ODI ඉනිමක මුළු ඕවර 50 ම දඟ පන්දු යැවූ ලොව පළමු කණ්ඩායම බවට කොදෙව්වන් පත්වූයේ මිර්පූර් හිදී බංග්ලාදේශය ට එරෙහිව වාර්තා කළ විශිෂ්ට සුපර් ඕවර ජයග්‍රණයකදී.
ප්‍රධාන සත්කාරක රටවල තරග පැවැත්වෙද්දී දඟ පන්දු යැවීම අතින් දෙවැනියට හොඳම රට ලෙස සලකනු ලබන්නේ බංග්ලාදේශය. 2023 වසරේ සිට එහි දඟ පන්දු යවන්නන්ගේ සාමාන්‍යය 29.76ක් වී තිබියදී කොදෙව්වන්ට වැහැරුණු, මන්දගාමී සහ පන්දුව දඟ කැවෙන තවත් තණතීරුවකට මුහුණ දීමට සිදුවුනා. එය ඔවුන් සෙනසුරාදා පැවති පළමු ජාත්‍යන්තර එක්දින තරගයේ දඟ පන්දු ප්‍රහාරය හමුවේ පරාජයට පත්වූ තණතීරුවට සමාන එකක් වී තිබුණා.
සංචාරක කොදෙව් පිල මෙවර තරගය වෙනුවෙන් වේග පන්දු යවන ජේඩ්න් සීල්ස් ඉවත් කර වමතින් දඟ පන්දු යවන අකීල් හොසේන් සහ අර්ධ කාලීන පිට දඟ පන්දු යවන්නෙකු වන රොස්ටන් චේස්ගෙන් පන්දු ප්‍රහාරය ආරම්භ කළා.
පළමු මාරුව ලෙස වමතින් දඟ පන්දු යවන කේරි පියරෙ පැමිණි අතර ඉන්පසු නායක ෂායි හෝප් තවත් වමත් දඟ පන්දු යවන්නෙකු වන ගුඩාකේෂ් මොටී වෙත හැරුණා. මොටී ලකුණු 65කට කඩුලු 3ක් බිඳ හෙලමින් බංග්ලාදේශය 213-7කට සීමා කළා.
කොදෙව්වන් භාවිතා කළ අනෙක් දඟ පන්දු යවන්නා වූයේ මීට පෙර ODI තරගවල ඕවර හතරක් යවා එක් කඩුල්ලක් හෝ ලබා නොසිටි පිතිකරු ඇලික් අතානාස්. ඔහු, ඔහුට සීමිත වූ ඕවර 10 තුළ ලකුණු 14කට කඩුලු 2ක් ලබා ගත් අතර හොසේන් ලකුණු 41කට කඩුලු 2ක් හිමිකර ගත්තා.
මඳ වේග පන්දු යවන්නන් වන ග්‍රීව්ස් හා ෂර්ෆේන් රදර්ෆෝඩ් යන තුන් ඉරියව් ක්‍රීඩකයින් දෙදෙනාව පන්දු ප්‍රහාරය සඳහා කැඳවූයේ නැහැ.
වේග පන්දු යවන තුන් ඉරියව් ක්‍රීඩක රොමාරියෝ ෂෙපඩ් කණ්ඩායමට නම් කර නොතිබූ අතර ජෙඩියා බ්ලේඩ්ස් හා ෂමාර් ජෝස‌ෆ් තුවාල ලබා සිටිනවා.
බංග්ලාදේශය ඔවුන්ගේ වේග පන්දු යවන්නා වන මුස්ටෆිසුර් රහ්මාන් කෙරෙහි බලාපොරොත්තු තබා ගත්ත ද, ඔහු කිසිම කඩුල්ලක් ලබා නොගෙන ඕවර අටක් යැවුවේ ලකුණු 40ක් ලබා දෙමින්. එහෙත් කඩුලු නවය ම ලබා ගනිමින් දඟ පන්දු යවන්නන් දිගටම පවත්වා ගෙන ගිය ආධිප්‍යය හමුවේ කොදෙව්වන් 213-9ක් වාර්තා කළේ තරගය සමව අවසන් කරමින්.
බටහිර ඉන්දීය කොදෙව් පිලට ජයග්‍රහණය සඳහා ඔවුන්ගේ පන්දු හයෙන් ලකුණු 11ක ඉලක්කයක් පිළිගන්වා තිබියදී ‘වයිඩ්’ පන්දුවක් හා ‘නෝ-බෝල්’ පන්දුවකින් සිය පන්දු යැවීම ආරම්භ කිරීම මධ්‍යයේ වුව ද හොසේන් අවසන් පන්දුවෙන් එක ලකුණක් පමණක් ලබා දුන්නේ බංග්ලාදේශය ට ජයග්‍රහණය සඳහා ලකුණු තුනක් අවශ්‍යව තිබියදී. 
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
