ලෝක මත්ද්‍රව්‍ය විරෝධී ඒජන්සිය හා ජාත්‍යන්තර ඔලිම්පික් කමිටුව විසින් වගකීමක් නැති සහ දුරාචාර ක්‍රියාවක් ලෙසින් හෙළා දැක තිබෙන මේ ක්‍රීඩා උළෙලට පිරිසිදු ශක්තියෙන් සහභාගි වූ අමෙරිකානු පිහිනුම් ක්‍රීඩක හන්ටර් ආම්ස්ට්රෝං මීටර් 50 පසුපස ආර ඉසව්ව ඩොලර් 350,000ක ත්‍යාග මුදලක් ද හිමි කර ගනිමින් ජය ගැනීම විශේෂත්වයක්.
ඉරිදා පැවති මේ මතභේදාත්මක අලුත් ක්‍රීඩා උළෙලේ සමාරම්භය සම්පූර්ණයෙන්ම අසාර්ථක වුනේ එහි යූටියුබ් විකාශනය ආරම්භ වී මිනිත්තු හතක් පමණක් ගතවීමෙන් පසුව එය මිනිත්තු 11ක කාලයකට ක්‍රියාවිරහිත වීම නිසා. මේ තාක්ෂණික ප්‍රශ්නය විසඳා ගැනීමෙන් පසුව, Enhanced Games උළෙලේ විවේචකයන් හා පිරිසිදු ක්‍රීඩාවට පක්ෂව කතා කරන්නන්ට කුඩා ජයග්‍රහණයක් භුක්ති විඳීමට අවස්ථාව උදා කරමින් දෙවතාවක ඔලිම්පික් ක්‍රීඩකයෙකු වන ආම්ස්ට්‍රෝං‌ගේ ජයග්‍රහණය සිදුවුණා.
මීටර් 50 පසුපස ආර පිහිනුම් ඉසව්වේ හිටපු ලෝක වාර්තාලාභියෙකු වන ආම්ස්ට්රෝං, තත්පර 24.21කින් තරගය පළමුව අවසන් කළේ ශරීර වර්ධක මත්ද්‍රව්‍ය භාවිතා කරමින් මේ ක්‍රීඩා උළෙලට සහභාගි වූ ක්‍රීඩකයින් 36 දෙනාගෙන් කෙනෙකු වූ අයර්ලන්තයේ ෂේන් රයන් (25.23) පරාජය කරමින්.
ආම්ස්ට්රෝං සටහන් කළ කාලය රුසියානු පිහිනුම් ක්‍රීඩක Kliment Kolesnikov ගේ ලෝක වාර්තාවෙන් තත්පර 0.66ක් පිටතින් තිබුණා.
දෙවතාවක් ඔලිම්පික් රන් පදක්කම් දිනා ගත් ආම්ස්ට්රෝං මේ තහනම් ශරීර වර්ධනයේ ක්‍රීඩා උළෙලට ඉදිරිපත් වුනේ 2024 පැරිස් ඔලිම්පික් ක්‍රීඩා උළෙලේ ඔහුගේ අනුග්‍රාහකයා ඉවත් වීමෙන් පසුව ඇතිවූ ආර්ථික දුෂ්කරතා හේතුවෙන්.
ඔහුගේ මේ නවතම ජයග්‍රහණය විසින් සම්ප්‍රදායික තරග බිමේ ජයග්‍රහණයකින් ලැබෙන මුදලට වඩා සැලකිය යුතු මුදලක් ඔහුට උපයා දී තිබෙනවා. ආම්ස්ට්රෝං, තම උපන් බිමේ පැවැත්වෙන 2028 ලොස් ඇන්ජලීස් ඔලිම්පික් ක්‍රීඩා උළෙලේ තරග කිරීම සඳහා ඔහුට තිබෙන ආශාව ප්‍රකාශ කර තිබෙනවා.
කෙසේ වෙතත්, Enhanced Games ක්‍රීඩා උළෙලට සම්බන්ධ වන කිසිම ක්‍රීඩකයෙකුට ලෝක ශූරතාවලිය හෝ ඔලිම්පික් ක්‍රීඩා උළෙලට සහභාගි විය නොහැකි බවට ලෝක ජලක්‍රීඩා සම්මේලනය තර්ජනය කර තිබෙනවා.
හන්ටර් ආම්ස්ට්රෝං මීටර් 100 නිදහස් ආර පිහිනුම් ඉසව්වේ ද දෙවැනි ස්ථානය හිමිකර ගනිමින් තවත් ඩොලර් 125,000ක් ඔහුගේ ත්‍යාග මුදල්වලට එකතු කරගෙන තිබෙනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
