අගමැති මහින්ද රාජපක්ෂ සිය ධුරයෙන් ඉල්ලා අස් වීමට කැමැත්ත පළ කර ඇතැයි වාර්තා වන අතර, ඔහු ඒ සම්බන්ධයෙන් පාර්ලිමේන්තුවේදී හෙට (04)
විශේෂ ප්‍රකාශයක් කරනු ඇතැයි රජයේ ආරංචි මාර්ග සදහන් කරයි.
ඒ අනුව නව අගමැතිවරයකු ප්‍රකාශයට පත් කළ වහාම තමා අගමැති ධුරයෙන් ඉවත්වන බව ඔහු පාර්ලිමේන්තුවට හෙට දිනයේ දැනුම් දීමට නියමිත බව එම ආරංචි මාර්ග වැඩිදුරටත් පවසයි.
ව්‍යවස්ථානුකුලව අගමැතිවරයා ඉල්ලා අස්වූ වහාම කැබිනට් මණ්ඩලය අහෝසිවන අතර එවැනි තත්වයක් තුල වහාම අගමැතිවරයකු පත් නොකළහොත් රට තවදුරටත් අරාජික විය හැකිබව අගමැතිවරයාගේ අදහස් වී ඇතැයි පැවසේ.
ස්වාධින මන්ත්‍රී කණ්ඩායම විසින් යෝජනා කර ඇති පරිදි අන්තර් කාලින ආණ්ඩුවේ අගමැතිවරයා සහ කැබිනට් මණ්ඩලය සඳහා පුද්ගලයින් නිර්දේශ කරනු ලබන්නේ අන්තර් කාලින ආණ්ඩුවේ පක්ෂ නායකයින්ගෙන් සමන්විත 'ජාතික සභාව' විසිනි. ජනාධිපතිවරයා විසින් අගමැති හා කැබිනට් මණ්ඩලය පත් කරනු ඇත්තේ ඉන් අනතුරුවය.
ඒ අනුව, නව අග්‍රාමාත්‍යවරයකු යටතේ නව අමාත්‍ය මණ්ඩලයක් මේ සතිය තුළ පත් කිරීමට බොහෝ දුරට ඉඩ ඇතැයි ආණ්ඩුවේ ආරංචිමාර්ග වලින් පැවසේ.
ජාතික එකඟතා ආණ්ඩුවක් පිහිටුවීමට ශ්‍රී ලංකා පොදුජන පෙරමුණ හා ආණ්ඩුවෙන් ඉවත්ව ස්වාධීන වූ මන්ත්‍රී කණ්ඩායම අතර ඊයේ (02) පෙරවරුවේ පැවති සාකච්ඡාවේදී ප්‍රතිපත්තිමය එකඟතාවක් ඇති ව තිබේ. එහිදී ජාතික සහයෝගීතා ආණ්ඩුවට සංකල්පයක් ලෙස එකඟතාව පළ වූ බව පොදුජන පෙරමුණේ මහලේකම් නීතිඥ සාගර කාරියවසම් ප්‍රකාශ කර සිටියි.
ජනාධිපති ගෝඨාභය රාජපක්ෂ ගේ ප්‍රධානත්වයෙන් කොටුව ජනාධිපති මන්දිරයේ දී මෙම සාකච්ඡාව පැවැත්විණි.
ඒ අනුව, ජාතික එකගතා ආණ්ඩුවක් පිහිටුවීමේ කටයුතු ඉදිරියට ගෙන යාම සදහා ජනාධිපතිවරයාට අවශ්‍ය සහයෝගය ලබාදීමට ද ශ්‍රී ලංකා පොදුජන පෙරමුණ එහිදී එකඟතාවකට පැමිණි බව වාර්තා වේ.
අගමැති ධුරය ගැන බැසිල් කියන කතාව !
මහනායක හිමිවරුන්ගේ ඉල්ලීම පිළිබඳව සලකා බලා අග්‍රාමාත්‍ය මහින්ද රාජපක්ෂ එම ධුරයෙන් ඉවත්වීමට තීරණයකර ඇති බව පාර්ලිමේන්තු මන්ත්‍රී බැසිල් රාජපක්ෂ ස්වාධීන මන්ත්‍රීවරුන් සමඟ පැවති හමුවේදී ඊයේ (02) සඳහන් කළ බවට තොරතුරු වාර්තා වේ.
පසුගිය මැතිවරණයේදී ශ්‍රී ලංකා පොදුජන පෙරමුණ ජනතාව අතරට ගෙන ගිය සම්මුතිය වුයේ අග්‍රාමාත්‍ය ධුරය මහින්ද රාජපක්ෂට හිමිවිය යුතු බව බැවින් එම ජනතා වරමට පිටස්තරව වෙනත් අයෙකුගේ නමක් ශ්‍රී ලංකා පොදුජන පෙරමුණෙන් යෝජනා කිරීමට සුදානම් නැති බවත්, කෙටි කලක් සඳහා පත්වන නව ආණ්ඩුවේ අගමැතිවරයා ලෙස යෝජිත ' ජාතික සභාව' විසින් වෙනත් අයකු නම් කිරීම සම්බන්ධයෙන් විරෝධයක් නොමැති බවත් බැසිල් රාජපක්ෂ එහිදී සඳහන් කර ඇතැයි ද පැවසේ.
