රාජ්‍ය නිදහස් දින සමරුවක් වෙනුවෙන් ජනපති යාපනයේ කළ සංචාරයට එරෙහිව විරෝධතා දක්වමින් සිටියදී පොලිස් අත්අඩංගුවට ගත් පාර්ලිමේන්තු මන්ත්‍රීවරයා ඇතුළු දෙමළ 18 දෙනකු අධිකරණය විසින් බරපතල ඇප කොන්දේසි සහිතව මත මුදා හැර තිබේ.
පෙබරවාරි 11 වැනි සෙනසුරාදා පොලීසිය අත්අඩංගුවට ගත් දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් ඇතුළු පිරිස පෙබරවාරි 12 වැනිදා අධිකරණය විසින් මුදා හැර ඇත්තේ එක් අයෙකුට රුපියල් ලක්ෂ තුන බැගින් වූ ශරීර ඇප මතයි.
ජනාධිපති රනිල් වික්‍රමසිංහට විරෝධය පළ කරමින් යාපනය බස් නැවතුම්පොළ අසළදී විරෝධතාවයක් දියත් කරමින් සිටියදී දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් සමග නීතිඥ කනගරත්නම් සුගාෂ්, එස්. තවපාලසිංහම්,අයි. සත්‍යසීලන්, ටී. සින්තුජන්, ඒ.ටී. තිලීෂන්, ටී. රාජශ්‍රීකාන්ත්, පී.ගුනරත්නම්, ජේ.ජේ. සතීස්, ජේ. රජීව්කාන්ත්, එස්.සුදාකරන්, එස්. පද්මනාදන් (ඩිලාන්), එල්. කෝකිලන්, කේ.ඥානේෂ්වරන්, අජන්තන්, ගෝකුලන්, මදන්, සෝදිලිංගම් පොලීසිය අත්අඩංගුවට ගන්නා ලද බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ, JDS වාර්තා කරයි.
මාසයක් තුලදී යාපනයේදී ජනාධිපති රනිල් වික්‍රමසිංහ දෙමළ ජනතා විරෝධයට මුහුණ දුන් දෙවැනි අවස්ථාව මෙයයි.
“වර්ග සංහාරක රනිල්-පිටව යනු, ශ්‍රී ලංකා නිදහස් දිනය-දෙමළ ජනතාවගේ කළු දිනයයි” යනුවෙන් ගජේන්ද්‍රන් මන්ත්‍රීවරයා පොලිසියෙන් ඇදගෙන යද්දී විරෝධතාකරුවන් සමග හඬ නගනු දැකගත හැකිය.
යාපනය පොලිස් සිරමැදිරියේ සිටියදී සමාජ මාධ්‍ය ඔස්සේ පණිවිඩයක් නිකුත් කරමින් නීතිඥ සුගාෂ් තමන් ඇතුළු විරෝධතා කරුවන් අත් අඩංගුවට ගැනීම “ප්‍රජාතන්ත්‍ර විරෝධී, රාජ්‍ය අරාජකවාදී, රාජ්‍ය ත්‍රස්තවාදයක්” ලෙස හෙලා දැක තිබුණි.
උතුරේ වාර්තාකරුවන් පවසන්නේ නැවත එවැනි විරෝධතාවල නිරත වුවහොත් ඇප අවලංගු කරන බවට ඉහත නම් සදහන් 18 දෙනාට යාපනය මහේස්ත්‍රාත් නියෝග කළ බවයි.
එමෙන්ම ඔවුන්ට අධි ආරක්ෂිත කලාප වලට ඇතුළත් නොවන ලෙසත් අධිකරණය විසින් ලබාදෙන නියෝග සම්බන්ධයෙන් සැලකිලිමත් වන ලෙසත් මහේස්ත්‍රාත්වරයා දැඩි ලෙස අවවාද කළ බව දකුණේ ජනමාධ්‍ය වාර්තා කර තිබේ.
යාපනයේ විරෝධතාව පැවතුනේ හමුදාවට උතුරු නැගෙනහිරින් පිටවී යන ලෙසත්, දෙමළ ජනතාවට තමන්ගේ ඉරණම විසඳා ගැනීමේ බලය ලැබෙන දෙපළාත ඒකාබද්ධ කළ පෙඩරල් පාලනයක් ලබා දෙන ලෙස බලකරමින් යාපනයේ සිට මඩකලපුව දක්වා ගමන් ගත් සිව් දින පාද යාත්‍රාවකින් අනතුරුව ය.
සබැඳි පුවත් :
දෙමල මන්ත්‍රී සේලවරාසා ගජේන්ද්‍රන් අත්අඩංගුවට
