මෙම තරගයේ පළමුවෙන් පන්දුවට පහරදුන් දකුණු අප්‍රිකානු කණ්ඩායම කඩුළු 6ක් දැවී ලකුණු 187ක් රැස්කර ගැනීමට සමත් විය. අනතුරුව පිටියට පැමිණි ඇෆ්ගනිස්ථාන කණ්ඩායම ද පන්දුවාර 19යි පන්දු 4කදී සියලුදෙනා දැවී ලකුණු 187ක් රැස්කර ගත්තේය.
ඒ අනුව තරගය සමවීම හේතුවෙන්, සුපිරි පන්දුවාරයක් ක්‍රියාත්මක වූ අතර, එහිදී ද කණ්ඩායම් දෙකම ලකුණු 17 බැගින් රැස්කර ගැනීම හේතුවෙන්, යළිත් වරක් සුපිරි පන්දුවාරයකට යාමට සිදුවිය. ඒ අනුව දෙවැනි සුපිරි පන්දුවාරයේදි දකුණු අප්‍රිකාව පළමුවෙන් පන්දුවට පහරදී ලකුණු 23ක් රැස්කර ගැනීමට සමත් විය.
අනතුරුව පිටියට පැමිණි ඇෆ්ගනිස්ථාන කණ්ඩායමට දෙවැනි සුපිරි පන්දුවාරයේදි කඩුළු 2ක් දැවී රැස්කර ගත හැකි වූයේ ලකුණු 19ක් පමණී. ඒ අනුව දකුණු අප්‍රිකාවට ලකුණු 4ක් තියුණු ජයක් හිමිවිය. මෙම තරගය පන්දුවාර විස්ස ලෝක කුසලාන ක්‍රිකට් ඉතිහාසයේ ඉතිහාසගත වන සිදුවීමක් බවට පත්ව තිබේ. ඒ, සුපිරි පන්දුවාර දෙකක් (Double Super Over) ක්‍රියාත්මක වූ ප්‍රථම තරගය මෙයවීම හේතුවෙනි.
