* කොළඹදී පැවති පළමු නිල දේශපාලන සාකච්ඡා වටයෙන් පසු දෙරට අතර අවබෝධතා ගිවිසුමකට අත්සන් තැබේ.
* ඖෂධ, රෙදිපිළි හා ඛනිජ ක්ෂේත්රවල ආයෝජන පුළුල් කරමින් ආසියාන් කලාපීය වෙළෙඳ හවුල්කාරිත්වයට ඉන්දුනීසියාවේ සහාය.
ශ්රී ලංකාව සහ ඉන්දුනීසියාව අතර ද්විපාර්ශ්වික සබඳතා තවදුරටත් පුළුල් කරමින් දෙරටේ විදේශ කටයුතු අමාත්යාංශ අතර පළමු නිල දේශපාලන උපදේශන සාකච්ඡා වටය පසුගියදා කොළඹදී සාර්ථකව පැවැත්විණ. දෙරට අතර නිතිපතා රාජ්යතාන්ත්රික හා ආර්ථික සංවාදයක් පවත්වාගෙන යාම සඳහා වන විශේෂ අවබෝධතා ගිවිසුමකට (MoU) අත්සන් තැබීම ද මෙහිදී සිදුවිය.
ශ්රී ලංකා දූත පිරිස විදේශ කටයුතු අමාත්යාංශයේ ලේකම් අරුණි රණරාජ විසින් මෙහෙයවනු ලැබූ අතර, ඉන්දුනීසියානු දූත පිරිස එරට විදේශ කටයුතු අමාත්යාංශයේ ආසියා-පැසිෆික් සහ අප්රිකානු කටයුතු පිළිබඳ නියෝජ්ය අමාත්ය ආචාර්ය සන්තෝ දර්මසුමාර්තෝ (Dr. Santo Darmosumarto) විසින් මෙහෙයවන ලදී. නොබැඳි ජාතීන්ගේ ව්යාපාරයේ (NAM) ආරම්භක අවධියේ සිට දෙරට අතර පවතින ඓතිහාසික රාජ්යතාන්ත්රික මිත්රත්වය මෙහිදී දෙපාර්ශ්වයේම ඇගයීමට ලක්විය.
ආයෝජන සහ වෙළෙඳ කටයුතු පුළුල් කිරීම
දෙරටේම ආර්ථිකයට සෘජු ප්රතිලාභ හිමිවන ප්රධාන අංශ කිහිපයක් කෙරෙහි මෙම සාකච්ඡාවලදී විශේෂ අවධානයක් යොමුවිය. විශේෂයෙන්ම ඖෂධ නිෂ්පාදනය, ඛනිජ සම්පත් සහ රෙදිපිළි කර්මාන්තය යන ක්ෂේත්රවල ආයෝජන සහ වෙළෙඳ කටයුතු වර්ධනය කරගැනීමට දෙරට එකඟතාව පළ කර ඇත.
මීට අමතරව, දෙරටේ ව්යාපාරික ප්රජාවන් අතර සෘජු සබඳතා ගොඩනැඟීම, කෘෂිකර්මාන්තය සඳහා අවශ්ය පොහොර සැපයීම සහ ධීවර ක්ෂේත්රයේ සහයෝගීතාව ඉහළ නැංවීම පිළිබඳව ද දීර්ඝ වශයෙන් සාකච්ඡා කෙරිණි.
සංචාරක සහ වීසා පහසුකම්
දෙරට අතර පවතින සංචාරක ව්යාපාරය දිරිගැන්වීම සඳහා වීසා නිකුත් කිරීමේ ක්රියාවලිය තවදුරටත් සරල හා පහසු කිරීමේ හැකියාව පිළිබඳව දෙපාර්ශ්වයේම අවධානය යොමුවිය. ගුවන් ගමන් සහ සෘජු සම්බන්ධතා වැඩිදියුණු කිරීම තුළින් සංචාරකයන් ආකර්ෂණය කරගැනීම මෙන්ම අධ්යාපනික හා සංස්කෘතික ක්ෂේත්ර ඔස්සේ දෙරටේ ජනතාව අතර පවතින සබඳතා වර්ධනය කරගැනීම ද මෙහි අරමුණයි.
එසේම, සමුද්රීය ආරක්ෂාව තහවුරු කිරීම, බුද්ධි තොරතුරු හුවමාරු කරගැනීම සහ ජාත්යන්තර අපරාධ මර්දනය සඳහා සහයෝගයෙන් කටයුතු කිරීම කෙරෙහි ද සාකච්ඡා පැවැත්විණි.
ආසියාන් සහ ආර්සෙප් (RCEP) හවුල්කාරිත්වය
ශ්රී ලංකාව කලාපීය වෙළෙඳ අවස්ථා පුළුල් කරගැනීමේ අරමුණින් ගෙන යන වැඩපිළිවෙළට ඉන්දුනීසියාවේ සහාය ලබාගැනීම පිළිබඳව ද මෙහිදී සාකච්ඡා විය.
විශේෂයෙන්ම, අග්නිදිග ආසියානු රටවල සංගමයේ (ASEAN) අංශීය සංවාද හවුල්කාරිත්වය (Sectoral Dialogue Partnership) ලබාගැනීමටත්, ලොව විශාලතම නිදහස් වෙළෙඳ ගිවිසුමක් වන ‘කලාපීය විස්තීර්ණ ආර්ථික හවුල්කාරිත්වයට’ (RCEP) එක්වීමටත් ශ්රී ලංකාව දක්වන උනන්දුවට ඉන්දුනීසියානු පාර්ශ්වයේ නිසි අවධානය සහ සහාය පළවී ඇත.
75 වැනි රාජ්යතාන්ත්රික සැමරුම
ශ්රී ලංකාව සහ ඉන්දුනීසියාව අතර විධිමත් රාජ්යතාන්ත්රික සබඳතා ආරම්භ වී 2027 වසරට වසර 75ක් සපිරේ. එම ඓතිහාසික සන්ධිස්ථානය නිමිත්තෙන් වසර පුරා පැවැත්වෙන විශේෂ වැඩසටහන් මාලාවක් සංවිධානය කිරීමට දෙරටේ නියෝජිතයෝ එකඟ වූහ.
දෙවන දේශපාලන උපදේශන සාකච්ඡා වටය 2028 වර්ෂයේදී ජකර්තා නුවරදී පැවැත්වීමට තීරණය කරමින් මෙම උපදේශන සාකච්ඡා අවසන් වූ අතර, නිත්ය සංවාදය අඛණ්ඩව පවත්වාගෙන යාම සහ ද්විපාර්ශ්වික සහයෝගීතාව තවදුරටත් ඉදිරියට ගෙන යාම සඳහා දෙපාර්ශ්වය සතු පොදු කැපවීම යළිත් තහවුරු කරන ලදී.
ශ්රී ලංකා දූත පිරිසට ඉන්දුනීසියාව සහ ආසියාන් සංවිධානය සඳහා ශ්රී ලංකා තානාපතිනි ශෂිකලා ප්රේමවර්ධන, අතිරේක ලේකම්/දේශපාලන කටයුතු එම්. ආර්. කේ. ලෙනගල, අධ්යක්ෂ ජනරාල්/අග්නිදිග ආසියානු සහ මධ්යම ආසියානු කටයුතු චාමරි රොද්රිගෝ සහ අදාළ රේඛීය ආයතනවල ජ්යෙෂ්ඨ නිලධාරීහු ඇතුළත් වූහ.
