ජනතා විරෝධය හමුවේ ජනාධිපති ධුරය හැර දමා යාමට සිටි ගෝඨාභය රාජපක්‍ෂ රැක ගනිමින් ශක්තිමත් කරනුයේ
අගමැතිවරයා විසින් බවට දෙමළ දේශපාලන පක්‍ෂයක් චෝදනා කර තිබේ.
''ජනාධිපතිකම දාලා යන්න ඔන්න මෙන්න හිටිය ගෝඨාභය රාජපක්‍ෂව ඔක්සිජන් ගහලා බේරා ගෙන ඉන්නේ අගමැති රනිල් වික්‍රමසිංහ,'' යැයි දෙමළ ජාතික ජනතා පෙරමුණේ නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් පවසයි.
දෙමළ ජාතික ජනතා පෙරමුණේ යාපනේ පිහිටි ප්‍රධාන කාර්යාලයේදී පැවති මාධ්‍ය හමුවකදී ගජේන්ද්‍ර කුමාර් කියා සිටියේ තම පක්‍ෂය අගමැති වික්‍රමසිංහගේ මෙම ක්‍රියා පිළිවෙත හෙලාදකින බවයි.
''කිසිම ලැජ්ජාවක් නැතිව ගෝඨාභය-රනිල් ආණ්ඩුව පිටරට ඉන්න දෙමළ මිනිස්සුන්ට ඇරයුම් කරනවා ආණ්ඩුවට උදව් කරන්න, මෙහෙ ඇවිත් ආයෝජනය කරන්න කියලා.''
''පහුගිය කාලේ දී දෙමළ ජාතික සන්ධානය එක්ක රඟ දක්වපු ඒකීය රාජ්‍ය නාඩගම තමයි දැන් රනිල් වික්‍රමසිංහ ගෝඨාභයත් එක්ක වෑයම් කරන්නේ.''
දශක ගණනාවක් පුරා සිංහල ආණ්ඩු විසින් දෙමළ ජනයාට එරෙහිව ගෙන ගිය යුද්ධයෙන් දිවි ගලවා ගන්නට විදේශයන්ට පළා ගිය යුද පීඩිතයන්ගෙන් සරණ පැතීමට ලංකාණ්ඩුවට සිදුවීම මගින් රට කෙතරම් අවදානමකද යන්න මනාව පෙන්නුම් කරන බව TNPF නායකයා සඳහන් කරයි.
''පෙඩරල් ක්‍රමයක් ඉල්ලා සිටින දෙමළ ජනතාව හරි කෝණයෙන් මේ දේවල් පැහැදිලි කරගෙන මේ ආණ්ඩුව ප්‍රතික්ෂේප කරන්න ඕනෑ. කොහොමත්, ඉදිරියේදී තෝරා ගන්නා නායකයන්ට ආර්ථිකය ගොඩනගන්න දෙමළ ජනයාගේ උදව් ඕනේ වෙනවා.''
