කිලෝග්‍රෑම් 65න් ලෝකඩ දිනූ ෆස්රින් සහ සෙන්ටිමීටර් 167න් 4 වැනි ස්ථානය ගත් මධුසංකගෙන් විශිෂ්ට දක්ෂතා
ආසියානු හෝ ලෝක මට්ටමේ මෙතෙක් නොගිය 'මිශ්‍ර යුගල' ඉසව්වට ෆස්රින් සහ නිතාෂා හෙට පිටියට
භූතානයේ තිම්පු නුවරදී පැවැත්වෙන 16 වැනි දකුණු ආසියානු කායවර්ධන හා ෆිසික් ක්‍රීඩා ශූරතාවලියේ (2026) පළමු තරඟ දිනයේදීම ශ්‍රී ලංකා කණ්ඩායම රන් සහ ලෝකඩ පදක්කම් ඇතුළු ඓතිහාසික ජයග්‍රහණ රැසක් රටට දිනා දීමට සමත් වී තිබේ.
දකුණු ආසියානු කායවර්ධන හා ෆිසික් ක්‍රීඩා සම්මේලනයේ (SABPF) අධීක්ෂණය යටතේ පැවැත්වෙන මෙම තරඟාවලියේදී ලාංකීය ක්‍රීඩක ක්‍රීඩිකාවන් ජාත්‍යන්තර වාර්තා කිහිපයක්ම මෙරට ක්‍රීඩා ඉතිහාසයට එක් කළහ.
නිතාෂා සහ ෆස්රින් තැබූ ඓතිහාසික සලකුණු
මෙරට කාන්තා ක්‍රීඩා ඉතිහාසය උඩුයටිකුරු කරමින්, නිතාෂා ක්‍රීඩිකාව කාන්තා ශාරීරික යෝග්‍යතා (Athletic Physique) ඉසව්වෙන් රන් පදක්කම දිනාගැනීමට සමත් වූවාය.
පළමු රන් පදක්කම:
දකුණු ආසියානු කායවර්ධන ශූරතාවලියක ඕනෑම කාන්තා ඉසව්වකින් ශ්‍රී ලංකාව වෙනුවෙන් රන් පදක්කමක් දිනාගත් පළමු ක්‍රීඩිකාව මෙන්ම, මෙම ඉසව්ව නියෝජනය කළ ප්‍රථම ලාංකික ක්‍රීඩිකාව වන්නේ ද ඇයයි.
පිරිමි අංශයේ දක්ෂතා:
පිරිමි ජ්‍යෙෂ්ඨ කායවර්ධන කිලෝග්‍රෑම් 65ට අඩු ඉසව්වෙන් තරඟ වැදුණු ෆස්රින් ලෝකඩ පදක්කම දිනාගත්තේය. ඔහු මෙම බර පන්තියෙන් දකුණු ආසියානු පදක්කමක් දිනූ පළමු ශ්‍රී ලාංකිකයා වන අතර, පිරිමි කණිෂ්ඨ කායවර්ධන ඉසව්වෙන් 5 වන ස්ථානය දිනා ගනිමින් ප්‍රථම පස්දෙනා අතරට පැමිණි පළමු ශ්‍රී ලාංකිකයා ලෙසද ඔහු නව වාර්තාවක් පිහිටෙව්වේය.
මධුසංකගේ දක්ෂතාව සහ හෙට දිනයේ තීරණාත්මක තරඟය
පිරිමි ශාරීරික යෝග්‍යතා (Athletic Physique - උස සෙන්ටිමීටර් 167ට වැඩි) ඉසව්ව නියෝජනය කළ මධුසංක 4 වැනි ස්ථානය හිමිකර ගනිමින් ශ්‍රී ලංකාව වෙනුවෙන් ප්‍රබල සටනක් දීමට සමත් විය.
තරඟාවලියේ අවසන් දිනය වන හෙට (ජූලි 05) ශ්‍රී ලංකාව වෙනුවෙන් තවත් තීරණාත්මක ඉසව්වක් පැවැත්වීමට නියමිතය. එහිදී ෆස්රින් සහ නිතාෂා එක්ව 'මිශ්‍ර යුගල' (Mixed Pairs) ඉසව්ව සඳහා තරඟ වදිනු ඇත. දකුණු ආසියානු, ආසියානු හෝ ලෝක කායවර්ධන ශූරතාවලියකදී මෙවැනි මිශ්‍ර යුගල ඉසව්වක් නියෝජනය කරන පළමු ශ්‍රී ලාංකික ක්‍රීඩක ක්‍රීඩිකා යුවළ බවට පත්වන්නේ ද මොවුන් දෙදෙනාය.
