ලෝක කුසලාන පාපන්දු තරගාවලිය අතරතුර එංගලන්ත කණ්ඩායමේ පුහුණු කඳවුර හා හෝටලය බවට පත්වන ස්ථානයේ සිට සැතපුම් හතරක පමණ දුරින් සෙනසුරාදා පෙරවරු 4.00 ට පමණ සිදුවූ මේ වෙඩි තැබීමෙන් පසුව පොලිසිය කැඳවනු ලැබුවා.
සිද්ධියෙන් තුවාල ලබා සිටි වැඩිහිටි කාන්තාවන් තිදෙනෙක් වහාම රෝහලට රැගෙන යනු ලැබූ අතර වෙඩි වැදුනු වැඩිහිටියන් නව දෙනා විවිධ නාගරික රෝහල් වෙත ගෙන ගිය බව කැන්සාස් පොලිස් දෙපාර්තමේන්තුව ප්‍රකාශ කළා.
මේ සියලු දෙනාටම ඇත්තේ ජීවිත තර්ජන නැති තුවාල බව වාර්තා වනවා. මේ සම්බන්ධයෙන් කිසිවෙක් අත්අඩංගුවට ගෙන නැති අතර වැඩිදුර පරීක්ෂණ පැවැත්වෙනවා.
සිද්ධිය ඇතිවුනේ එංගලන්ත කණ්ඩායම ලෝක කුසලාන තරගාවලිය සඳහා කැන්සාස් නගරයට ඒමට නියමිත දිනයට දවස් කිහිපයක් තිබියදී. ඔවුන් දැනට ෆ්ලොරිඩාවේ රැඳී සිටින්නේ ලෝක කුසලාන තරගාවලිය වෙනුවෙන් අවසන් පුහුණුවීම්වල නිරත වෙමින්. කණ්ඩායම කැන්සාස් නගරයට පැමිණීමට නියමිතව තිබෙන්නේ ලබන සෙනසුරාදා (13).
එංගලන්තය ට අමතරව තවත් ප්‍රධාන ජාත්‍යන්තර කණ්ඩායම් දෙකක් වන ආජන්ටිනාව හා නෙදර්ලන්තයේ ක්‍රීඩකයින් ද නැවතී සිටින්නේ කැන්සාස් නගරයේ.
මේ වෙඩි තැබීමෙන් නැවත වතාවක් මතුකර දක්වා තිබෙන්නේ අමෙරිකාවේ තුවක්කු සංස්කෘතිය යි. 2025 වසර තුළ 400කට වැඩි සමූහ වෙඩි තැබීම් එරටින් වාර්තා වී තිබෙනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
