දේශීය ණය ප්‍රතිව්‍යූහගත කිරීමේදී සේවක අර්ථ සාධක අරමුදල සහ සේවා නියුක්තිකයින්ගේ භාර අරමුදලේ අරමුදල් කප්පාදු කිරීම වැළැක්වීමේ
නියෝගයක් නිකුත් කරන්නැයි ඉල්ලා, ගොනු කළ මුලික අයිතිවාසිකම් පෙත්සම විභාගයට නොගෙන නිෂ්ප්‍රභ කිරීමට ශ්‍රේෂ්ඨාධිකරණය ඊයේ (09) තීරණය කළේ ය.
ඒ, දීර්ඝ කරුණු සලකා බැලීමකින් අනතුරුවයි.
එස්.තුරයි රාජා, කුමුදුනි වික්‍රමසිංහ සහ මහින්ද සමයවර්ධනගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල විසින් මෙම නියෝගය ප්‍රකාශයට පත් කළේය.
මෙම පෙත්සම සලකා බැලීම සඳහා කැඳවූ අවස්ථාවේදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල් කණිෂ්කා ද සිල්වා අධිකරණයෙන් කරුණු දක්වමින් අදාළ පෙත්සම විභාගයට නොගෙන නිෂ්ප්‍රභ කරන ලෙස ඉල්ලා මූලික විරෝධතා මතු කරන බව කියා සිටියේය.
එම මූලික විරෝධතාවලින් නියෝජ්‍ය සොලිසිටර් ජෙනරාල්වරිය සඳහන් කළේ මෙම පෙත්සමෙන් ඉල්ලා සිටින සහන ප්‍රදානය කිරීමට අධිකරණයට බලයක් නොමැති බවයි.
දේශීය ණය ප්‍රතිව්‍යුහගත කිරීමේ කටයුතුවලට අදාළ යෝජනාව ජුනි මස 28 වනදා අමාත්‍ය මණ්ඩලයට ඉදිරිපත් කිරීමෙන් අනතුරුව එය පාර්ලිමේන්තුවට යොමු කෙරුණු බව ඇය සදහන් කළාය. පාර්ලිමේන්තුව ද එම යෝජනාව විධිමත් ආකාරයෙන් සම්මත කර ඇතැයි පෙන්වා දුන් නියෝජ්‍ය සොලිසිටර් ජෙනරාල් වරිය, ඒ අනුව ව්‍යවස්ථාදායකය හමුවේ පැවැති කරුණක් අධිකරණය හමුවේ අභියෝගයට ලක් කළ නොහැකි බවත් කියා සිටියාය.
වැඩි දුරටත් කරුණු දැක්වූ නියෝජ්‍ය සොලිස්ටර් ජෙනරාල්වරිය කියා සිටියේ, මෙම පෙත්සමෙන් ඉල්ලා තිබෙන ඉල්ලීම් තහවුරු කිරීමට අවශ්‍ය වන ලේඛන පෙත්සම්කාර පාර්ශවය විසින් අධිකරණය හමුවේ ගොනු කර නොමැති බවයි.
එම අවස්ථාව වන විට පැවැති ලේඛන පදනම් කරගෙන මෙම පෙත්සම අධිකරණය හමුවේ ගොනු කිරීමට පෙත්සම්කරු කටයුතු කළ බවත් ජනාධිපති නීතිඥවරයා කියා සිටියේය.
දෙපාර්ශවය විසින් ඉදිරිපත් කළ කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල අනතුරුව මෙම තීන්දුව ප්‍රකාශයට පත් කළේය.
අන්තර් සමාගම් සේවක සංගමය එහි ලේකම් වසන්ත සමරසිංහ ඇතුළු හය දෙනෙකු විසින් මෙම පෙත්සම ඉදිරිපත් කර තිබිණ.
