අප්රිකානු කුසලාන පාපන්දු ශූරතාවලිය (AFCON) ආරම්භ වීමට පෙර දිනයේදී ඇල්ජීරියානු කණ්ඩායම ඔත්තු බැලීමේ සිද්ධියක පැටලුනා.
ඒ, තරගාවලිය පැවැත්වෙන අයිවරි කෝස්ට් හි ඔවුන් පුහුණු වෙමින් සිටියදී ඩ්රෝන යානයක් ක්රීඩකයන්ට ඉහළින් පියාසර කළ බැවින්.
Riyad Mahrez, Rayan Ait-Nouri, Islam Slimani හා Ismael Bennacer වැනි ක්රීඩකයන්ගෙන් සමන්විත ඇල්ජීරියානු කණ්ඩායම සූදානම් වෙමින් සිටියේ ඇන්ගෝලාව සමග හෙට පැවැත්වෙන ඔවුන්ගේ ආරම්භක තරගය සඳහා.
පුහුණු සැසිය අතරතුර පිටිය උඩින් ඩ්රෝන යානයක් පියාසර කරමින් තිබීම නිසා කවුරු හෝ කෙනෙක් ජමෙල් බෙල්මාඩි (Djamel Belmadi) පුහුණුකරු සහ ඔහුගේ ක්රීඩකයන් ගැන ඔත්තු බලන බවට සැක පහළ වුනා.
පොලිසිය විසින් ඩ්රෝන යානය හසුරුවන පුද්ගලයා අල්ලා ගෙන ඔහුගෙන් ප්රශ්න කරන අයුරු සමාජ මාධ්ය වීඩියෝවෙන් පෙනෙන්නට තිබුනා. එහිදී හෙළි වී තිබෙන්නේ එම පුද්ගලයා ඇල්ජීරියානු මාධ්ය විසින් සේවයට බඳවා ගත් අයිවරි කෝස්ට් ජාතිකයෙකු බව.
කෙසේ වෙතත් මෙය බෙල්මාඩිගේ අවධානය වෙනතකට යොමු කරවීමට සමත් වූ සිදුවීමක් වූයේ තරගාවලියට පෙර ඔහුගේ පුහුණු සැසියන් හැකි තරම් අඩුවෙන් වීඩියෝගත කරන ලෙසට බෙල්මාඩි ප්රබල ඉල්ලීමක් කර තිබූ බැවින්.
ඒ ඉල්ලීම ඇල්ජීරියානු කණ්ඩායම Togo හා Burundi යන රටවල කණ්ඩායම් සමග පැවැත්වූ පෙරහුරු තරගවලට ද වලංගු වුනා. මේ තරගවලදී ඇල්ජීරියාව පිළිවෙලින් ගෝල් 3-0ක් හා 4-0ක ජයග්රහණ අත්කර ගත්තා.
පසුගිය AFCON තරගාවලියේදී මූලික වටයෙන් ඉදිරියට යාමට අපොහොසත් වූ ඇල්ජීරියාව පැහැදිලිවම මෙවර කිසිම අවදානමක් නොගනු ඇත්තේ ඔවුන් 2019 වසරේදී ලබා ගත් සාර්ථකත්වය නැවත අත්කර ගැනීමට ඉලක්ක කරගෙන සිටින නිසා.
බුකීකරුවන් තබා තිබෙන ඔට්ටු අනුව මෙවර අප්රිකානු කුසලානය හිමිකර ගන්නා කණ්ඩායම් අතර ඇල්ජීරියාවට තිබෙන්නේ සිවුවැනි තැන. මොරොක්කෝව, සෙනෙගාලය හා සත්කාරක අයිවරි කෝස්ට් ඔවුන්ට ඉදිරියෙන් සිටින කණ්ඩායම්.
කෙසේ වෙතත් ඇල්ජීරියාව 2023 වසරේදී කිසිම තරගයකින් පරාජය වී නැහැ. එම වසරේ ඔවුන් සහභාගි වූ AFCON හා ලෝක කුසලාන සුදුසුකම් ලබා ගැනීමේ තරග සහ මිත්ර තරග ද ඇතුළු තරග දුසිමෙන් ඇල්ජීරියාව තරග 9ක් ජය ගෙන තරග 3ක් ජය පැරදුමින් තොරව අවසන් කර ගැනීමට සමත්ව තිබෙනවා.
‘මැන්චෙස්ට සිටි’ කණ්ඩායමට ක්රීඩා කර දැන් සෞදි වෘත්තීය පාපන්දු ලීගයේ Al-Ahli කණ්ඩායමට ක්රීඩා කරන රියාද් මාරෙස් මෙවර තරගාවලියේදී ඇල්ජීරියාවට නායකත්වය සපයන අතර ඔහු මේ තරගාවලියේ කැපී පෙනෙන ක්රීඩයෙකු වීමට බොහෝ දුරට ඉඩ තිබෙනවා.
ස්පාඤ්ඤයේ Villarreal, ජර්මනියේ Borussia Dortmund, ප්රංශයේ Lille සහ ඉතාලියේ AC Milan හා Roma යන වෘත්තීය පාපන්දු සමාජවලට ක්රීඩා කරන දක්ෂ ක්රීඩකයන්ගෙන් සමන්විත ඇල්ජීරියානු කණ්ඩායම මෙවර අප්රිකානු කුසලාන පාපන්දු තරගාවලියේ සිටින අවධානය යොමු විය යුතු කණ්ඩායමක් බව විචාරකයින් පෙන්වා දෙනවා.
සටහන :
(වර්නන් ගුණසේකර)
ජ්යෙෂ්ඨ මාධ්යවේදී