ලබා ගත්තේ ඔහුගේ අතිවිශිෂ්ට ක්‍රීඩා දිවියට තවත් ලෝක වාර්තාවක් එක්කර ගනිමින්.
තරගය ජය පැරදුමින් තොරව අවසන් වීම හේතුවෙන් පෘතුගාලය ට 2026 ලෝක කුසලාන පාපන්දු තරගාවලියට සුදුසුකම් ලබා ගැනීම ප්‍රමාද වූව ද, ඔවුන්ගේ සුපිරි තරුව වන රොනාල්ඩෝගේ වාර්තාගත ගෝල් යුගලයෙන් නව ලෝක වාර්තාවක් බිහිවුනා.
රොනාල්ඩෝ ඔහුගේ පළමු ගෝලයෙන් හිටපු ග්වාටමාලා ක්‍රීඩක කාලොස් රුයිස් ගෝල් 39ක් ලබා ගනිමින් පිහිටුවා තිබූ ලෝක කුසලාන සුදුසුකම් ලැබීමේ තරගවල වැඩිම ගෝල් සංඛ්‍යාවේ සම තත්ත්වයෙන් මිදුනු අතර දෙවැනි ගෝලයෙන් ඔහුගේ 41 වැනි ගෝලය සහ නව වාර්තාව සටහන් වුනා. ඒ, සුදුසුකම් ලබා ගැනීමේ තරග 51කින්.
මේ ප්‍රතිඵලයත් සමග පෘතුගාලය තරග හතරකින් ලකුණු 10ක් ලබා ගෙන සිටින අතර හංගේරියාව ලකුණු පහක් ලබා ගෙන දෙවැනි ස්ථානයේ පසුවනවා.
නොවැම්බරයේ පැවැත්වීමට නියමිත අයර්ලන්තය හා ආමේනියාව ට එරෙහි සුදුසුකම් ලැබීමේ තරගවලදී රොනාල්ඩෝගේ පෘතුගාල කණ්ඩායමට 2026 ලෝක කුසලාන පාපන්දු තරගාවලියේ ඔවුන්ගේ ස්ථානය ස්ථිර කර ගැනීමට හැකියාව ලැබෙනු ඇතැයි අපේක්ෂා කෙරෙනවා.
මේ ගෝල් දෙකත් සමග රොනාල්ඩෝ පාපන්දු සමාජ හා රට වෙනුවෙන් ලබා ගත් ගෝල් ප්‍රමාණය 948 දක්වා ඉහළ ගොස් තිබෙන අතර ඔහු දැන් ඔහු සහභාගි වූ ලෝක කුසලාන සුදුසුකම් ලැබීමේ වට හයෙන් පහකදී ගෝල් පහක් හෝ ඊට වැඩියෙන් වාර්තා කර තිබෙනවා.
කණ්ඩායම් 48ක සහභාගිත්වයෙන් ලෝක කුසලාන තරගාවලිය අමෙරිකාව, කැනඩාව හා මෙක්සිකෝවේ ලබන වසරේ පැවැත්වෙන විට රොනාල්ඩෝගේ වයස වනු ඇත්තේ අවුරුදු 41ක්. එහෙත් ඔහු පෘතුගාල ජාතික පාපන්දු සංචිතයේ ස්ථිර සාමාජිකයෙකු වනු ඇතැයි පැවසෙනවා.
රොනාල්ඩෝ ට වඩා ලයනල් මෙසී ලෝක කුසලාන පාපන්දු සුදුසුකම් ලැබීමේ තරග වැඩි ප්‍රමාණයකට ක්‍රීඩා කර ඇතත්, තරග 72කින් ගෝල් 36 වාර්තා කරමින් ඔහු සිටින්නේ ලැයිස්තුවේ තෙවැනි ස්ථානයේ.
FIFA ලෝක කුසලාන සුදුසුකම් ලැබීමේ තරගවල වැඩිම ගෝල්ලාභීන්:
1. ක්‍රිස්ටිආනෝ රොනාල්ඩෝ - ගෝල් 41 (තරග 51)
2. කාලොස් රුයිස් - 39 (47)
3. ලයනල් මෙසී - 36 (72)
4. අලි ඩායී - 35 (51)
5. රොබර්ට් ලෙවාන්ඩොව්ස්කි - 33 (42)
6. ක්‍රිස් වුඩ් - 29 (31)
7. සාදර් අස්මවුන් - 29 (41)
8. එඩින් සෙකෝ - 29 (42)
9. ලුයිස් සුආරස් - 29 (64)
10.කරිම් බඝේරි - 28 (29)
-වර්නන් ගුණසේකර
