තිස් තුන් වසරකට පෙර අම්පාර දිස්ත්‍රික්කයේදී මරා දැමුණු දෙමළ ගම්වැසියන් පිරිසක් අනුස්මරණය කර තිබේ.
'' අවුරුදු 33 කට කලින් තිරීයයිකේනි ගමේ දී මරා දැමුණු දෙමළ ජාතිකයන් 54 දෙනාට යුක්තිය සාධාරණත්වය මෙතෙක් ඉටුවෙලා නැහැ.'' යැයි ඉකුත් දා අම්පාර තිරීයයිකේනි සමරුවට එක්වූ දෙමළ ජාතික සන්ධානයේ අම්පාර දිස්ත්‍රික් පාර්ලිමේන්තු මන්ත්‍රී ටි. කලෙයිඅරසන් පැවසීය.
යුද්ධයෙන් පිඩාවට පත් තිරීයයිකේනි ගම්මානයේ වැසියන් අදත් ගෙවනුයේ විවිධ කම්කටොලු වලින් පිරි දිවියක් බවද දෙමළ ජාතික සන්ධාන මන්ත්‍රීවරයා පෙන්වා දෙයි.
තිරීයයිකේනි සිත්ති විනයාගර් කෝවිල ඉදිරිපිට පැවති මෙම සමරුවට මරා දැමුවන්ගේ ඥාති හිත මිතුරන් ඇතුළු ප්‍රදේශයේ සමාජ හා දේශපාලන ක්‍රියාධරයන් එක්ව සිටී බව නැගෙනහිර ජනමාධ්‍යවේදීහු වාර්තා කළහ.
'' අවුරුදු 33 කට පසු වුවත් මරා දැමුණු තමන්ගේ සමීපතමයන් ගැන සාධාරණ විමර්ශනයක් කරලා ඝාතනයට වගකිව යුත්තන් නිතිය හමුවට පැමිණය යුතු බවට ඥාතින්ගේ අපේක්ෂාව,'' යැයි කලෙයිඅරසන් මන්ත්‍රීවරයා පෙන්වා දෙයි.
1990 අගෝස්තු 06 උදෑසන තිරියයිකේනි ගම්මානයට කඩාවැදුණු රජයේ හමුදා රැකවරණය ලැබූ පිටතින් පැමිණි මුස්ලිම් මැර පිරිසක් ළමුන් කාන්තාවන් හා පිරිමින් ඇතුළු 54 දෙනෙකු කපා කොටා මරා දමා තිබේ.
ප්‍රහාරයෙන් දිවි ගලවා ගත්තවුන් පවසන්නේ රජයේ හමුදා සහයෙන් හින්දු කෝවිලට ඇතුල්වූ ඝාතකයන් තම සමිපතමයන් මරා දමා කෝවිලට ද අලාභානි කළ බවයි.
ඊට පෙර දිනයෙදී අලිමන්කාඩු ප්‍රදේශයේ වෙල්යායකදී ගොවීන් කිහිප දෙනකු කපා කොට මරා දැමීමට පළි ගැනීමක් ලෙස මෙම ප්‍රහාරය එල්ල කර තිබේ.
අක්කර 300 ක් සශ්‍රික පොල් වත්තක් කැබලි කොට ඒ අවට ගම්මාන වල දෙමළ හා මුස්ලිම් ජනයාට සාධාරණ මිලකට අළෙවි කිරීමෙන් අනතුරුව මෙම තිරියයිකේනි ගම්මානය නිර්මාණය වී තිබේ.
