1200 x 80 DMirror

 
 

ජනතා විරෝධය හමුවේ බලයෙන් විසිවීමට ගිය රාජපක්ෂලා රැක ගැනීමට පැමිණි

රනිල් වික්‍රමසිංහ අගමැති වූ දා සිට ජනතාව බිය ගන්වන ප්‍රකාශ කිරීම හැර කිසි විසදුමක් ඉදිරිපත් කොට නොමැති බවට දෙමළ දේශපාලන පක්‍ෂයක් පෙන්වාදී තිබේ.

''මහින්දට තට්ටු කළාට ඇරෙන්නේ නැති දොරවල්වලට තට්ටු කර ණය ලබා ගැනීමේ හැකියාව රනිල්ට තිබීම හැර වෙනත් පෞද්ගලික දක්‍ෂතාවක් රනිල්ට නැහැ. දැනට සිදුවෙමින් තියෙන එකම දෙය නම් ණය ගැනීම විතරයි. රටේ පාරිභෝගික භාණ්ඩ නිෂ්පාදනය නංවන්න, ආනයන අඩු කරන්න, අපනයන ආර්ථිකය නංවන්න කාටවත්ම බැරි වෙලා. රනිල් වික්‍රමසිංහ අගමැති වූ දා සිට ජනතාව බියට පත් කළ හැකි ප්‍රකාශ කිරීම හැර අන් කිසිවක් කර නැහැ,''යැයි  ඊළාම් ජනතා විප්ලවකාරී විමුක්ති පෙරමුණේ නායක සුරේෂ් ප්‍රේමචන්ද්‍රන් පවසයි.

වත්මන් දේශපාලන හා ආර්ථික අර්බුදය ගැන මාධ්‍ය වෙත අදහස් දක්වමින් EPRLF නායකයා පවසන්නේ රනිල් වික්‍රමසිංහ යොදා ගනිමින් කෙසේ හෝ පාර්ලිමේන්තුවේ සහ ආණ්ඩුවේ පාලනය තබා ගැනීමට රාජපක්‍ෂ කල්ලිය වෑයම් කරන බවයි.



''ලංකාවේ බංකොලොත් ආර්ථිකය ජනාධිපතිවරයාට හෝ එයාගේ පක්‍ෂයේ, පවුලේ කාටවත් බැරි නිසා මැතිවරණයෙන් පැරදිලා ජාතික ලැයිස්තුවෙන් පාර්ලිමේන්තුවට ඇවිත් හිටපු රනිල්ව අගමැති කරලා ආර්ථිකය ස්ථාවර කරන්න ජනාධිපති හීන දකිනවා. දැන් ඒකත් සාර්ථක නැහැ. රටේ ආර්ථිකය ගොඩගන්න බැරිනම් ජනාධිපතිකමේ එල්ලී සිටීමේ තේරුමක් නැහැ.''

ලංකාවේ සියලුම පාලකයන් විසින් බලය තහවුරු කර ගැනීම සඳහා දෙමළ විරෝධය ආයෝජනයක් ලෙස යොදා ගත් බව පෙන්වා දෙන සුරේෂ් ප්‍රේමචන්ද්‍රන්  කියා සිටින්නේ, අද වන විට එහි ප්‍රතිපල  මුළු රටේම ජනතාව භුක්ති විඳින බවයි.

හයෙන් පහක බලයක් අතැතිව 1977 රටේ නායකයා වූ ජේ.ආර්.ජයවර්ධන තම පැවැත්මට සහ දේශපාලන විරුද්ධවාදියා වූ සිරිමාවෝ බණ්ඩාරනායක දේශපාලනයෙන් ඉවත් කිරීමට 1978 දී විධායක ජනාධිපති ක්‍රමයක් ඇතුළත් නව බලසම්පන්න ව්‍යවස්ථාවක් කෙටුම්පත් කළද මේ වන විට එය විසි වතාවක් සංශෝධනය කර ඇති  බව  EPRLF නායකයා පෙන්වා දෙයි.


