ නැහැ. මම හැදී වැඩුනු ගමේ හිටපු මිනිස්සු පවා අපට එච්චර උදව් කළේ නැහැ” ඇය පැවසුවා.
මරුෆා දැන් ඇගේ පවුලට උපකාර කරන ආඩම්බර දියණියක්.
“ඇත්ත වශයෙන්ම, දැන් අපි ඉන්න තත්ත්වයේ අනෙක් අය නැහැ. මම මගේ පවුලට උදව් කරන තරමට, බොහෝ පිරිමි ළමයින්ට එහෙම කරන්න බැරිවෙන්න ඉඩ තියෙනවා. එයින් මට ලබා දෙන්නේ විශේෂ ආකාරයේ සැනසිල්ලක්. ළමයෙක් විදියට ඉන්නකොට මම කල්පනා කළා මිනිසුන් අපි දිහා ගෞරවයෙන් හා ප්‍රශංසාවෙන් බලන්නේ කවදාද කියලා. දැන්, මම රූපවාහිනියේ මාව දැක්කම, මට ලජ්ජාවක් දැනෙනවා” යනුවෙන් මරුෆා ප්‍රකාශ කළේ සිනාසෙමින්.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
