සෞදි අරාබිය සමග තරගය ගෝල් රහිතව අවසන් කරමින් කේප් වර්ඩ් ඔවුන්ගේ මංගල ලෝක කුසලාන පාපන්දු තරගාවලියේ පිළිමළුන් පිටුදැකීමේ වටයට ‘එච්’ කොටසින් සුදුසුකම් ලැබුවේ එහි අනුශූරයින් ලෙස වීම විශේෂත්වයක්. ඔවුන් දෙවතාවක් ලෝක කුසලාන ජයග්‍රාහකයින් වූ උරුගුවේ හා 2034 ලෝක කුසලාන සත්කාරක රට වන සෞදි අරාබිය ට වඩා එක ලකුණක් ඉහළින් සිටිමින් එම කොටසේ දෙවැනි ස්ථානයට පත්වුණා. මීට අමතරව කේප් වර්ඩ්, පළමු වරට ක්‍රීඩා කරන ලෝක කුසලාන තරගාවලියක මූලික වටයේ අපරාජිතව රැඳී සිටීමට සමත් වූ තෙවැනි අප්‍රිකානු රට ලෙසින් ද ඉතිහාස පොතට ඇතුළු වුණා.
කේප් වර්ඩ් ප්‍රබල ස්පාඤ්ඤය ට එරෙහි පළමු තරගය ඇදහිය නොහැකි අයුරින් ගෝල් රහිතව අවසන් කර ගත් අතර එහිදී ඔවුන්ගේ 40 හැවිරිදි ගෝල්රකින ක්‍රීඩක වෝසීන්යා තරගයේ වීරයා වුණා. ඉන්පසුව මේ කණ්ඩායම උරුගුවේ සමග තරගය ගෝල් 2-2 සම තත්ත්වයෙන් අවසන් කර ගත්තා.
අත්ලාන්තික් සාගරයේ දූපත් 10ක සමූහයක් නියෝජනය කරන මේ කණ්ඩායමට ලැබී තිබෙන ත්‍යාගය වන්නේ වර්තමාන ලෝක කුසලාන ශූරයින් වන ආජන්ටිනාව සමග ජූලි 3 වැනිදා මයාමි ක්‍රීඩාංගණයේදී අවසන් කණ්ඩායම් 32 වටයේ තරගයක්.
සෞදි අරාබිය ට එරෙහි තරගයේ අවසන් විසිල් නාදය නිකුත් වූ විගස ජංගම දුරකථනයක් වටා රොක්වූ කේප් වර්ඩ් ක්‍රීඩකයෝ උරුගුවේ හා ස්පාඤ්ඤය අතර පැවැත්වෙමින් තිබූ තරගයේ අවසානය නැරඹුවා. උරුගුවේ කණ්ඩායමේ ගෝල් 1-0ක පරාජයට ස්තූතිවන්ත වන්නට තමන්ගේ වික්‍රමාන්විත ලෝක කුසලාන සංචාරය නොකඩවා පවත්වාගන යා හැකි බවට තහවුරු වූ විට පිටිය මෙන්ම ක්‍රීඩා මණ්ඩපය ද කේප් වර්ඩ් ප්‍රීතියේ හා ආඩම්බරයේ කඳුළින් තෙත් වුණා.
525,000ක ජනතාවක් පමණක් වාසය කරන මේ රට ඊට වඩා බොහෝ ක්‍රීඩා ලෝලීන්ගේ හදවත් ඔවුන්ගේ මේ ආකර්ෂණීය සංචාරයේදී දිනාගෙන තිබෙන්නේ පාපන්දුවට ගෙන ආ හැකි ප්‍රීති ප්‍රමෝදය පිළිබඳව ජනතාවට මතක් කරමින්.
2006 වසරේදී ඝානා දේශයෙන් පසුව ලෝක කුසලානයට මංගල වතාවට ක්‍රීඩා කරමින් තරගාවලියේ මූලික වටය පසුකර ඉදිරියට ගිය පළමු අප්‍රිකානු රට කේප් වර්ඩ් වන අතර ඔවුන්ගෙන් ප්‍රබල අභියෝගයක් ලයනල් මෙසීගේ ආජන්ටිනාව ට එල්ල වනු ඇති බවට සැකයක් නැහැ.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
