ඔහු මේ තීරණය ගෙන තිබෙන්නේ නෝවේ කණ්ඩායම හමුවේ පරාජය වෙමින් බ්‍රසීලය මෙවර ලෝක කුසලාන තරගාවලියෙන් ඉවතට විසිවීමෙන් පසුව.
නේමාගේ මේ ප්‍රකාශයත් සමග, තරග 129කදී ගෝල් 80ක් වාර්තා කරමින් බ්‍රසීලයේ එදා මෙදා තුර වැඩිම ගෝල්ලාභියා ලෙස තිබූ වසර 16ක ඔහුගේ ක්‍රීඩා දිවිය අවසන් වනවා.
බ්‍රසීලය වෙනුවෙන් නේමාගේ අවසාන නියෝජනය සිදුවුනේ අමෙරිකාවේ නිව් ජර්සි නගරයේ මෙට්ලයිෆ් ක්‍රීඩාංගණයේ අද පැවති 2026 ලෝක කුසලාන පාපන්දු ‘කණ්ඩායම් 16 දෙනාගේ වටයේ’ තරගයේ ආදේශ ක්‍රීඩකයෙකු ලෙසින්. මෙය 2010 වසරේදී ඔහු බ්‍රසීලය වෙනුවෙන් මංගල තරගයට සහභාගි වූ ක්‍රීඩාංගණය ද වීම දෛවෝපගත සිදුවීමක්. හිටපු බාසිලෝනා හා පැරිස් සැන්-ජමෑන් සමාජයීය ක්‍රීඩක නේමා අද පැවති තරගයේදී නෝවේ ට එරෙහිව පෙනල්ටියක් ලබා ගත්ත ද, එය බ්‍රසීලය තරගාවලියෙන් ඉවතට විසිවීම වැළැක්වීමට ප්‍රමාණවත් වුනේ නැහැ.
නෝවේ විසින් බ්‍රසීලය තරගාවලියෙන් ඉවත් කරද්දී නේමා සැනසිය නොහැකි පුද්ගලයෙක් ලෙස වේදනාවට පත්ව සිටියා. තරගයේ අවසන් විසිල් හඬ නිකුත් වීමෙන් පසුව ඔහු නොනවත්වා හඬා වැටෙන අයුරු දැකීමෙන් බොහෝ ක්‍රීඩා ලෝලීන්ගේ හදවත් බිඳී ගියා. ඔහුගේ කණ්ඩායම් සගයින් කිහිප දෙනෙකුම ඔහුව සැනසීමට උත්සාහ කළත් මේ පරාජය නේමාව සම්පූර්ණයෙන් කම්පනයට පත් කර තිබුණා.
“මම උත්සාහ කළා, මම උත්සාහ කළා” යනුවෙන් ඔහු තරගයෙන් පසුව කියා සිටියා. “මම පටන් ගත්තේ මෙතැනින්, මම අවසන් කළේත් මෙතැනින්.”
බ්‍රසීල ජාතික පාපන්දු කණ්ඩායම සමග නේමාගේ කාලය අවසන් වූවත්, ඔහු සිය අනාගතය ක්‍රීඩා වාරයෙන් වාරයට ඇගයීමට ලක් කරමින් තවදුරටත් සන්තොස් පාපන්දු සමාජය සමග ඔහුගේ ක්‍රීඩාව දිගටම කරගෙන යනු ඇතැයි වාර්තා වනවා.
නෝවේ හමුවේ ලත් පරාජය ලෝක කුසලාන තරගාවලියන් හිදී යුරෝපීය ප්‍රතාවාදීන්ට එරෙහි බ්‍රසීලයේ අතිශයින් අප්‍රසන්න වාර්තාව සලකුණු කරනවා. පස් වතාවක් ශූරයින් වූ බ්‍රසීලය 2002 ලෝක කුසලාන අවසාන තරගයේදී ජර්මනිය පැරදවීමෙන් පසුව මේ දක්වා යුරෝපීය ප්‍රතිවාදීන් පරාජය කර නැහැ.
බ්‍රසීලය ට කලින්ම ලැබුනු පෙනල්ටිය වළක්වනු ලැබීම මත රැඳී තිබූ අද තරගයේ නෝවේ වෙනුවෙන් පසු කාලයේදී ගෝල් දෙකක් ලබා ගත්තේ මෙවර තරගාවලියේ වඩාත්ම බියජනක ආක්‍රමණශීලී ක්‍රීඩකයා බවට පත්ව සිටින අර්ලිං හාලන්ඩ්. තරගයේ අතිරේක කාලයේදී නේමා ලබා ගත් පෙනල්ටිය සැනසිලිදායක ගෝලයක් පමණක් බවට පත්වුණා. එය ක්‍රීඩකයෙකු වශයෙන් බ්‍රසීල කමිසය සමග නේමාගේ අන්තිම මොහොත ද සනිටුහන් කළා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
