"ජීවිතය වගේම ක්‍රීඩාවත් අසාධාරණයි" - මොහොමඩ් සලාට දුන් කැපී පෙනෙන බාධා කිරීම් සහ මැක් ඇලිස්ටර්ගේ ඇදීම් බල්ලට දමා ඇති බවට පුහුණුකරු හොසාම් හසන්ගෙන් ප්‍රහාරයක්
ෆීෆා ලෝක කුසලාන පාපන්දු ඉතිහාසයේ තමන් ලැබූ විශිෂ්ටතම ජයග්‍රහණය අභිමුව සිටි ඊජිප්තු කණ්ඩායම, වත්මන් ලෝක ශූර ආර්ජන්ටිනාව හමුවේ 3-2ක් ලෙස අවසන් මොහොතේ ලැබූ පරාජයත් සමඟ සමස්ත තරගාවලියේ විශ්වසනීයත්වය පිළිබඳ බරපතල ප්‍රශ්නාර්ථයක් මතු කර තිබේ.
ඇට්ලන්ටා ක්‍රීඩාංගණයේ පැවැති මෙම තීරණාත්මක අර්ධ අවසන් පූර්ව වටයේ තරගය නිම වීමට මිනිත්තු 12ක් පවතිද්දී 2-0ක් ලෙස පෙරමුණේ පසුවූයේ ඊජිප්තුවයි. එහෙත් ප්‍රංශ ජාතික විනිසුරු ෆ්‍රන්ෂුවා ලෙටෙක්සියර්ගේ (François Letexier) මතභේදාත්මක තීරණ කිහිපයක් හමුවේ තරගය ආර්ජන්ටිනාව දෙසට හැරී ගියේ ඊජිප්තු ක්‍රීඩකයන් මෙන්ම සමස්ත පුහුණුකාරීත්වය ද දැඩි කෝපයට පත් කරවමිනි.
මිනිත්තු 4ක ඇතුළත සිදු වූ පෙරළිය සහ VAR මතභේදය
තරගයේ 15 වැනි මිනිත්තුවේදී යසර් ඉබ්‍රාහිම් ලබා දුන් ගෝලයත් සමඟ ඊජිප්තුව මුල සිටම තරගයේ පාලනය තමන් සතු කරගෙන සිටියේය. ඊජිප්තු ගෝල රකින ක්‍රීඩක මොස්ටාෆා ෂොබෙයාර්, ලයනල් මෙසී එල්ල කළ දඬුවම් පහරක් ද විශිෂ්ට ලෙස වැළැක්වීය.
ගෝලය අවලංගු කිරීම:
ඊජිප්තුව 1-0ක් ලෙස පෙරමුණේ සිටියදී මොස්ටාෆා සිකෝ විසින් වාර්තා කළ දෙවැනි ගෝලය, වීඩියෝ සහකාර විනිසුරු (VAR) විසින් අවලංගු කරන ලදී. ඊට හේතුව ලෙස දැක්වුණේ මැදපෙළ ක්‍රීඩක මාර්වන් ඇටියා විසින් ආර්ජන්ටිනාවේ ලිසැන්ඩ්‍රෝ මාටිනෙස්ගේ පාදය මත සුළු වශයෙන් පය තැබීමයි.
ආර්ජන්ටිනාවේ නැගිටීම:
ඉන්පසු ක්‍රියාත්මක වූ ආර්ජන්ටිනාවේ ක්‍රිස්ටියන් රොමේරෝ 79 වැනි මිනිත්තුවේදී පළමු ගෝලය වාර්තා කළ අතර, මිනිත්තු හතරකට පසු (83 වැනි මිනිත්තුවේදී) නායක ලයනල් මෙසී ගෝල සංඛ්‍යාව 2-2ක් ලෙස සම කළේය. අවසානයේ අතිරේක කාලයේ (විවේක කාලයේ) දෙවැනි මිනිත්තුවේදී එන්සෝ ෆර්නැන්ඩස් හිසෙන් එල්ල කළ ප්‍රහාරයකින් ආර්ජන්ටිනාවේ ජයග්‍රහණය සනිටුහන් විය.
"මෙසීව තරගාවලියේ තියාගන්න කළ වැඩක්" - පුහුණුකරු
තරගයෙන් පසු මාධ්‍ය හමුවේ අදහස් දැක්වූ ඊජිප්තු කණ්ඩායමේ ප්‍රධානී හොසාම් හසන් සහ ඉදිරිපෙළ ක්‍රීඩක මොස්ටෆා සිකෝ විනිසුරුවරුන්ගේ ක්‍රියාකලාපය සෘජුවම විවේචනය කළහ.
පැහැදිලි පාවාදීමක්:
"විනිසුරුවරයා පැහැදිලිවම සාධාරණ වුණේ නැහැ. ලෝක ශූර ආර්ජන්ටිනාවට එරෙහිව 2-0ක් තියාගෙනත් අපට පැරදෙන්න වුණේ මේ තරගාවලිය පාවා දීමක් සිදුවූ නිසයි" යනුවෙන් මොස්ටෆා සිකෝ පැවසීය.
බලපෑම් එල්ල වීම:
වත්මන් ශූරයන්ට තරගය ජය ගැනීමට තත්පර කිහිපයකට පෙර මොහොමඩ් සලා ආර්ජන්ටිනාවේ දඬුවම් සීමාව තුළදී බාධා කිරීමකට ලක් වුව ද VAR පරීක්ෂාවකට හෝ නොගිය බව ප්‍රධාන පුහුණුකරු හසන් පැවසීය. ඇලෙක්සිස් මැක් ඇලිස්ටර් විසින් කමිසයෙන් ඇදීම ද විනිසුරුවන් නොසලකා හැර තිබිණි.
"සමහර විට ඔවුන්ට අවශ්‍ය වුණේ ලෝක ශූරයන් සහ ලයනල් මෙසීව තවදුරටත් තරගාවලියේ තබා ගන්න වෙන්න ඇති. මේ ප්‍රතිඵලය පිටුපස ආර්ජන්ටිනාව පැත්තෙන් ආපු ලොකු බලපෑමක් පේන්න තියෙනවා" යැයි හසන් වැඩිදුරටත් අවධාරණය කළේය.
