තීරක ක්‍රිස් බ්‍රෝඩ්, ඉන්දියා කණ්ඩායම සිදුකරන වැරදි ක්‍රියාවන්ට දඬුවම් නොකර ඔවුන් ආරක්ෂා කරන ලෙසට තමාට දේශපාලන බලපෑම් සිදුකළ බව අවධාරණය කරනවා.
විශ්‍රාම ගිය එංගලන්ත වේග පන්දු යවන ස්ටුවර්ට් බ්‍රෝඩ්ගේ පියා ද වන ක්‍රිස් මේ අනාවරණය සිදුකර තිබෙන්නේ ‘ද ටෙලිග්‍රාෆ්’ සමග පැවැත්වූ සාකච්ඡාවකදී.
එක් විශේෂ තරගයක මන්දගාමීව ඕවර යවමින් සිටි ඉන්දියාව ඒ සඳහා නියම වන දඬුවමෙන් බේරා ගැනීම සඳහා ක්‍රම සොයා ගනිමින් ‘සානුකම්පිත’ වන ලෙසට උපදෙස් දුන් දුරකථන පණිවුඩයක් තමාට ලැබුනු බව ක්‍රිස් බ්‍රෝඩ් මෙහිදී කියා සිටියා.
එම තරගය අවසානයේදී ඉන්දියාව සිටියේ ඕවර තුනක් හෝ හතරක් පිටුපසින් බවත් එය ඉබේම දඩයක් ලබෙන වරදක් බවත් ඔහු පැවසුවා. එහෙත් BCCI වෙතින් එල්ල වූ බලපෑම නිසා ඊට අවනත වූ තමා, ඕවර යැවීමේ වේගය දඩ ගැසී‌මේ මට්ටමෙන් පහළට ගෙන ඒම පිණිස, ඕවර යැවීම සඳහා වැඩියෙන් ගතකර තිබූ කාලය හසුරවන්නට කටයුතු කළ බව හෙළි කළා.
ඉන්දියා කණ්ඩායමට සානුකම්පිත වීම පිණිස එම දුරකථන පණිවුඩය තමාට බල කළ ආකාරය බ්‍රෝඩ් අනාවරණය කළා.
මේ සිදුවීම හටගත්තේ සෞරව් ගන්ගුලි නායකත්වය දරමින් සිටි ඉන්දියා කණ්ඩායමේ තරගයකදීයි. කෙසේ වෙතත්, ගන්ගුලි සම්බන්ධ වූ තවත් තරගයකදී තමා නීතියට කටයුතු කරමින් ඉන්දියා කණ්ඩායමට දඩ නියම කළ බව බ්‍රෝඩ් පැවසුවා.
“ඉන්දියාව තරගය අවසන් වන විට කාලය අතින් සිටියේ ඕවර තුන හතරක් පසුපසින්. ඒ නිසා ඊට දඩයක් අඩංගු වී තිබුණා. ඒ අවස්ථාවේ මට දුරකථන ඇමතුමක් ලැබුනා. ‘සානුකම්පිත වෙන්න, කාලය පොඩ්ඩක් හොයා ගන්න. මොකද, මේ ඉන්දියාව නිසා’ යනුවෙන් එයින් මට දැනුම් දුන්නා. ඒ නිසා අපට සිද්ධ වුනා කාලය ටිකක් හොයා ගන්න. ඊට පස්සේ එය දඩ ගැසීමකට ලක්වන සීමාවෙන් පහළ තැනකට ගෙන ආවා.”
“ඊළග තරගයේදීත් මේ දේ ම සිද්ධ වුනා. ඉක්මන් කරන්න යනුවෙන් කළ එකම දැනුම් දීමකටවත් සෞරව් ගන්ගුලි ඇහුම් කන් දුන්නේ නැහැ. ඉතිං මම දුරකථනයෙන් කතා කරමින්, ‘දැන් මම කරන්න ඕන මොකක්ද?’ කියා විමසුවා. එවිට මට කීවේ ‘ඔබ ඔබේ කටයුත්ත කරන්න’ කියලයි. මම කණ්ඩායමට දඩ ගැසුවා. ඒ නිසා මෙහිදී මුල සිටම දේශපාලනය සම්බන්ධ වෙලා තිබුණා. දැන් ඉන්න බොහෝ දෙනා එක්කෝ දේශපාලනික වශයෙන් වඩාත් නිපුණ අය හෝ යන්තම් ඔළුව බේරාගෙන ඉන්න අයයි. මම දන්නේ නැහැ” බ්‍රෝඩ් සඳහන් කළා.
වසර 2003 සිට 2024 පෙබරවාරිය දක්වා වූ වකවානුවේ ක්‍රිස් බ්‍රෝඩ් ටෙස්ට් තරග 123ක්, ජාත්යන්තර එක්දින තරග 361ක් සහ ජාත්යන්තර විස්සයි20 තරග138ක ජාත්යන්තර ක්‍රිකට් කවුන්සලයේ තරග තීරක (ICC Match Referee) ලෙස කටයුතු කළ අතර ඔහු එම කාරිය අවසන් වතාවට සිදුකළේ 2024 පෙබරවාරියේ කොළඹදී පැවති තරගයක. තවදුරටත් තරග තීරකවරයෙකුගේ කාර්යයේ රැඳී සිටීමට ඔහු කැමැත්තෙන් සිටිය ද, ජාත්යන්තර ක්‍රිකට් කවුන්සලය ඔහුගේ කොන්ත්‍රාත්තුවට දිගුවක් ලබා දුන්නේ නැහැ.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
