විරුද්ධවාදීන්ට එරෙහිව ආණ්ඩුව විසින් දිගටම කරගෙන යන මර්දනය සම්බන්ධ විස්තර සහිත වාර්තාවක් එක්සත් ජාතීන්ගේ සංවිධානයට භාරදී ඇති ශ්‍රී
ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය මහාපරිමාණ ගොරතර අපරාධ කළ බවට චෝදනා ලබන රටේ හමුදා සහ දේශපාලන නායකයන්ට එරෙහිව විශ්ව අධිකරණ නීතිය යොදවා නඩු පවරන ලෙසත්, සම්බාධක පනවන ලෙසත් ඉල්ලා තිබේ.
බහුජන අරගලයකින් ගෝඨාභය රාජපක්ෂ බලයෙන් පහකොට රටින් පලවා හැරීමෙන් අනතුරුව ජනාධිපති ධුරයට පත් රනිල් වික්‍රමසිංහ විසින් මාසයකට මදකට වැඩි කාලයක් ඇතුලත සිදුකරන ලද බරපතළ මානව හිමිකම් උල්ලංඝන කිහිපයක් මානව හිමිකම් පිළිබඳ එක්සත් ජාතීන්ගේ මහකොමසාරිස් වෙත යවන ලද පිටු 11 කින් යුත් වාර්තාවේ දැක්වෙයි.
අන්තර් විශ්ව විද්‍යාලයීය ශිෂ්‍ය බල මණ්ඩලයේ (අවිශිබම) කැඳවුම්කරු වසන්ත මුදලිගේ, අන්තර් විශ්ව විද්‍යාලයීය භික්ෂු බල මණ්ඩලයේ කැඳවුම්කරු ගල්වැව සිරිධම්ම හිමි සහ කැළණිය විශ්ව විද්‍යාලයේ සමාජ විද්‍ය අංශයේ ශිෂ්‍ය ක්‍රියාකාරික හෂාන් ජීවන්ත ගුණතිලක ත්‍රස්ත නීති යොදාගෙන දින 90ක් සිරගත කිරීම මෙන්ම උසාවියෙන් ඇප ලබා සිටින කිවියර අහ්නාෆ් ජසීම් සහ අවුරුදු 3කට වැඩි කාලයක් නඩු නැතිව ත්‍රස්ත නීති යොදාගෙන සිරකොට සිටින පලාලි රෝහලේ අධ්‍යක්ෂ දොස්තර සින්නයියා සිවරූබන් ත්‍රස්තවාදීන් ලෙස ලැයිස්තු ගත කිරීමද JDS වාර්තාවට ඇතුලත් කර ඇත.
තව සතියකින් ජිනීවා නුවර පැවැත්වෙන ජගත් මානව හිමිකම් මණ්ඩලයේ 51 වැනි සැසිවාරයේදී ශ්‍රී ලංකාවේ මානව හිමිකම් චර්යාව සම්බන්ධ වාර්තාවක් මහ කොමසාරිස් විසින් ඉදිරිපත් කිරීමට නියමිතය.
ආණ්ඩුව වෙනුවෙන් පිළිතුරු දීම සඳහා ජිනීවා නුවරට යන්නේ විදේශ අමාත්‍ය අලි සබ්රි සහ අධිකරණ අමාත්‍ය විජයදාස රාජපක්ෂ යන නීතිඥ දෙපල ප්‍රමුඛ දූත මණ්ඩලයකි.
රටින් පිටවීමට පෙර කොළඹදී මාධ්‍යවේදීන් හමුවූ විදේශ අමාත්‍යවරයා කියා සිටියේ ශ්‍රී ලංකාවේ මානව හිමිකම් උල්ලංඝන සම්බන්ධයෙන් යුක්තිය ඉටු කිරීම සඳහා කිසිදු ජාත්‍යන්තර මැදිහත්වීමකට රනිල් වික්‍රමසිංහ ආණ්ඩුව ඉඩ නොදෙන බවයි.
JDS විසින් එක්සත් ජාතීන්ට ලබාදුන් සමස්ත වාර්තාව මෙතනින්.
Ongoing Human Rights Crisis in Sri Lanka
කාටත් කලින් අභ්‍යන්තර දේශපාලන පුවත් බලන්න,
The LEADER Whatsapp Group එකට එකතුවෙන්න.
