කොළඹ පිහිටි සිය කාර්යාලයට කිසියම් අයකු ඇතුළු වී තම කැමරාව ඇතුළු මාධ්‍ය උපකරණ සොරාගෙන ඇති බවට
නිදහස් මාධ්‍යවේදියෙක් කොටහේන පොලීසියට පැමිණිලි කර තිබේ.
මීට අවුරුද්දකට ඉහතදී ද සිදුවූ මෙවැනිම සොරකමක් සම්බන්ධයෙන් පොලිසිය මේ වනතුරු කිසිදු පියවරක් ගෙන නැත.
නිදහස් මාධ්‍යවේදී පරමේෂ්වරන් විග්නේෂ්වරන් පවසන්නේ තමන් aivarree.com වෙබ් අඩවිය පවත්වාගෙන යන කොටහේන පිකරින්ස් පාරේ සිය කාර්යාලයට අගෝස්තු 14 වැනිදා රාත්‍රියේ වහලයෙන් ඇතුළු වු අයකු මෙම සොරකම සිදු කර ඇති බවයි. ඊට අදාල සී.සී.ටී.වී දර්ශනද තමන් පොලීසියට බාර දුන් බව ඔහු වැඩි දුරටත් සදහන් කරයි.
මීට පෙර අවස්ථා කිහිපයකදීම තම වෙබ් අඩවියට හා යු ටියුබ් චැනලයට එල්ල වු බාධා කිරීම් නිසා තමන්ගේ මාධ්‍ය කටයුතු ඉලක්ක කරගනිමින් කිසියම් අයෙක් සැලසුම් සහගතව මෙම සොරකම සිදු කර ඇතිදැයි මාධ්‍යවේදියා සැක පළ කරයි.
මාධ්‍යවේදියා පවසන පරිදි 2022 වසරේ ජුනි 21 වැනිදා තමන් පදිංචි නිවසේ තිබු මාධ්‍ය කටයුතු වෙනුවෙන් භාවිත කළ ඇපල් වර්ගයේ ලැප්ටොප් පරිගණකය ඇතුළු ලක්ෂ 20 ක වටිනාකමකින් යුත් මාධ්‍ය උපකරණ කිසියම් අයකු විසින් සොරාගෙන තිබේ. ඒ සම්බන්ධයෙන් කොටහේන පොලීසියට පැමිණිලි කළද මේ දක්වා කිසිවකු අත්අඩංගුවට ගැනීමට පොලීසිය සමත් වී නොමැති බව ඔහු සදහන් කරයි.
2023 අප්‍රේල් මාසයේ සහ මැයි මාසයේ අවස්ථා දෙකක දී සිය වෙබ් අඩවිය හැක් කිරීමකට ලක් වු බව පවසන නිදහස් මාධ්‍යවේදී පරමේෂ්වරන් විග්නේෂ්වරන් සදහන් කරන්නේ තමන් විසින් පවත්වාගෙන යන යු ටියුබ් චැනල් දෙකද හැක් කිරීමකට ලක් වු අතර එක් යු ටියුබ් චැනලයක් හැකර්වරුන් විසින් මකා දමා තිබු බවයි.
