ශ්‍රී ලංකා මානව හිමිකම් කොමිසම නිසා ආධාර ලැබීමටත් පොලු වැටේද?

අසත්‍ය කරුණු සමාජගත කර ජනතාව නොමග යවන බවට ශ්‍රී ලංකා මානව හිමිකම් කොමිෂන් සභාවට චෝදනා එල්ල වී තිබේ.

මානව හිමිකම් ක්‍රියාධරයන් මෙන්ම ජනමාධ්‍යවේදීන්ගේ සංවිධානයක්ද චෝදනා කරන්නේ 'සිරකරු අයිතිවාසිකම්  සුරැකීමේ කමිටුවේ' සභාපති නීතිඥ සේනක පෙරේරා සම්බන්ධයෙන් අසත්‍ය චෝදනා සහිත නිවේදනයක් නිකුත් කරමින් ශ්‍රී ලංකා මානව හිමිකම් කොමිෂන් සභාව සමාජය නොමග යවා ඇති බවයි.

ජාත්‍යන්තරය හමුවේ ඒ බව හෙළිදරව් වීමෙන් බරපතල ආර්ථික අහේනියකින් පෙලෙන ශ්‍රී ලංකාවට ආධාර ලැබීමටද බාධා පැමිණිය හැකි බවට සමාජ ක්‍රියාධාරීහු අනතුරු අඟවති.

''මේ ප්‍රවෘත්ති නිවේදනය වහාම ඉල්ලා අස්කරගන්න. මේ කියලා තියන බොරු. සමහර බොරු නිවැරදි කරන්න. මේ කියලා තියන බොරු නිසා ජනතාව නොමග යනවා,'' යි ජුලි 6 වැනි බදාදා කොළඹදී සංවිධානය කර තිබු මාධ්‍ය හමුවකදී මානව හිමිකම් ක්‍රියාධර රුකී ප්‍රනාන්දු සදහන් කළේය.

දිවයිනේ ප්‍රමුඛ පෙළේ මානව හිමිකම් ක්‍රියාධරයන් පිරිසක් විසින් එම මාධ්‍ය හමුව කැදවා තිබුනේ නීතිඥ සේනක පෙරේරා විසින් මැයි 10 වැනිදා මාධ්‍ය හමුවකදී  කරන ලද ප්‍රකාශයක් පදනම් කර ගනිමින් ඔහු පිළිබඳව පරීක්ෂනයක් පවත්වන ලෙස නීතිපතිවරයාට සහ අග විනිසුරුවරයාට මානව හිමිකම් කොමිසමේ සභාපතිනිය වන රෝහිණී මාරසිංහ විසින් කර ඇති ඉල්ලීම සහ නීතිඥ සේනක පෙරේරා ඉලක්ක කරගනිමින් ඇය විසින්  නිකුත් කරන ලද  නිවේදනය සම්බන්ධයෙන් සිය ස්ථාවරයන් පැහැදිලි කිරීම වෙනුවෙනි.

මානව හිමිකම් ක්‍රියාධරයන් පෙන්වා දෙන්නේ මානව හිමිකම් කොමිසමේ සභාපතිනිය විසින් නිකුත් කර තිබෙන නිවේදනයේ සේනක පෙරේරා මාධ්‍ය සාකච්ඡාවේදී ප්‍රකාශ කළ කරුණු නිසා රට පුරා ප්‍රචණ්ඩ ක්‍රියා ඇතිවූ බව සහ මුළු ලෝකයම කෝපයට පත්වූ බවට එහි ඇති සදහන සමාජය නොමග යවන අසත්‍ය කරුණු බවයි.

මානව හිමිකම් කොමිසමේ නිවේදනය නීතිඥ අචලා සෙනෙවිරත්න විසින් හඳුන්වා දෙනු ලැබුවේ 'මානව හිමිකම් ආරක්ෂකයන්ගේ කටට විලංගු දැමීමට' ගන්නා උත්සාහයක් ලෙසයි. කොමිසම කාගේ හෝ කොන්තරාත්තුවක් ක්‍රියාත්මක කරන්නේද යන සැකය ඇය විසින් මතු කරන ලදී.

ජනමාධ්‍ය වාර්තා කර ඇති පරිදි පසුගිය මැයි 09දා මහින්ද රාජපක්ෂ විසින් කවා පොවා සන්නද්ධ කර සාමකාමී විරෝධතාකරුවන්ට පහර දීමේදී සිරකරුවන් සම්බන්ධ කර ගත්තේ දැයි නීතිඥ සේනක පෙරේරා මැයි 10 වැනිදා මාධ්‍ය හමුවේදී ප්‍රශ්න කර තිබුණි.

මැයි 9 දා සමාජ මාධ්‍ය ඔස්සේ ප්‍රචාරය කෙරුණු දර්ශනවල දැක්වුණු වටරැක එළිමහන් සිරකඳවුරේ රැඳවියන් පිරිසක් සම්බන්ධයෙන් පරීක්ෂණයක් පවත්වන ලෙස කරන ලද ඉල්ලීම සම්බන්ධයෙන් නිසි පිළිතුරක් ලැබී නැති බව මානව හිමිකම් නීතිඥ හෙජාස් හිස්බුල්ලා පවසයි.

