බන්ධනාගාර තුළ දුරකථන සංඥා ක්‍රියා විරහිත කරන ‘ජෑමර්’ උපකරණ නිසා අවට ප්‍රදේශවල ද
සංඥා ක්‍රියාත්මක නොවන බව හෙළි වී තිබේ.
ඒ බව අනාවරණය වී ඇත්තේ රාජ්‍ය අමාත්‍ය ලසන්ත අලගියවන්නගේ ප්‍රධානත්වයෙන් ජුනි 09 වැනිදා පැවති රජයේ ගිණුම් පිළිබඳ කාරක සභාවේදීය.
බන්ධනාගාර කොමසාරිස් ජනරාල් තුෂාර උපුල්දෙණිය එහිදී පෙන්වා දී ඇති පරිදි, මේ වන විට බන්ධනාගාර තුළ දුරකථන සංඥා ක්‍රියා විරහිත කිරීමේ රාජකාරිය භාරව සිටින්නේ යුද හමුදාවයි.
" දැනට යුධ හමුදාවේ සංඥා බලකාය මගින් මෙම කටයුතු සිදුකරන බවත් අදාළ ප්‍රදේශයට පමණක් ඉතා නිවැරදිව ක්‍රියාත්මක වන තාක්ෂණයක් මේවන විට දියුණු රටවල පවතින බවත් බන්ධනාගාර කොමසාරිස් ජනරාල්වරයා පැවසීය."
ඒ අනුව අදාළ ආරක්ෂක අංශ සමග මෙන්ම විදුලි සංදේශ නියාමන කොමිෂන් සභාව සමග මේ පිළිබද සාකච්ඡා කොට අවශ්‍ය පියවර කඩිනමින් ගන්නා ලෙස කමිටුව විසින් උපදෙස් දුන් බව ශ්‍රී ලංකා පාර්ලිමේන්තුව නිවේදනය කර තිබේ.
රජයේ ගිණුම් පිළිබඳ කාරක සභාවේදී බන්ධනාගාර කොමසාරිස් ජනරාල් තුෂාර උපුල්දෙණිය වැඩි දුරටත් අනාවරණය කර ඇත්තේ බන්ධනාගාර තුළ සිරකරුවන්ගේ ධාරිතාව 250% කින් ඉහළ ගොස් ඇති බවයි.
"මෙම අගය සාමාන්‍යයෙන් 259%ක අගයක් ගන්නා බවත් ඇතැම් බන්ධනාගාරවල මෙම අගය 300% - 400% ක වැඩිවීමක් ඇති බවත් බන්ධනාගාර කොමසාරිස් ජනරාල් තුෂාර උපුල්දෙණිය පැවසීය."
අධිකරණ අමාත්‍යාංශ ලේකම් වසන්තා පෙරේරා පෙන්වා දී ඇති පරිදි බන්ධනාගාර තුළ රැදවියන් 11762 ක සංඛ්‍යාවක් සදහා පමණක් ඉඩකඩ පැවතියද මේවන විට 26791 ක ප්‍රමාණයක් බන්ධනාගාරගතව සිටි.
බන්ධනාගාර තුළ පුද්ගල ශරීර පරීක්ෂාව සිදුකරන සහ භාණ්ඩ මලු පරීක්ෂාව සදහා පවතින යන්ත්‍ර 11කින් 4ක් ක්‍රියා විරහිත බවද රජයේ ගිණුම් පිළිබඳ කාරක සභාවේදී අනාවරණය වී ඇත.
