FairSquare නමැති අධිනීතිඥ සමූහය විසින් මේ පැමිණිල්ල ඉදිරිපත් කර තිබෙන අතර ඉන්ෆන්ටීනෝ ට අමෙරිකානු ජනාධිපති ඩොනල්ඩ් ට්‍රම්ප් සමග තිබෙන සමීප සබඳතාවයේදී IOCයේ දේශපාලනික මධ්‍යස්ථභාවය පිළිබඳ නීති අවස්ථා ගණනාවකදී උල්ලංඝනය වී ඇතැයි එයින් චෝදනා කර තිබෙනවා.
මෙයින් පෙන්වා දෙන ප්‍රධාන කාරණා අතරෙහි බැලගන් ට පනවන ලද ඉබේටම ක්‍රියාත්මක වන එක් තරග තහනම ඉවත් කරමින් ඔහුට බෙල්ජියම ට එරෙහි ‘කණ්ඩායම් 16’ තරගයට අමෙරිකාව වෙනුවෙන් ක්‍රීඩා කිරීමට ඉඩ දීමේ ප්‍රශ්නය ද තිබෙනවා.
මේ සිද්ධිය නැවත පරීක්ෂා කරන ලෙසට FIFAගෙන් ප්‍රසිද්ධියේ ඉල්ලා සිටිමින් ජනාධිපති ට්‍රම්ප්ගෙන් දුරකථන පණිවුඩයක් තමන්ට ලැබුණු බව පිළිගෙන ඇති ඉන්ෆන්ටීනෝ, එහෙත් එම තීරණය වෙනස් කරන ලෙසට තමාට බලපෑමක් සිදුවූ බව ප්‍රතික්ෂේප කරනවා.
තමාගේ මැදිහත්වීම සාධාරණීකරණය කළ ට්‍රම්ප්, “මම කළේ නැවත පරීක්ෂාවක් ඉල්ලා සිටීම පමණයි. මොකද, ඒක නීතිවිරෝධී ක්‍රියාවක් කියලා මම හිතුවේ නැහැ” යනුවෙන් කියා තිබුණා.
2020 වසරේ සිට IOC සාමාජිකයෙකු වශයෙන් ද සිටි ඉන්ෆන්ටීනෝ ඔලිම්පික් ප්‍රඥප්තිය හා දැඩි දේශපාලනික අපක්ෂපාතිත්වය අවශ්‍ය වන IOC සදාචාර ප්‍රතිපත්ති සමග බැඳී සිටින බවට FairSquare පැමිණිල්ලෙන් තර්ක කරනවා.
ට්‍රම්ප් ට සහයෝගය දැක්වීමේදී ඉන්ෆන්ටීනෝ දේශපාලනික වශයෙන් අපක්ෂපාතව සිටීමේ IOC නීති පහක් පැහැදිලිවම උල්ලංඝනය කර ඇතැයි පැමිණිල්ලේ දැක්වෙනවා.
බැලගන්ගේ සිද්ධියට අමතරව ඉන්ෆන්ටීනෝ විසින් ට්‍රම්ප්ව නොබෙල් සාම ත්‍යාගය සඳහා අනුමත කිරීම, ට්‍රම්ප්ගේ ජනාධිපති පදවි ප්‍රාප්තිය සම්බන්ධයෙන් ප්‍රසිද්ධියේ පෙනී සිටීම, FIFA මංගල සාම ත්‍යාගය ට්‍රම්ප් ට පිළිගැන්වීම හා අමෙරිකානු ජනාධිපතිවරයා හවුල් වී සිටින දත්ත-රැස් කර ගැනීමේ මෙහෙයුමකට සම්බන්ධ FIFA ලෝක කුසලාන ක්‍රීඩා ලෝලීන්ගේ වේදිකාවක් ප්‍රවර්ධනය කිරීම යන කරුණු ද එම පැමිණිල්ලෙන් උපුටා දක්වා තිබෙනවා.
FairSquare මීට පෙර දෙසැම්බර් මාසයේදී FIFA සදාචාර ප්‍රතිපත්ති කමිටුවට පැමිණිල්ලක් ඉදිරිපත් කළා. ඒ පැමිණිල්ලට නෝවේජියානු පාපන්දු සම්මේලනයේ සහාය ලැබුණු අතර ඉන්පසුව ජූනි මාසයේදී වෙන්ව ඉදිරිපත් කළ තවත් පැමිණිල්ලකට යුරෝපීය පාර්ලිමේන්තුවේ මන්ත්‍රීවරුන් 50 දෙනෙක් සහාය දැක්වූවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
