දේශිය සහ විදේශිය සංචාරකයන් ගැවසෙන නාවික හමුදා කඳවුරක්ද පිහිටි ඩෙල්ෆ්ට් නමින් ප්‍රකට
නෙඩුන්තීව් දුපතේ සිදු කෙරුණු පංච පුද්ගල ඝාතනයකින් පසු එහි පදිංචිකරුවන් සිය ආරක්ෂාව තහවුරු කරන ලෙස ඉල්ලමින් විරෝධතාවයක් දියත් කර තිබේ.
එම දුපතේ මාවිලිතුරෙයි ජැටිය අසල නිවසක් තුළදී P පූමනී, N බාලසිංහම්, සුබ්‍රමනියම් මහාදේවන්, S නාගරත්නම් සහ කාර්තිගේසු නාගසුන්දරී යන පස් දෙනා ඝාතනය කිරීම සම්බන්ධයෙන් සැකපිට, වසර 25ක් ජර්මනියේ පදිංචිව සිටි 51 හැවිරිදි එස් රඝුනාදන් නැමැත්තා මේ වන විටත් අත්අඩංගුවට ගෙන තිබෙන බව පොලිසිය පවසයි.
ඩෙල්ෆ්ට් ප්‍රාදේශිය ලේකම් කාර්යාලය ඉදිරිපිටදී අප්‍රේල් 24 වැනිදා සාමකාමී විරෝධයක් දියත් කළ ගම් වැසියන් එහිදී රජයේ බලධාරීන්ට දැනුම් දී සිටියේ දුපතේ නිවසක් තුළ සිදුවු සමුහ මිනිස් ඝාතනයෙන් පසු ජනතාව බියෙන් සහ සැකයෙන් ජීවත් වන බවයි.
“නෙඩුන්තීව් ජනතාවට ආරක්ෂාව කෝ?” ඇතුළු සටන්පාඨ කියමින් ඉල්ලීම් හයක් ඇතුලත් ලිපියක් ප්‍රාදේශිය ලේකම්වෙත භාර දුන් ගම් වැසියන් එහිදී රජයේ බලධාරියාගෙන් ඉල්ලා ඇත්තේ එම ඉල්ලීම් ඉටු කරන ලෙස ප්‍රදේශයේ පොලිස්ථානය දැනුවත් කිරීමට කටයුතු යොදන ලෙසයි.
ඩෙල්ෆ්ට් දුපතේ ජනතාවගේ ආරක්ෂාව තහවුරු කිරීම සඳහා පොලිසිය විසින් සුපරීක්ෂාකාරී කමිටු පිහිටුවිය යුතු බව පෙන්වා දෙන ගම් වැසියන් ඉල්ලා සිටින්නේ දුපතේ සියලුම පොදු ස්ථාන, දුපතට ගොඩබසින ජැටිය, ජනාකීර්ණ ස්ථාන, සංචාරක ස්ථාන ඇතුළු සියලුම ස්ථානවල නිරීක්ෂණ සදහා කැමරා සවි කළ යුතු බවයි.
දුපතේ වැදගත් ස්ථානවල මුර සංචාරය පොලීසිය විසින් අඛණ්ඩව සිදු කළ යුතු අතර සංචාරක ස්ථාන සෑම දිනකම පොලිස් නිලධාරීන් විසින් නිරීක්ෂණය කළ යුතු බවටත් ඔවුහු වැඩි දුරටත් ඉල්ලා සිටිති.
පිට ප්‍රදේශවලින් පැමිණ ඩෙල්ෆ්ට් දුපතේ තාවකාලිකව නවාතැන් ගන්නා අයගේ සම්පූර්ණ තොරතුරු නේවාසිකාගාර හිමියන් විසින් ලබා ගැනීම අනිවාර්ය කරන ලෙස පොලීසියෙන් ඉල්ලා සිටින විරෝධයේ නිරත ගම්වැසියන් අවධාරණය කරන්නේ දුපතට ඇතුළු වන සහ පිටවන පුද්ගලයන්ගේ දත්ත සටහන් කිරීමේ ක්‍රියාවලිය නවීන තාක්‍ෂණයේ ආධාරයෙන් කළ යුතු බවයි.
