ඉන්දීය සුපිරි තරුව සූරියවංශි ලංකාවේ මතුලන් සමඟ පටලැවෙයි! - දඹුල්ලේ දී ශ්‍රී ලංකා 'ඒ' පිලට සුපිරි පන්දුවාරයේ ඓතිහාසික ජයක්!

සදීර සමරවික්‍රමගෙන් ලකුණු 93ක ඉනිමක්: පන්දුවාර 50 නිමවෙද්දී ලකුණු සමවෙයි!

නීති ගැන ඉන්දීය නායකයා විනිසුරුවන් සමඟ වාද කරයි: අවසානයේ සුපිරි පන්දුවාරයෙන් ලංකාව පෙරමුණට!

දඹුල්ල ජාත්‍යන්තර ක්‍රිකට් ක්‍රීඩාංගණයේදී ඊයේ (15) පැවැති ශ්‍රී ලංකා 'ඒ' සහ ඉන්දීය 'ඒ' කණ්ඩායම් අතර තරගය නිමාවට පත්වූයේ දැඩි නොසන්සුන්කාරී වාතාවරණයක් මධ්‍යයේය.

තරගයේ පරාජය දරාගත නොහැකිව ඉන්දීය 15 හැවිරිදි යොවුන් පිතිකරු වෛභව් සූරියවංශි, ශ්‍රී ලංකා වේගපන්දු යවන ක්‍රීඩක කගුදාස් මතුලන් සමඟ පිටියේදීම උණුසුම් වචන හුවමාරුවක සහ තල්ලු කරගැනීමක නිරත විය. තත්ත්වය තවත් නරක අතට හැරීමට පෙර ශ්‍රී ලංකා නායක නිරෝෂන් දික්වැල්ල වහා මැදිහත් වී ගැටුම සමනය කිරීමට පියවර ගත්තේය.

ලකුණු සමවීම සහ විනිසුරු සංවාදය

ශ්‍රී ලංකාව, ඉන්දියාව සහ ඇෆ්ගනිස්ථානය 'ඒ' කණ්ඩායම්වල සහභාගීත්වයෙන් පැවැත්වෙන මෙම එක්දින තරගාවලියේ ඊයේ තරගයේ මුලින්ම පන්දුවට පහරදුන් ඉන්දීය 'ඒ' කණ්ඩායම නියමිත පන්දුවාර 50 අවසානයේ ලකුණු 265ක් රැස් කළේය. එහිදී සූර්යන්ශ් ෂෙජ් ලකුණු 72ක් සහ විප්‍රජ් නිගම් ලකුණු 51ක් ලබාගත් අතර, ලංකාව වෙනුවෙන් විජයකාන්ත් වියස්කාන්ත් කඩුලු 3ක් දවාගත්තේය. 

පිළිතුරු ඉනිම ක්‍රීඩා කළ ශ්‍රී ලංකා 'ඒ' කණ්ඩායම වෙනුවෙන් සදීර සමරවික්‍රම විශිෂ්ට ලකුණු 93ක් සහ නායක නිරෝෂන් දික්වැල්ල ලකුණු 37ක් රැස් කළහ. ශ්‍රී ලංකා පිලද පන්දුවාර 50 අවසානයේ කඩුලු 9කට ලකුණු 265ක්ම රැස් කිරීම නිසා තරගය සම විය (Tie). ඉන් අනතුරුව, එක්දින තරග සඳහා සුපිරි පන්දුවාරයක් පැවැත්වීමට නීතිමය ප්‍රතිපාදන නොමැති බව පවසමින් ඉන්දීය නායක තිලක් වර්මා ඇතුළු ක්‍රීඩකයින් විනිසුරුවන් සමඟ විනාඩි 10ක් පමණ උණුසුම් සාකච්ඡාවක නිරත වුවද, විනිසුරුවෝ ජයග්‍රහකයින් සෙවීම සඳහා සුපිරි පන්දුවාරයක් ප්‍රකාශයට පත් කළහ.

මතුලන් ඉන්දියාව මෙල්ල කරයි 

සුපිරි පන්දුවාරයේදී ප්‍රථමයෙන් පන්දුවට පහරදුන් ශ්‍රී ලංකා කණ්ඩායම ලකුණු 16ක් රැස් කිරීමට සමත් විය. ලකුණු 17ක ජයග්‍රාහී ඉලක්කයක් හඹා යාමට පැමිණි ඉන්දීය පිලට, ශ්‍රී ලංකා වේගපන්දු යවන ක්‍රීඩක කගුදාස් මතුලන් හමුවේ රැස්කරගත හැකි වූයේ ලකුණු 9ක් පමණි. එහිදී අවසන් පන්දු තුනට මුහුණ දුන් සූරියවංශිට ලබාගත හැකි වූයේ ලකුණු 6ක් පමණි.

ඒ අනුව ශ්‍රී ලංකා 'ඒ' කණ්ඩායම සුපිරි පන්දුවාරයේදී විශිෂ්ට ජයක් වාර්තා කළේය. තරගයෙන් පසු සූරියවංශි සහ මතුලන් අතර ඉහත කී ගැටුම හටගත්තේ ශ්‍රී ලංකා ක්‍රීඩකයින් ජයග්‍රහණය සමරමින් සිටි අවස්ථාවේදීය. කෙසේ වෙතත්, මෙම ජයග්‍රහණයත් සමඟ සහභාගී වූ තරග 3න් තරග 2ක්ම ජය ගනිමින් ප්‍රසාද ලකුණු සටහන ඉදිරියෙන්ම සිටීමට ශ්‍රී ලංකා 'ඒ' කණ්ඩායම සමත්ව සිටියි.