තිබෙන ඇෆ්ගනිස්තාන ක්‍රිකට් මණ්ඩලය, පාකිස්තානය හා ශ්‍රී ලංකාව සමග පැවැත්වීමට නියමිතව තිබූ විස්සයි20 තුන්කොන් තරගාවලියෙන් ඇෆ්ගනිස්තානය ඉවත් වන බව ප්‍රකාශ කරනවා.
පාකිස්තාන දේශසීමාවේ පිහිටි පක්ටිකා පළාතේ උර්ගන් දිස්ත්‍රික්කයට පාකිස්තානය ඊයේ රාත්‍රියේ එල්ල කළ ගුවන් ප්‍රහාරයෙන් ක්‍රිකට් ක්‍රීඩකයන් තිදෙනෙකු හා සාමාන්‍ය වැසියන් පස් දෙනෙකු මිය ගොස් තිබෙනවා.
විස්සයි20 තුන්කොන් ක්‍රිකට් තරගාවලිය පිළිබඳව පාකිස්තානය නිවේදනය කළේ පසුගිය මාසයේ. එය නොවැම්බර් 17 වැනි දින ආරම්භ වී නොවැම්බර් 29 අවසන් වීමට නියමිතව තිබුනේ එහි තරග රාවල්පින්ඩි සහ ලහෝර් නගරවල පවත්වමින්.
කෙසේ වෙතත්, හිටපු මිතුරන් වන පාකිස්තානය හා ඇෆ්ගනිස්තානය සතියක් තිස්සේ ලේ ගැලීම් සහිත ගැටුම්වල නිරතව සිටියේ දෙපාර්ශවයම අනෙක් පැත්තේ පුද්ගලයින් මිය ගිය බව පවසමින්. පැය 48ක සටන් විරාමයකට බදාදා එකඟ වූව ද, සිකුරාදා රාත්‍රියේ සිදුකළ මේ අලුත් ප්‍රහාරයෙන් පාකිස්තානය එම සටන් විරාමය බිඳ දමා ඇතැයි ඇෆ්ගනිස්තානය පාලනය කරන ටලිබාන් හමුදා රජය දැන් කියා සිටිනවා.
ප්‍රහාරයෙන් මිය ගොස් තිබෙන්නේ උර්ගන් දිස්ත්‍රික්කයේ කබීර්, සිබ්ඝාතුල්ලා සහ හරූන් යන ක්‍රිකට් ක්‍රීඩකයන් හා එම දිස්ත්‍රික්කයේ රටවැසියන් පස් දෙනෙක්. තවත් පුද්ගලයන් හත් දෙනෙකුට තුවාල සිදුව තිබෙනවා. ක්‍රීඩකයන් මේ ප්‍රහාරයට කලින් දේශීය ක්‍රිකට් තරගාවලියකට සහභාගි වීම පිණිස පක්ටිකා පළාතේ ෂරානා නුවරට ගොස් තිබෙනවා. නැවත උර්ගන් හි නිවසට පැමිණීමෙන් පසුව ඔවුන් ගුවන් ප්‍රහාරයට ඉලක්ක වී තිබෙන්නේ රැස්වීමක සිටියදී.
මේ ඛේදජනක සිද්ධියට ප්‍රතිචාරයක් සහ මිය ගිය පුද්ගලයින්ට දක්වන ගෞරවයක් ලෙසින් පාකිස්තානය සහභාගි වන ජාත්‍යන්තර විස්සයි20 තුන්කොන් තරගාවලියෙන් ඉවත් වීමට තීරණය කළ බව ඇෆ්ගනිස්තාන ක්‍රිකට් මණ්ඩලය පවසනවා.
ඇෆ්ගනිස්තානය හා පාකිස්තානය සහභාගි වීමට නියමිතව තිබූ 2025 වසරේ දෙවැනි තුන්කොන් තරගාවලියයි මේ. පළමුවැන්න පැවැත්වුනේ 2025 ආසියානු කුසලානයට දින කිහිපයකට පෙර එක්සත් අරාබි එමීර් රාජ්‍යයේ. අහෝසි කෙරෙන තරගාවලිය පැවැත්වුනා නම් එය පාකිස්තාන පොළොවේ ඇෆ්ගනිස්තානය ක්‍රීඩා කරන පළමු තරගාවලිය වීමට නියමිතව තිබුනා.
මේ ප්‍රහාරයෙන් පසුව වැඩිවෙමින් තිබෙන දැඩි මහජන කෝපයට ඇෆ්ගන් ජාතික ක්‍රිකට් කණ්ඩායමේ නායක රෂිඩ් ඛාන් ද එක්ව සිටින්නේ ගුවන් ප්‍රහාරය ඉතා දරුණු අපරාධයක් ලෙස හඳුන්වමින් ඊට ජාත්‍යන්තර අවධානය යොමු කරන ලෙසට ඉල්ලා සිටිමින්. “ක්‍රිකට් ක්‍රීඩාවෙන් බලාපොරොත්තු වන්නේ සමගි වීම හා සදාචාරාත්මක උසස් වීමක්. නමුත් අපේ ජනතාව ගඩොල් කැබලි යට වළලන විට අපි කොහොමද ක්‍රීඩා කරන්නේ?” යනුවෙන් රෂිඩ් සමාජ මාධ්‍යයේ පෝස්ටුවක් තබා තිබෙනවා.
“මේ හිංසා කරන්නන් විසින් අහිංසක වැසියන් හා අපේ දේශීය ක්‍රිකට් ක්‍රීඩකයන් සමූල ඝාතනය කිරීම අති සාහසික, සමාව දිය නොහැකි අපරාධයක්” යනුවෙන් ඇෆ්ගන් ජාත්‍යන්තර ක්‍රිකට් ක්‍රීඩක ෆසාල්හක් ෆරූකි මුහුණුපොතේ සටහන් කර තිබෙනවා.
පාකිස්තානය සමග ක්‍රීඩා කිරීම ප්‍රතික්ෂේප කිරීමෙන් ඇෆ්ගනිස්තානය රතු ඉරක් ඇඳ තිබෙනවා. ලේ ගැලීමේ සෙවණැල්ලෙන් ක්‍රීඩාව ඉදිරියට යා නොහැකි බව ඒ රේඛාවයි. ඇෆ්ගනිස්තානයේ මේ තීරණය විසින් පාකිස්තානය තවදුරටත් හුදෙකලා කරනු ලබන්නේ කලාපයේ ක්‍රීඩා හා ජාත්‍යන්තර සබඳතා කවයේ ඔවුන්ගේ දැනටමත් බිඳී තිබෙන ප්‍රතිරූපයට තවත් හානි සිදු කරමින්.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