මොසාඩ් උපදෙස් :

jr


''මේ විධායක ජනාධිපති ක්‍රමය හදා ගත්තු ජේ.ආර්. 1977 දී දෙමළ ජනතාවට එල්ල වූ දැවැන්ත ප්‍රහාරවලට වගකිව යුතු ප්‍රධානම පුද්ගලයායි. දෙමළ තරුණයන්ට මහ මග වෙඩි තබා මරා දැමීම ඇරඹුණේ මොහුගේ පාලන කාලයේදීයි.''

''දෙමළ ජාතික විමුක්තිය හා එහි අවශ්‍යතාවය වෙනුවෙන් සන්නද්ධ අරගලය නිර්මාණය කරන්න පසුබිම සකස් කළේ ඔහුයි. ඉන්පසු  අරගලය මැඩපැවැත්වීමට  ඊශ්‍රායල මොසාඩ් සංවිධානයේ උපදෙස් අනුව යමින් දෙමළ ජනයාට එරෙහිව යුද්ධ ප්‍රකාශ කළා.''

''දෙමළ සහ මුස්ලිම් ප්‍රජාවන් අතර භේද ඇතිකර එකිනෙකා අතර ගැටුම් ඇතිකරන්න මොසාඩ් උපදෙස් ලබාගත්තා පමණක් නොව, මහවැලි ව්‍යාපෘතිය යටතේ  මිලියන ගණනක ආයුධ සහ පතොරම් ද ලබා ගත්තා, මනාල් ආරු විසු  දෙමළ ජනතාව පන්නා දමා වැලිඔය විදිහට සිංහලකරණය කරාපු කෙනා තමයි මේ ජේ.ආර්.''



සුරේෂ් ප්‍රේමචන්ද්‍රන් කියා සිටිනුයේ ජේ.ආර්.ජයවර්ධන ආරම්භ කළ යුද්ධය පසුව පැමිණි සියළුම ජනාධිපතිවරු උතුරේ මහවැලි සංවර්ධනය නමින් ව්‍යාජ සැලැස්මක් පෙන්වමින්, ජාත්‍යන්තරයෙන් ණය මුදල් ලබා ගෙන තිස් වසරක් තිස්සේ පවත්වා ගෙන ගිය බවයි.

 

''මහින්ද රාජපක්ෂ දෙමළ ජනයාගේ අයිතීන් ලබා දීමට සූදානම් බවත්, ත්‍රස්තවාදය ඊට බාධාවක් බවත් කියමින් ජාත්‍යන්තර ප්‍රජාව නොමඟ යවා  ගණන් කළ නොහැකි තරම් ණය, මූල්‍ය ආධාර සහ ආයුධ ලබාගෙන රුපියල් බිලියන ගණනක පාඩුවක් රටට  සිදු කළා. 2009 මුල්ලිවයික්කාල් වලදී  දෙමළ මිනිස්සු දස දහස් ගණනක් මරා දමන්නත් තවත්  දහස් ගණනක් අතුරුදහන් කරන්නත් මේ ණය මුදල්  වියදම් කළා,''

''මේ වන විට රාජපක්ෂ පාලනය යටතේ මුළු රටම බංකොලොත් වෙලා. විදුලිය, ඉන්ධන සහ අත්‍යවශ්‍ය ඖෂධ ඇතුළු සියලුම අත්‍යවශ්‍ය භාණ්ඩවල මිල අහස උසට නැඟලා. භාණ්ඩ හිඟයක් ද තියෙනවා. ඒවා සෙවීම මිනිසුන්ගේ දෛනික කාර්යක් බවට පත්වෙලා. මිනිස්සු මේකට විරුද්ධව කැරලි ගැහුවා. රාජපක්ෂ පවුලට ගෙදර යන්න කිව්වා. අග්‍රාමාත්‍ය මහින්ද රාජපක්ෂ ඉල්ලා අස් වුණා.''

''පස්සේ මොකද වුනේ. රනිල්ට අගමැතිකම දීලා ගෝඨාභය ජනාධිපතිධූරයේ ඉන්නවා. අනෙක් රාජපක්ෂලා පාර්ලිමේන්තු මන්ත්‍රීවරුන් ලෙස රැඳී ඉන්නවා.''

 

 

Leader Whats app

 

 

subscribeYT

subscribeYT

WhatsApp Image 2021 09 13 at 13.49.58