නීතිඥ සේනක පෙරේරා සම්බන්ධයෙන් පරීක්ෂණ පවත්වන ලෙස ඉල්ලා සිටීම මගින් පෙනී යන්නේ එම පරීක්ෂණය හමාර වී ඇති බව යැයි සමාජ මාධ්‍ය ඔස්සේ ප්‍රකාශයට පත් කර ඇති නීතිඥ හිස්බුල්ලා ඒ සම්බන්ධයෙන් විමසා මැයි 3 දා යවන ලද ඊ මේල් පණිවිඩයට ද තවමත් කොමිසම පිළිතුරු එවා නැති වීම ගැන කණස්සල්ල පළකර සිටී.

ශ්‍රී ලංකා මානව හිමිකම් කොමිෂන් සභාවේ සභාපතිනිය වෙත ලිපියක් යොමු කරමින් ශ්‍රී ලංකා තරුණ ජනමාධ්‍යවේදීන්ගේ සංගමයද ප්‍රකාශ කර ඇත්තේ ජුනි 30දා නිකුත් කර තිබෙන මාධ්‍ය නිවේදනය සම්බන්ධයෙන් සිය සංවිධානය දැඩි අවධානය යොමු කළ අතර, මහජනතාව නොමග යවන, ව්‍යාජ කරුණු සහිත එම ලිපිය මගින් භාෂණයේ සහ ප්‍රකාශනයේ නිදහස හීන කරන බව සිය නිරීක්ෂණය බවයි.

"ඔබගේ මාධ්‍ය නිවේදනයේ සඳහන් කර ඇත්තේ සේනක පෙරේරා මහතා මාධ්‍ය සාකච්ඡාවේදී ප්‍රකාශ කළ කරුණු නිසා රට පුරා ප්‍රචණ්ඩ ක්‍රියා ඇතිවූ බව සහ මුළු ලෝකයම කෝපයට පත්වූ බවයි. එය තාර්කිකවත්, සත්‍ය වශයෙනුත් බරපතළ අසත්‍ය සහ ජනතාව මුලාකරවන ආකාරයේ ප්‍රකාශයකි. සේනක පෙරේරා මහතා මෙම මාධ්‍ය හමුව පැවැත්වූයේ මැයි 10දා වන අතර, ඔබ සඳහන් කරන ආකාරයේ සිදුවීම්වලින් බොහොමයක් මැයි 10දා උදෑසන වන විට සිදුවී අවසන් ය."

ශ්‍රී ලංකා තරුණ ජනමාධ්‍යවේදීන්ගේ සංගමය ශ්‍රී ලංකා මානව හිමිකම් කොමිෂන් සභාවේ සභාපතිනිය වෙත යොමු කරන ලද ලිපියේ වැඩි දුරටත්සදහන්ව ඇත්තේ, මැයි 09දා සහ ඊට පසු දින රට පුරා සිදුවීම් මාලාවක් වාර්තා වූයේ නීතිඥ සේනක පෙරේරාගේ ප්‍රකාශයක් නිසා නොව, හිටපු අග්‍රාමාත්‍ය මහින්ද රාජපක්ෂ විසින් ගෝඨාභය රාජපක්ෂ ප්‍රමුඛ ආණ්ඩුවේ අනුදැනුම මත අරලියගහ මැදුරට විශාල පිරිසක් කැඳවා බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ප්‍රමුඛ පොලිසියේ ද සහාය ඇතිව ඔවුන් ලවා ගෝඨාගෝගම සහ මයිනාගෝගම සාමකාමී අරගලයට පහරදීම හේතුවෙන් බව මුළු රටම දන්නා කරුණක් බවයි.

ජාත්‍යන්තර ශ්‍රේණිගත කිරීම් වල බී ශ්‍රේණිය දක්වා 2021 වසරේදී පහතට ඇද වැටුන ශ්‍රී ලංකා මානව හිමිකම් කොමිෂන් සභාවේ ශ්‍රේණිය මේ වසරේ ඔක්තෝබර් මාසයේදී ස්ථිර වීමට නියමිතව තිබියදී මානව හිමිකම් කොමිසම විසින් නිකුත් කරතිබෙන මෙම නිවේදනය හරහා එය වඩාත් තහවුරු වන බවයි මානව හිමිකම් ක්‍රියාධර රුකී ප්‍රනාන්දු වැඩි දුරටත් සදහන් කළේ.

ශ්‍රී ලංකා මානව හිමිකම් කොමිෂන් සභාවේ සභාපතිනිය නිකුත් කළ නිවේදනය රටේ ආර්ථිකයට බලපෑම් කළ හැකි ආකාරය සම්බන්ධයෙන්ද මානව හිමිකම් ක්‍රියාධර රුකී ප්‍රනාන්දු එහිදී අනතුරු ඇගවීය.

'' මානව හිමිකම් ආරක්ෂකයන්ට සලකන්නේ මෙහෙමයි. මානව හිමිකම් ආරක්ෂකයන් මර්දනය කරන්න කිසිම පදනමක් නැතිව මර්දනය කරන්න පෙළඹෙනවයි කියලා සාක්ෂි සහතිව දැක්කම අනිවාර්යෙන්ම මම හිතන්නේ අපිට ආර්ථික වශයෙන් ලබා ගන්න තියන  ආධාර ලැබීමේ ප්‍රවනතාවයත් අඩු වෙන්න පුළුවන්.''