තරගය තහනම් කර තිබෙන්නේ එය ක්‍රීඩා කිරීමට සැලසුම් කර තිබූ දකුණු ස්පාඤ්ඤයේ La Linea de la Concepcion නගරයේ පුරපති විසින්.
කොංගෝ සහ චිලී අතර ජූනි 9 තරගය පැවැත්වීම තහනම් කරන නිල නියෝගයට තමා අත්සන් කළ බව ජුවාන් ෆ්‍රැන්කෝ නගරාධිපති ප්‍රකාශ කර තිබෙනවා. මෙය ‘පෙර පරෙස්සම’ අනුව ගත් පියවරක් බවත් තමා පිළිපැද තිබෙන්නේ රජයේ සෞඛ්‍ය සේවාවේ නිර්දේශ බවත් ෆ්‍රැන්කෝ පවසනවා.
ගිබ්රාල්ටාව සමීපයේ පිහිටි 65,000ක ජනගහණයක් සිටින La Linea නුවර නගරාධිපති තවදුරටත් කියා සිටින්නේ මහ නගර සභාවේ වෛද්‍ය සේවාවේ ප්‍රධානියා ද මේ තරගය නොපවත්වන ලෙසට උපදෙස් දුන් බවයි. තරගය පැවැත්වීමෙන් ඇති විය හැකි සෞඛ්‍යමය අවදානම කෙරෙහි මෙහිදී සැලකිල්ල යොමුව තිබෙනවා.
1974 වසරෙන් පසුව ප්‍රථම වතාවට ලෝක කුසලාන පාපන්දු තරගාවලියට සුදුසුකම් ලබා සිටින කොංගෝ ප්‍රජාතන්ත්‍රවාදී සමූහාණ්ඩුවේ පාපන්දු කණ්ඩායම ඊයේ බෙල්ජියමේ ලියේජ් නගරයේදී ඩෙන්මාර්කය සමග මිත්‍ර තරගයක් පැවැත්වීමට නියමිතව තිබුණා.
පසුගිය මාසයේ රටේ ඉබෝලා වෛරසය පැතිර යාමෙන් පසුව තම රටේ පැවැත්වීමට නියමිතව තිබූ පූර්ව-ලෝක කුසලාන පුහුණු කඳවුරක් අහෝසි කළ කොංගෝ කණ්ඩායම ඒ වෙනුවට බෙල්ජියමේ පුහුණු වෙමින් සිටිනවා.
කොංගෝ කණ්ඩායම ලෝක කුසලාන තරගාවලිය සඳහා අමෙරිකාව ට ඇතුළු කරගැනීමට පෙර ඔවුන් දින 21ක් හුදෙකලාව සිටිය යුතු බවට අමෙරිකානු බලධාරීන් අවධාරණය කර තිබෙනවා.
තරගාවලිය අතරතුර හියුස්ටන් නගරයේ කඳවුරු බැඳ ගැනීමට කොංගෝ කණ්ඩායම සැලසුම් කර තිබෙනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
